20 ناۋرىز كۇنى ساعات 12:00-دە ەلدىڭ بارلىق ءبىلىم بەرۋ ۇيىمدارىندا ءبىر مەزەتتە ۇلتتىق كۇي وينايدى. بۇل تۋرالى وقۋ اعارتۋ مينيسترلىگى حابارلادى.
مينيسترلىك شارا وسكەلەڭ ۇرپاقتىڭ بويىندا رۋحاني-ادامگەرشىلىك قۇندىلىقتار مەن پاتريوتتىق سەزىمدەردى قالىپتاستىرۋعا، ەلدىڭ مادەني مۇراسىن جالعاستىرۋعا، بالالار اراسىندا دومبىرادا ويناۋدى ناسيحاتتاۋعا باعىتتالعانىن اتاپ ءوتتى.
– دومبىراشىلار چەللەندجىنىڭ ماقساتى – بالالار مەن جاستاردىڭ، مۇعالىمدەر مەن اتا-انالاردىڭ مۋزىكاداعى شىعارماشىلىق جەتىستىكتەرىن كورسەتۋ جانە دومبىرانى دارىپتەۋ. شاراعا بارلىق نيەت بىلدىرۋشىلەر قاتىسا الادى. بۇل چەللەندج بىلتىر العاش رەت ءوتتى. دومبىرانىڭ كۇمبىرلەگەن ءۇنى ءبىر ۋاقىتتا بارلىق ءبىلىم بەرۋ ۇيىمدارىندا وينادى. بۇل ەلىمىزدىڭ مادەني ءومىرى ءۇشىن ەلەۋلى وقيعا. شارالار "ءبىرتۇتاس تاربيە" باعدارلاماسى اياسىندا وتكىزىلەدى، – دەيدى تاربيە جۇمىسى جانە قوسىمشا ءبىلىم بەرۋ دەپارتامەنتىنىڭ ديرەكتورى مەرۋەرت مەدەتبەكوۆا.
مينيسترلىك سونىمەن قاتار بيىل ناۋرىز مەيرامى بارلىق جالپى ءبىلىم بەرەتىن مەكتەپتەرىندە 14-23 ناۋرىز ارالىعىندا وتەتىنىن جەتكىزدى. وسى كۇندەرى تاقىرىپتىق چەللەندجدەر، جالپىۇلتتىق ەكولوگيالىق اكسيا جانە ۇلتتىق ويىنداردان ءتۇرلى جارىستار ۇيىمداستىرىلماق.
پىكىر قالدىرۋ