پراگاداعى كارل ۋنيۆەرسيتەتىندە 14 ادام قازا تاپقان جاپپاي اتىستان كەيىن چەحيادا قارالى كۇن دەپ جاريالاندى. بۇل تۋرالى چەحيا پرەمەر-مينيسترى پەتر فيالا مالىمدەدى. ول ۇكىمەتتىڭ كەزەكتەن تىس وتىرىسىنان كەيىنگى بريفينگتە ءسوز سويلەدى.
ءبىر كۇن بۇرىن پراگاداعى كارل ۋنيۆەرسيتەتىنىڭ فيلوسوفيا فاكۋلتەتىنىڭ 24 جاستاعى ستۋدەنتى داۆيد ك. اۋديتورياداعى ستۋدەنتتەرگە، سونداي-اق سول كەزدە يان پالاح الاڭىنداعى وقۋ ورنىنىڭ جانىنا ءوتىپ بارا جاتقان ادامدارعا ۆينتوۆكادان وق اتقان.
اتىس سالدارىنان 14 ادام قازا تاۋىپ، تاعى 25 ادام جارالاندى، ونىڭ 11ء-ىنىڭ جاعدايى اۋىر.
پوليسەيلەردىڭ ايتۋىنشا، ستۋدەنت ءوز ارەكەتىن شەت ەلدەردەگى وسى سەكىلدى جاعدايلاردى زەرتتەپ، وعان مۇقيات دايىندالىپ، سالقىنقاندىلىقپەن جاساعان. سودان كەيىن ول وز-وزىنە قول جۇمسادى.
چەحيا ۇكىمەتىنىڭ باسشىسى ۋنيۆەرسيتەتتە بولعان وقيعاعا ەلدىڭ بارلىق ازاماتتارى ەسەڭگىرەپ قالعانىن ايتتى.
"ۇكىمەتتىڭ ارنايى وتىرىسى ءوتتى، وعان رەسپۋبليكا پرەزيدەنتى مەن پارلامەنتتىڭ تومەنگى پالاتاسىنىڭ سپيكەرى قاتىستى. ءبىز 23 جەلتوقساندى مەملەكەتتىك ازا تۇتۋ كۇنى دەپ جاريالاۋ تۋرالى شەشىم قابىلدادىق. بۇل كۇنى ساعات 12.00-دە (استانا ۋاقىتىمەن 17.00) ءبارىمىز وسى قورقىنىشتى جاعدايدىڭ قۇرباندارىن ءبىر مينۋت ۇنسىزدىكپەن ەسكە الامىز"، - دەدى فيالا.
