كەشە الەۋمەتتىك جەلىدە بەلسەندى رۋزا بەيسەنبايتەگىنىڭ پسيحولوگيالىق ورتالىققا جاتقىزىلعانى تۋرالى اقپارات قىزۋ تالقىعا ءتۇستى. Qamshy.kz اقپارات اگەنتتىگى ءتىلشىسى وڭىردەگى دەنساۋلىق باسقارماسىنا حابارلاسقان بولاتىن. باسقارما وكىلى اقپاراتتى راستادى. 

"ناۋقاس پاۆلودار وبلىستىق پسيحيكالىق دەنساۋلىق ورتالىعىنا 24 قاڭتار كۇنى ساعات 16.30-دا تۇسكەن. وزگە مالىمەتتەر “حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىنىڭ 273-بابىنىڭ نەگىزىندە جاريا ەتىلمەيدى"، دەدى باسقارما وكىلى. 

الەۋمەتتىك جەلىدەگى نارازىلىقتاردان كەيىن بۇگىن ءتىل جاناشىرى رۋزا بەيسەنبايتەگى بوستاندىققا شىقتى. الايدا ونى پسيحولوگيالىق ورتالىقتىڭ ەسەبىنە تىركەگەن.  

"وقيعا ورنىنا كەلگەن مەديسينالىق بريگادا پسيحيكالىق اۋىتقۋلارى بەلگىلەرىمەن ر.ب. ەسىمدى 66 جاستاعى ايەل ادامدى پاۆلودار وبلىستىق پسيحيكالىق دەنساۋلىق ساقتاۋ ورتالىعىنا جەتكىزدى.

ورتالىق دارىگەرلەرى تاراپىنان ناۋقاسقا ەكى كۇن بويى ەم قابىلداۋ شارالارى جاسالدى. مەديسينا قىزمەتكەرلەرىنىڭ قاراۋىنان كەيىن دەنساۋلىق جاعدايىنىڭ جاقسارۋىنا وراي، كونسيليۋم شەشىمىمەن ناۋقاس ديسپانسەرلىك باقىلاۋ ۇسىنىسىمەن ۇيىنە قايتارىلدى.

دەنساۋلىق ساقتاۋ سالاسىنداعى زاڭناماعا سايكەس، الداعى ۋاقىتتا ناۋقاستىڭ پسيحيكالىق اۋىتقۋلارى ناشارلاپ، اينالاسىنداعى ادامدارعا زيان كەلتىرۋ ىقتيمالدىعى قايتا بايقالعان جاعدايدا، ول ەمدەۋگە جىبەرىلەتىن بولادى"، – دەپ حابارلادى پاۆلودار وبلىسى دسب.