جامبىل وبلىسىنداعى اسكەري قويمانى قاساقانا ورتەدى دەپ ايىپتالىپ جاتقان ەكى سارباز 13 جىلعا باس بوستاندىعىنان ايىرىلۋى مۇمكىن، دەپ حابارلايدى كتك.
2021 جىلى بايزاق اۋدانىندا بولعان جارىلىسقا قاتىستى كوشپەلى سوتتا پروكۋرورلار جاۋىنگەرلەرگە وسىنداي جازا كەسۋدى سۇرادى.
مەملەكەتتىك ايىپتاۋشى ەكى كۇدىكتى ماتانى ورتەپ، وق-دارىلەر تۇرعان قويماعا تەرەزەدەن ادەيى لاقتىرعان دەيدى. ال ساربازداردىڭ بۇل ىسكە بارۋىنا شتاب باستىعىمەن جەكە باس ارازداعى سەبەپ كورىنەدى.
"ق ر قك 202-بابى، 3-بولىگىنىڭ 1،2-تارماقتارى بويىنشا 10 جىلعا باس بوستاندىعىنان ايىرۋدى، قك 459-بابىنىڭ 2-بولىگى بويىنشا 5 جىلعا باس بوستاندىعىنان ايىرۋ جازاسىن تاعايىنداۋدى، ق ر قك 58-بابىنىڭ 3-بولىگىن نەگىزگە الا وتىرىپ، جازانى ءىشىنارا قوسۋ ارقىلى تۇپكىلىكتى 13 جىل مەرزىمگە باس بوستاندىعىنان ايىرۋدى تاعايىنداۋدى سۇرايمىز"، - دەيدى وڭتۇستىك اۋماعى اسكەري پروكۋروردىڭ ورىنباسارى اسىلبەك تەمىربەكوۆ.
وسى ىسكە قاتىستى تاعى ءتورت وفيسەر ايىپتى دەپ تانىلعان. ولار سالعىرتتىق جانە قارۋ-جاراقتى ساقتاۋدا قاۋىپسىزدىك ەرەجەلەرىن ەسكەرمەۋ بابىمەن جاۋاپ بەرۋدە. پروكۋرورلار جارىلىس بولعان ءبولىم كومانديرى مەن ونىڭ ورىنباسارىن 6 جىلعا سوتتاۋدى سۇرادى. قالعان ەكى قىزمەتكەردى قىلمىستىق جاۋاپكەرشىلىككە تارتۋ مەرزىمىنىڭ ءوتىپ كەتۋىنە بايلانىستى جازادان بوستۋدى ۇسىندى.
ال جارىلىستى "قولدان ۇيىمداستردى" دەپ تاعىلعان ايىپ ەمەس، قوس جاۋىنگەرلەرگە جابىلعان جالا دەيدى ولاردىڭ اتا-انالارى. سوزدەرىنشە، ءدال سول ۋاقىتتا ساربازدار وقيعا ورنىندا مۇلدە بولماعان.
"ءبىراق مەنىڭ بالام و باستان ونداي بولماعان دەپ مويىنداپ وتىر. ول ۋاقىتتا تۇرانوۆ ەكەۋى ءشوپ تازالاعان. ەكى بالاعا قوسىلىپ كەتكەن. 14ء-شى قويمانى ءتىپتى بىلمەگەن ولار. بىلمەيدى دە. بۇلار ءبىزدىڭ بالالارىمىزدى كىناسىز كىنالاپ وتىر عوي. ءبىز سوعان كەلىسپەيمىز. شىندىق كەرەك بىزگە. سوتىمىز ءادىل بولسا ەكەن دەپ تالاپ ەتەمىز"، - دەيدى ساربازدىڭ اناسى الماگۇل اسانوۆا.
ەكى جىل بۇرىن بولعان جويقىن جارىلىستان 17 ادام قازا تاۋىپ، 100-گە جۋىق جان جارالاندى. كەلتىرىلگەن شىعىن كولەمى 25 ملرد تەڭگەدەن اسادى.
پىكىر قالدىرۋ