بۇگىن الماتى قالاسىندا Qazbilim ۇلتتىق ليسەيى اشىلدى. ليسەيدىڭ اشىلۋ سالتاناتىنا 500-دەن استام ادام قاتىسىپ، وقۋشىلار مەن مۇعالىمدەر ونەر كورسەتتى. قازىرگى تاڭدا ەلىمىزدىڭ 7 وڭىرىندە Qazbilim ۇلتتىق ليسەيى جۇمىس ىستەپ، جاراتىلىستانۋ باعىتى بويىنشا قازاق تىلىندە ءبىلىم بەرىپ كەلەدى. ءبىر ەرەكشەلىگى ليسەيدە دومىرا شەرتىپ، تەرمە ايتۋدى، شاحمات ويناۋدى ۇيرەتەتىن قوسىمشا ۇيىرمەلەر دە بار.

جيىننىڭ شىمىلدىعى انۇرانمەن ءتۇرىلىپ، مەكتەپ وقۋشىلارى مەن مۇعالىمدەرىنەن قۇرالعان توپ «بالبىراۋىن» كۇيىن تارتتى. اشىلۋ سالتاناتى كەزىندە العاشقىلاردىڭ ءبىرى بولىپ اياتجان احمەتجان ۇلى ءسوز الىپ، اتا-انالارعا العىسىن ءبىلدىردى.

«ءبىز ۇلى ارمانعا قانات قاققان باسپالداقتىڭ العاشقى ساتىسىندا تۇرمىز. قازاق دەگەن حالىقتىڭ بالاسىنا ءبىلىم نۇرىن شاشۋ ءۇشىن جاۋاپكەرشىلىگى اۋىر جۇكتى ارقالاعالى تۇرمىز. ءبىز ۇلتتىق مەكتەپتىڭ كەرەگەسىن كەڭەيتىپ، ساپاسىن ارتتىرعىمىز كەلەدى. سەبەبى كەشەگى ماعجان ايتادى: «ەگەر مەكتەپتەرىمىز قازاقتىڭ جانىنا جاقىن بولسا ءبىز بولاشاق ءۇشىن ايانباي سەرتتەسە الامىز».

باستى ارمانىمىز – قازاقتىڭ جانىنا جاقىن مەكتەپتى قۇرۋ. مۇستافا شوقاي «بالا قاي تىلدە ءبىلىم السا ءتۇبى سول ۇلتقا قىزمەت ەتەدى»، دەسە، جۇسىپبەك «ورىس تاربيەسىن العان بالا ۇلتقا قىزمەت قىلىپ جارىتپايدى»، دەگەن ءسوز قالدىرعان. ءبىز ۇلتقا قىزمەت قىلاتىن، قازاقتى ارمانىنا جەتكىزەتىن، قازاق ارمانىن ورىندايتىن مەكتەپتىڭ نەگىزىن قالاعىمىز كەلەدى. سول قالاۋدىڭ بۇگىن العاشقى ساتىسىندا تۇرسىزدار. سىزدەردىڭ قولداپ، قۋاتتاپ كەلگەندەرىڭىزگە، بالالارىڭىزدىڭ ءبىلىم الۋى ءۇشىن ءبىزدى تاڭداعاندارىڭىز ءۇشىن شىن جۇرەكتەن باسىمدى ءيىپ العىس ايتامىن»، – دەدى اياتجان احمەتجان ۇلى.

ۇلتتىق ليسەيدىڭ اشىلۋىمەن قۇتتىقتاپ ىزگى تىلەگىن بىلدىرگەندەردىڭ قاتارىندا Qamshy.kz پورتالىنىڭ باسشىسى ءبىلال قۋانىش، “ەگەمەن قازاقستان” باسىلىمىنىڭ رەداكتورى قالماعانبەت مۇحاممەتقالي بولدى.

«سوناۋ ءاليحان بوكەيحانداردىڭ زامانىندا «زامان – وقىعاندىكى» دەگەن ۇران بولعان. كەيىن 20 عاسىردىڭ ورتاسىندا «زامان – جاقسى وقىعاندىكى» دەگەن ۇران پايدا بولدى. ال ءقازىر دامىعان، تەحنولوگيالار زامانى عوي. سول سەبەپتى بۇگىنگى كۇنى «زامان – داستۇرگە لايىق ۇلتتىق ءبىلىم العاندىكى»، دەگەن ۇرانعا اينالىپ بارا جاتىر. سەبەبى جاھانداعان الەمدە ادامدى، ۇلتتى ەرەكشەلەيتىن ءبىر-اق نارسە بار: ءوزىنىڭ ءتول مادەنيەتى، ءتىلى، ءداستۇرى. ءقازىر ءبىر ەرەكشەلەنسەك وسىمەن عانا ەرەكشەلەنە الامىز. ءبىلىم سالاسىندا ۇلتتىق نەگىزگە قادام باسۋىمىز – جاقسى ءۇردىس.وسىدان 6 جىل بۇرىن Kazbilim اتتى ءبىلىم بەرۋ ورتالىعىنىڭ اشىلۋ سالتاناتىندا ءسوز سويلەپ، تىلەك ايتقان ەدىك. ەندى سول كىشكەنە وقۋ ورتالىعى ۇلكەن ليسەيگە اينالىپ وتىر. شىن جۇرەكتەن قۇتتى بولسىن!»، دەدى «ەگەمەن قازاقستان» گازەتىنىڭ رەداكتورى قالماعانبەت مۇحامەتقالي.

“قامشى” پورتالىنىڭ جەتەكشىسى ءبىلال قۋانىش:

– ادەتتە ۇلتتىق مەكتەپ دەسە جۇرت اقىندار مەن ءانشى، ولەڭشىلەردى دايىندايدى دەپ ويلايدى. الايدا اياتجان اشقان مەكتەپ جاراتىلىستانۋ باعىتىنداعى عىلىمداردى جاڭا زامانعا لايىقتاپ، بەيىمدەپ، قازاقتىڭ ءبىر كەم-كەتىگىن تۇزەيتىن مامانداردى دايىندايتىن ۇلتتىق مەكتەپ دەپ ويلايمىن. اياتجان مەكتەبىنە التى الاشتىڭ بالاسىن جيىپ جاتىر. بولاشاقتا “اياتجاننىڭ شاكىرتىمىز” دەپ ماقتاناتىن ۇرپاق كوپ بولسىن بولسىن، - دەپ تىلەگىن ايتتى.

اياتجان احمەتجان ۇلى جيىن بارىسىندا ءوزىنىڭ كومانداسىمەن، ياعني، مەكتەپ مۇعالىمدەرىن تانىستىردى. مۇعالىمدەردىڭ كوبى –جاستار. ليسەيدىڭ نەگىزىن قالاۋشى اياتجان احمەتجان ۇلى “جاستاردا ەنەرگيا كوپ. ولاردى تاربيەلەۋدەن قورىقپايمىز”،- دەدى.

جيىندا ءان ايتقان ۇشقىن جامالبەك الماتى قالاسى ماسليحاتىنىڭ دەپۋتاتى اكىم تۇرسۇنمەن بىرگە لەنتا قيۋ راسىمىنە قاتىستى. اشىلۋ سالتاناتىنان كەيىن اتا-انالار سىنىپتاردى ارالاپ، مۇعالىمدەرمەن تانىستى.