ءمينيستردىڭ سوزىنشە، ءقازىر قازاقستاندا تاۋارلىق گازدىڭ ورتاشا قۇنى مىڭ تەكشە مەترىنە – 33 مىڭ 169 تەڭگە. بۇل رەتتە تاۋارلىق گازدىڭ بەكىتىلگەن كوتەرمە باعاسى – 23 مىڭ 646 تەڭگە.

"گاز سالاسىنا ينۆەستيسيا تارتۋ جانە تاۋارلىق گازدىڭ وزىندىك قۇنىنا قول جەتكىزۋ ماقساتىندا تۇرعىندار ءۇشىن باعانىڭ كۇرت وسۋىنە جول بەرمەۋدى ەسكەرە وتىرىپ، گاز باعاسىن كەزەڭ-كەزەڭمەن كوتەرۋ قاجەت"، – دەدى مينيستر. 

مينيستر قازاقستان 2024 جىلدىڭ 1 شىلدەسىنەن باستاپ ىشكى نارىقتا تاۋارلىق گازدى كوتەرمە ساتۋدىڭ شەكتى باعاسىن ورتاشا ەسەپپەن 14،6% وسىممەن قايتا قاراعانىن ەسكە سالدى.

"تۇتاستاي العاندا، ءۇش جىل ىشىندە ىشكى نارىقتا گازدى شىعىنسىز ساتۋعا قول جەتكىزۋ جوسپارلانىپ وتىر. بۇل ەلدىڭ گازعا دەگەن قاجەتىن وتەۋگە جانە ەلىمىز ءۇشىن ماڭىزدى ينۆەستيسيالىق جوبالاردى جۇزەگە اسىرۋعا مۇمكىندىك بەرەدى"، – دەدى ساتقالييەۆ. 

ەسكە سالا كەتەيىك، 1 شىلدەدەن باستاپ قازاقستاندا سۇيىتىلعان مۇناي گازىنىڭ باعاسى قىمباتتادى. ەنەرگەتيكا مينيسترلىگىنىڭ مالىمەتىنشە، قازاقستان تمد ەلدەرى بويىنشا ەڭ تومەن باعالاردىڭ ءبىرى – 54 تەڭگەدەن 86 تەڭگەگە دەيىن بولسا، رەسەيدە ءبىر ليتر گازدىڭ باعاسى 132 تەڭگە، ءازىربايجاندا – 171 تەڭگە، تاجىكستاندا – 273 تەڭگە.

سونداي-اق ساراپشىلار گازدىڭ 2024 جىلى ىشكى نارىقتاعى تۇتىنۋ كولەمى تاعى 200 مىڭ تونناعا ارتىپ، 2،4 ميلليون توننانى قۇرايتىنىن ايتتى. مۇنداي جاعدايدا گاز تاپشىلىعى 30-40 پايىزعا جەتۋى مۇمكىن.