"نەمولچي.kz" قورىنىڭ جەتەكشىسى دينا تاڭسارىگە 6 قىلمىستىق ءىس قوزعالعان. بۇل تۋرالى Polisia.kz سايتى حابارلادى. وعان كورىنەۋ جالعان اقپارات تاراتۋ، جەكە ومىرگە قول سۇعىلماۋشىلىقتى بۇزۋ فاكتىلەرى بويىنشا ايىپ تاعىلىپ، تەرگەۋ جۇمىستارى جۇرگىزىلىپ جاتىر. 

– سوتقا دەيىنگى تەرگەۋ بارىسىندا سمايىلوۆانىڭ “نەمولچيKZ” قورىنىڭ باسشىسى ەكەنى، سونىمەن قاتار ءوزىن قوعام بەلسەندىسى، قۇقىق قورعاۋشى جانە ايەلدەر مەن بالالارعا قاتىستى زورلىق-زومبىلىقپەن كۇرەسۋشى رەتىندە كورسەتەتىندىگى انىقتالدى. ول ءوز قىزمەتىن الەۋمەتتىك جەلىلەردە كەڭىنەن جاريالايدى. الايدا سمايىلوۆانىڭ كوپتەگەن جاريالانىمدارى شىندىققا جاناسپايدى، سەبەبى ولار تەرگەۋمەن راستالماعان. ونىڭ جالعان حابارلارىمەن قۇقىعى بۇزىلعان ازاماتتار شاعىم ءتۇسىردى، دەيدى ءىىم تەرگەۋ دەپارتامەنتى باستىعىنىڭ ورىنباسارى سامات ايسوۆ. 

كەشە دينا سمايلوۆاعا قازاقستاندا ىزدەۋ جاريالانعانى تۋرالى اقپارات جاريالانعان ەدى. كەيىن تەرگەۋ ورگاندارى ونى قاماۋعا الۋ تۋرالى سوتقا ءوتىنىش تۇسىرگەنى حابارلاندى. سونداي-اق دينا ءتاڭسارى قوردىڭ ەسەپشوتى بۇعاتتالعانىن، بيلىكتىڭ تۇرمىستىق زورلىق-زومبىلىق ماسەلەلەرى تۋرالى اشىق تۇردە ايتىپ جۇرگەن قوعامدىق قوردى جاپقىسى كەلەتىنىن مالىمدەدى.