وكسفورد ۋنيۆەرسيتەتىندە قازاق ءتىلىن وقىتۋ قولعا الىنادى، دەپ حابارلايدى عىلىم جانە جوعارى ءبىلىم مينيسترلىگى. ۋنيۆەرسيتەتتە Oxford Qazaq سوزدىگىنىڭ العاشقى باسىلىمى دا تانىستىرىلدى
مينيسترلىك وكسفورد ۋنيۆەرسيتەتىمەن ءوزارا ىنتىماقتاستىق تۋرالى كەلىسىمدى راسىمدەدى. سونىڭ اياسىندا وكسفورد ۋنيۆەرسيتەتىندە قازاق ءتىلىن وقىتۋ جوسپارلانىپ وتىر. قازاقستاندىق دەلەگاسيا بودليان كىتاپحاناسىندا قازاقستانعا قاتىستى كونە قولجازبالارىمەن دە تانىستى.
"بودليان كىتاپحاناسى - وتە ءىرى، رۋحاني وردالاردىڭ بىرەگەيى. بۇل كىتاپحانادا تۇركى فيلوسوفى شەيح احمەد تارازيدىڭ “كەمەلدىك عىلىمى” قولجازباسىنىڭ جالعىز داناسى ساقتالعانىن ايتىپ وتكىم كەلەدى. سونىمەن قاتار ۋنيۆەرسيتەتكە ەكسكۋرسيا جاساپ، تاريحىمەن ەتەنە تانىسىپ شىعۋدىڭ ءساتى ءتۇستى"، - دەيدى مينيستر ساياسات نۇربەك.
ساپار كەزىندە Oxford Qazaq سوزدىگىنىڭ العاشقى باسىلىمى دا تانىستىرىلدى. وعان 60 مىڭنان استام ءسوز ەندى.
"سونىمەن قاتار وسى ساپار اياسىندا مەن جاس ونەرتاپقىش سانجار تايجانمەن كەزدەستىم. سانجاردى مەن ەرتەرەكتەن جاقسى بىلەمىن. ەستەرىڭىزدە بولسا، Tesla ۇيىمداستىرعان Not-A-Boring Competition تۋرنيرىنە قاتىسقان قازاق جىگىتى سانجار تايجان مەن ونىڭ كومانداسى ۇسىنعان بۇرعى ماشيناسى يلون ماسكتىڭ نازارىنا ىلىككەن بولاتىن"، - دەپ اتاپ كورسەتتى نۇربەك.
پىكىر قالدىرۋ