وبلىستىق پوليسيانىڭ حابارلاۋىنشا، الاياقتىق ءىسىنىڭ قۇرباندارى ەرلى-زايىپتىلار بولعان. تەرگەۋ مالىمەتتەرى بويىنشا، 2023 جىلدىڭ قازان ايىندا سەلينوگراد وبلىسىنداعى ەرلى-زايىپتىلار زەينەتاقى قورىنان اقشا الۋ مۇمكىندىگىنە قىزىعۋشىلىق تانىتقان.
"ءتيىستى ءراسىمدى جۇزەگە اسىرۋ ءۇشىن دەلدالدار كەلەسى سحەما بويىنشا جۇمىس ىستەگەن. ولار ەرلى-زايىپتىعا ستوماتولوگيالىق ەمحاناعا 2 ميلليون 800 مىڭ تەڭگە زەينەتاقى جارناسىن اۋدارۋدى ۇسىنعان. سونداي-اق كەيىن بۇل سومانى الۋعا بولاتىنىن ەسكەرتكەن. دەلدال قىز ءوز قىزمەتىن 228 000 تەڭگەگە باعالاعان. ارىزدانۋشىلار ونىڭ بانك شوتىنا اقشا اۋدارعان. اقمولا تۇرعىندارى جارتى جىلدان استام زەينەتاقى جارنالارىن الماعاندىقتان، پوليسياعا ارىزدانعان"، – دەلىنگەن حابارلامادا.
الاياقتىق ارەكەت فاكتىسى بويىنشا سەلينوگراد اۋداندىق پوليسيا ءبولىمىنىڭ قىزمەتكەرلەرى سوتقا دەيىنگى تەرگەۋ امالدارىن باستادى. ناتيجەسىندە، كۇدىكتىنىڭ جەكە باسى انىقتالدى.
"پوليسيا قىزمەتكەرلەرى جەدەل ىزدەستىرۋ ءىس-شارالارىن جۇرگىزۋدى جالعاستىرىپ جاتىر. سونىمەن قاتار باسقا دا زاڭسىز ارەكەتتەردەن زارداپ شەككەندەردىڭ بار-جوعى انىقتالىپ جاتىر. پوليسيا قىزمەتكەرلەرى الاياقتاردان ساق بولۋدى جانە اقشاعا قاتىستى كۇماندى ۇسىنىستارعا كەلىسپەۋدى سۇرادى"، – دەلىنگەن حابارلامادا.
پىكىر قالدىرۋ