ءىس-شاراعا قازاقستان قارۋلى كۇشتەرىنىڭ قولباسشىلىعى، جاتتىعۋعا قاتىسۋشى ەلدەر دەلەگاسيالارىنىڭ باسشىلارى، اقتاۋ گارنيزونىنىڭ اسكەري قىزمەتشىلەرى، ارداگەرلەر، تەڭىز استاناسىنىڭ تۇرعىندارى مەن قوناقتارى قاتىستى.

جاعالاۋعا جينالعاندار رەيدتە قازاقستاندىق جانە ءازىربايجاندىق اسكەري كەمەلەردى كيلۆاتەر ساپتا باقىلاي الدى.

امفيتەاتر الاڭىندا بەس قاتىسۋشى ەلدىڭ قارۋلى كۇشتەرىنىڭ باسقا بولىمشەلەرى جاتتىعۋعا دايىن ەكەندىكتەرىن كورسەتتى. وسى ءساتتىڭ سالتاناتتىلىعى بارلىق جاعىنان سەزىلدى: جاۋىنگەرلەردىڭ سىمباتتى قاتارلارى مەن جابدىقتارىندا، قازاقستان، ءازىربايجان، قىرعىزستان، تاجىكستان جانە وزبەكستان گيمندەرىن كەزەكپەن ورىنداۋ كەزىندە تۋلاردى كوتەرۋدە.

قورعانىس مينيسترلىگى باسشىلىعىنىڭ اتىنان "بىرلىك-2024" وقۋ – جاتتىعۋىنىڭ باستالۋىمەن قازاقستان قورعانىس ءمينيسترىنىڭ ءبىرىنشى ورىنباسارى – ق ر قارۋلى كۇشتەرى باس شتابىنىڭ باستىعى گەنەرال-لەيتەنانت سۇلتان كامالەتدينوۆ قاتىسۋشىلاردى قۇتتىقتادى.

ول ءبىزدىڭ ەلدەرىمىزدىڭ حالىقتارى اتا-بابالاردىڭ قاھارماندىق وتكەنىنە جانە بىر-بىرىنە دەگەن سەنىمىنە نەگىزدەلگەن تىعىز، دوستىق قارىم-قاتىناستاردى بايلانىستىراتىنىن اتاپ ءوتتى.

"ورتالىق ازيا ءوڭىرى مەن ءازىربايجان رەسپۋبليكاسىنىڭ ءتورت ەلىنىڭ قارۋلى كۇشتەرىنەن اسكەري كونتينگەنتتەردى تارتا وتىرىپ، وقۋ-جاتتىعۋ وتكىزۋ فورماتى العاش رەت قولدانىلۋدا. بۇل ءبىزدىڭ مەملەكەتتەرىمىزدىڭ تاتۋ كورشىلىك قاتىناستاردى ودان ءارى كەڭەيتۋگە جانە نىعايتۋعا، ونىڭ ىشىندە قاۋىپسىزدىك پەن تۇراقتىلىقتى قامتاماسىز ەتۋ ماسەلەلەرىندە ۇمتىلىسىن ايعاقتايدى"، – دەپ اتاپ ءوتتى ءمينيستردىڭ ءبىرىنشى ورىنباسارى.

گەنەرال-لەيتەنانت سۇلتان كامالەتدينوۆ وقۋ-جاتتىعۋ اسكەرلەردىڭ اسكەري باسقارۋ ورگاندارىنىڭ ۇيلەسىمدىلىك دەڭگەيىن ارتتىراتىنىن جانە زاڭسىز قارۋلى قۇرالىمداردى جويۋ جونىندەگى وقۋ-جاۋىنگەرلىك مىندەتتەردى ورىنداۋ كەزىندە قارۋلى كۇرەستى جۇرگىزۋ تاسىلدەرىن سىناقتان وتكىزۋگە مۇمكىندىك بەرەتىنىن ايتتى.

"سىزگە تابىستى قاتىسۋ جانە بارىنشا ءتيىمدى ءوزارا ءىس-قيمىل تىلەيمىن. سىزدەردىڭ ءارقايسىلارىڭىز ەلدەرىمىزدىڭ قاۋىپسىزدىگىن قامتاماسىز ەتۋ بويىنشا ورتاق كۇش – جىگەردە پايدالى بولاتىن قۇندى تاجىريبە مەن ءبىلىم السىن"، - دەپ تۇيىندەدى ول.

ءىس-شارا وقۋ-جاتتىعۋعا قاتىسۋشى ەلدەردىڭ اسكەري قىزمەتشىلەرى كولوننالارىنىڭ سالتاناتتى شەرۋىمەن جانە ق ر قارۋلى كۇشتەرى ۇلتتىق اسكەري-پاتريوتتىق ورتالىعىنىڭ شىعارماشىلىق ۇجىمى دايىنداعان كونسەرتتىك باعدارلامامەن اياقتالدى.