قازاقستاندا مەملەكەت باسشىسى قاسىم-جومارت توقايەۆتىڭ باستاماسىمەن ءتۇرلى سالالاردا رەفورمالار جۇزەگە اسىرىلۋدا. پرەزيدەنت ءوز تاپسىرمالارىندا دەنساۋلىق ساقتاۋ سالاسىن دامىتۋعا ەرەكشە نازار اۋدارادى. قازاقستاندىقتاردىڭ دەنساۋلىعى ەلىمىزدىڭ مەملەكەتتىك ساياساتىنىڭ باستى باسىمدىقتارىنىڭ ءبىرى بولىپ تابىلادى. وسىعان بايلانىستى مەملەكەتتىك جانە جەرگىلىكتى اتقارۋشى ورگانداردىڭ الدىندا دەنساۋلىق ساقتاۋ جۇيەسىن جاڭعىرتۋ جانە ساپالى مەديسيناعا كەڭ قولجەتىمدىلىكتى قامتاماسىز ەتۋ بويىنشا ماڭىزدى مىندەت تۇر.
استانا مەديسينالىق ءتۋريزمدى دامىتۋدا، ىشكى جانە سىرتقى، ونىڭ ىشىندە كۇردەلى ەم الۋ ءۇشىن ۇلكەن الەۋەتكە يە. بۇل سالانىڭ ەلوردادا قالاي دامىپ جاتقانى تۋرالى قالانىڭ كوممۋنيكاسيالار قىزمەتىندە وتكەن بريفينگتە «استانانى دامىتۋ ورتالىعى» ج ش س مەديسينالىق ءتۋريزمدى دامىتۋ جونىندەگى باسقارۋشى ديرەكتورى دارينا دەميان ايتىپ بەردى، دەپ حابارلايدى ەلوردا اكىمدىگىنىڭ رەسمي سايتى.
مەديسينالىق تۋريزم – بۇل ەلدىڭ ەكونوميكالىق جانە الەۋمەتتىك دامۋىنىڭ پەرسپەكتيۆالى باعىتتارىنىڭ ءبىرى، ونى ىلگەرىلەتۋ ءبىرىنشى كەزەكتە ەلورداعا دا، جالپى رەسپۋبليكاعا دا تۋريستىك اعىمدى ۇلعايتۋعا، دەنساۋلىقتى جاقسارتۋعا، مەديسينالىق قىزمەتتەردىڭ ساپاسىن ارتتىرۋعا ىقپال ەتەتىن بولادى.
«شەتەلدىك كەلۋشىلەردىڭ 90%-ى تمد ەلدەرىنىڭ – رەسەي، قىرعىزستان جانە وزبەكستان ازاماتتارى. قالعان 10% – جۇڭگو، يران، بەلارۋس ازاماتتارى. قازاقستاندىق مەديسينالىق ۇيىمداردىڭ نەگىزگى ارتىقشىلىقتارى – زاماناۋي مەديسينالىق تەحنولوگيالارعا جانە جاڭا وبەكتىلەرگە قول جەتكىزۋ، ساپا ستاندارتتارى، مەديسينالىق قىزمەتتەردىڭ قولايلى قۇنى، تمد ەلدەرىنىڭ ازاماتتارى ءۇشىن تىلدىك كەدەرگىنىڭ بولماۋى، دامىعان تۋريستىك ينفراقۇرىلىمنىڭ بولۋى»، - دەپ اتاپ ءوتتى سپيكەر.
ەگەر باعا بويىنشا سالىستىرمالى تالداۋ جاسالسا، وندا جۇرەكتى اينالىپ ءوتۋ حيرۋرگياسى اقش-قا قاراعاندا 80 ەسە ارزان، سينگاپۋرعا قاراعاندا 11 ەسە ارزان.
بۇگىنگى تاڭدا استانادا مەديسينادا «التىن ستاندارت» بولىپ سانالاتىن JCI حالىقارالىق اككرەديتاسياسىن العان 7 كلينيكا بار:
* ۇلتتىق عىلىمي كارديوحيرۋرگيا ورتالىعى («University Medical Center» كورپوراتيۆتىك قورى)؛
* «انا مەن بالا ۇلتتىق عىلىمي ورتالىعى» («University Medical Center» كورپوراتيۆتىك قورى)؛
* بالالاردى وڭالتۋ ۇلتتىق ورتالىعى («University Medical Center» كورپوراتيۆتىك قورى)؛
* رەسپۋبليكالىق دياگنوستيكالىق ورتالىق («University Medical Center» كورپوراتيۆتىك قورى)؛
* ۇلتتىق نەيروحيرۋرگيا ورتالىعى؛
* ق ر پرەزيدەنتى ءىس باسقارماسى مەديسينالىق ورتالىعىنىڭ اۋرۋحاناسى.
* «UMIT» حالىقارالىق توموتەراپيا ونكولوگيالىق ورتالىعى.
«مەديسينالىق ءتۋريزمدى دامىتۋ اياسىندا «قازاقستاندىق مەديسينالىق تۋريزم قاۋىمداستىعى» اشىلدى، ونىڭ باستى ماقساتى جەرگىلىكتى تۇرعىندار مەن شەتەلدىك تۋريستەر اراسىندا مەديسينالىق ءتۋريزمدى دارىپتەۋ ءۇشىن مەديسينالىق ۇيىمدار مەن تۋريستىك سالا وكىلدەرىن بىرىكتىرۋ بولىپ سانالادى. پاسيەنتتەرمەن جۇمىس بويىنشا سەرۆيس-مەنەدجمەنتتى دامىتۋ جانە گوسپيتالدىق سەرۆيس ساپاسىنىڭ ستاندارتتارىن ارتتىرۋ ءۇشىن حالىقارالىق سپيكەرلەردى تارتا وتىرىپ، مەديسينالىق ۇيىمداردىڭ قىزمەتكەرلەرى ءۇشىن كۋرستار، سەمينارلار جانە شەبەرلىك سىنىپتارى وتكىزىلدى»، - دەپ تولىقتىردى دارينا دەميان.
پىكىر قالدىرۋ