دەپۋتات ابزال قۇسپان «ق ر مادەني ساياساتىنىڭ 2023-2029 جىلدارعا ارنالعان تۇجىرىمداماسىن» قايتا قاراستىرۋدى ۇسىندى. ءماجىلىس دەپۋتاتى ابزال قۇسپان ەلدەگى مادەنيەتىمىزدىڭ جاي-كۇيىنە الاڭداۋشىلىق ءبىلدىرىپ، ۇكىمەت باسشىسىنىڭ ورىنباسارى تامارا دۇيسەنوۆاعا دەپۋتاتتىق ساۋال جولدادى.

"مادەنيەتتى ادام قىلمىس جاساماق تۇرماق، جاعىمسىز ىسكە بارا قويمايدى، ءوزىنىڭ جاقسى ءسوزى، ادەپتى ىسىمەن اينالا ورتاسىن تاربيەلەپ، قوعامدى ساۋىقتىرادى.

مادەنيەتى جوعارى ەلدىڭ، تۇرمەسى بولمايتىنى سوندىقتان. ءبىر كەزدەرى قازاق حالقى سونداي از ەلدەردىڭ ءبىرى بولعان ەدى.     

وسى جىلدىڭ ءساۋىر ايىندا سول كەزدەگى ۆيسە-پرەمەر اتىنا ءبىر ەمەس 12 دەپۋتات اتىنان ساۋال جولداپ، ەلدەگى مادەنيەتىمىزدىڭ جاي-كۇيىنە الاڭداۋشىلىق بىلدىرگەن ەدىك.

وندا قازاقتىڭ ءداستۇرلى مادەنيەتىنە قاتىستى قالىپتاسقان جاعدايعا توقتالىپ، قازاق ۇكىمەتىنىڭ ءوز ەلىنىڭ ۇلتتىق مادەنيەتى مەن وزگە ەلدىڭ مادەنيەتىنە قاراجات بولۋدەگى، سالىستىرۋعا دا كەلمەيتىن ادىلەتسىزدىك تۋرالى ناقتى مالىمەتتەردى كەلتىرە وتىرىپ، وسى كەلەڭسىز تاجىريەبەنى وزگەرتۋدى، بيىلعى جىلدىڭ باسىندا پرەمەر-مينيسترمەن بەكىتىلگەن مادەنيەتتى دامىتۋدىڭ 6 جىلدىق كونسەپسياسىن قايتا قاراستىرۋ قاجەتتىگىن كوتەردىك"، دەدى ابزال قۇسپان. 

الايدا ابزال قۇسپان ساۋالعا وتە فورمالدى جاۋاپ العانىن ايتتى. 

"مادەنيەت سالاسىنا جاۋاپتى ۇكىمەت مۇشەلەرىنىڭ مادەنيەت تۋرالى تۇسىنىك-دەڭگەيى – كۇندەلىكتى وتكىزىلىپ جاتقان كونسەرتتەرمەن ولشەنەتىنى وكىنىشتى-اق!

قازىرگى تاڭدا سول جاۋاپتىڭ اۆتورى كولگىنوۆتە، دايىنداۋشى مينيستر ورالوۆتا قىزمەتتەرىندە جوق، سول سەبەپتى وسى ماسەلەگە قايتا ورالۋدى قاجەت دەپ تاپتىم. سەبەبى، زاڭدىق باستاما قۇقىعى دەپۋتات رەتىندە وزىمىزدە بولسا دا، ول ءۇشىن اۋەلى ۇكىمەت تاراپىنان بەكىتىلىپ قويعان كونسەپسيانى وزگەرتۋ قاجەت"، دەدى دەپۋتات. 

دەپۋتاتتىق ساۋالىنان سوڭ ابزال قۇسپان تامارا دۇيسەنوۆاعا ءوز ۇسىنىسىن ايتتى. 

"ق ر مادەني ساياساتىنىڭ 2023 – 2029 جىلدارعا ارنالعان تۇجىرىمداماسىن" قايتا قاراستىرۋ قاجەت. ەگەر قازاق مادەنيەتىن دامىتۋ ماسەلەسى بويىنشا ۇزاق جىلدارعا نەگىزدەلگەن ۇلتتىق كونسەپسيا جاساقتار بولساق، ءتيىستى زاڭنامانى دا سول كونسەپسياعا ساي قابىلداۋعا بىزدە ءوز تاراپىمىزدان ات سالىسۋعا دايىنبىز.

جاڭا كونسەپسيانى  – تەك مينيسترلىك شەنەۋنىكتەرىمەن ەمەس، مىندەتتى تۇردە ەلىمىزدىڭ مادەنيەت سالاسىنا قاتىسى بار مىقتى عالىمدارىمىز بەن قايراتكەرلەرىمىزدىڭ ارالاسۋىمەن جۇزەگە اسىرساق دەگەن ۇسىنىسىم بار.

كوتەرىلىپ وتىرعان ماسەلەنىڭ اۋقىمدىلىعى ءارى رەگلامەنتتى ساقتاۋ ماقساتىندا وسى ماسەلەگە قاتىستى بۇرىن جاريالاعان دەپۋتاتتىق ساۋالىمدى، «ەگەمەن قازاقستان»، «تۇركىستان»، «قازاق ادەبيەتى» گازەتتەرىندەگى كولەمدى سۇحباتتارىمدى جانە كۇنى كەشە باسپادان شىققان «وزبەكالى جانە مادەني مايدان» كىتابىمدى قوسا جولدايمىن"، دەپ ايتتى ابزال قۇسپان.