اباي وبلىسىندا «تازا قازاقستان» باعدارلاماسى اياسىندا اباتتاندىرۋ جانە ەكولوگيالىق مادەنيەتكە ارنالعان ءىس-شارالار وتۋدە دەپ جازادى Qamshy.kz اقپارات اگەنتتىگى. 

مەملەكەت باسشىسىنىڭ باستاماسىمەن «تازا قازاقستان» اكسياسىنىڭ اياسىندا اباي وبلىسى كولەمىندە كوشەلەردى اباتتاندىرۋ، جيناۋ، تازالاۋ جانە ت.ب. اۋقىمدى ءىس-شارالار ءوتتى.

اكسيا بارىسىندا ساياباقتار مەن قوعامدىق ورىنداردى اباتتاندىرۋعا ەرەكشە كوڭىل ءبولىندى. سەمەي قالاسىندا نايمانبايەۆ-مومىش ۇلى كوشەلەرىنىڭ جول ايرىعىندا تاريحي قيىلىس اشىلىپ، قالا تۇرعىندارى مەن قوناقتارىن قىزىقتىراتىن جاڭا ورىنعا اينالدى. جوباعا تاريحي عيماراتتار مەن ساۋلەت ەسكەرتكىشتەرىن قالپىنا كەلتىرۋ، نىسانداردىڭ تاريحي قۇندىلىعىن ساقتاۋ ءۇشىن زاماناۋي ماتەريالداردى پايدالانا وتىرىپ، ولاردىڭ باستاپقى كەلبەتىن قالپىنا كەلتىرۋ كىرەدى. وعان قوسا، ءقاۋىپسىز ينفراقۇرىلىم دامىپ، كولىك قولجەتىمدىلىگى جاقسارىپ، جاياۋ جۇرگىنشىلەر ءۇشىن قولايلى ايماقتار، جارىقتاندىرۋ، اۆتوكولىك تۇراقتارى جابدىقتالعان.

سەمەي قالاسىنىڭ قۇرمەتتى ازاماتى زەينوللا توقايەۆ «تازا قازاقستان» باعدارلاماسىنىڭ قوعام مادەنيەتىن دامىتۋداعى ماڭىزىنا توقتالدى. حالىق الدىندا تۇرعان باستى مىندەتتەردىڭ ءبىرى – تاريحي جول ايرىعىنىڭ جاعدايىن ساقتاۋ.

«سەمەيدە قالامىزدىڭ تاريحي وقيعالارىن بايلانىستىراتىن تاعى ءبىر قوعامدىق كەڭىستىك اشىلدى. ءبىزدىڭ ماقساتىمىز – ونى جاقسى جاعدايدا ساقتاۋ. ويتكەنى، مۇنداي ورىندار مادەني جانە تابيعي مۇرالارىمىزدى ساقتاۋدا ماڭىزدى ءرول اتقارادى. ول ءۇشىن «تازا قازاقستان» باعدارلاماسى اياسىنداعى جۇمىستاردى جالعاستىرۋ ماڭىزدى. ەكولوگيالىق ماسەلەلەر مەن اباتتاندىرۋ ءبىرجولا شەشىلمەيدى، ولار ۇنەمى قوعام نازارى جانە كۇش سالۋدى تالاپ ەتەدى. بۇل باعدارلامانىڭ جالعاسۋى تۇرعىندار اراسىندا ەكولوگيالىق مادەنيەتكە، بالالاردىڭ دا، ەرەسەكتەردىڭ دە تابيعاتقا ۇقىپتى قاراۋىنا دا ىقپال ەتەدى» - دەدى زەينوللا توقايەۆ.

سونداي-اق، وبلىستىڭ باسقا دا اۋداندارىندا اباتتاندىرۋ جۇمىستارى جالعاسىپ جاتقانىن ايتا كەتكەن ءجون. بەسقاراعاي اۋدانىندا «تازا اۋدان» اكسياسى اياسىندا اۋماقتاردى تازالاۋعا بارلىق اۋىلدىق وكرۋگتەر اتسالىستى. وعان 100-دەن استام ادام قاتىستى. اباي اۋدانى قاراۋىل اۋىلىندا دا «تازا ساياباق» اكسياسى ءوتتى.

اياگوز اۋدانىندا «تازا قازاقستان» باعدارلاماسى اياسىندا قالا ساياباقتارىن قوقىستان تازارتۋ جۇمىستارى جۇرگىزىلدى. اكسياعا «جاسىل ەل» ەڭبەك جاساعىنىڭ 50-دەن استام جاۋىنگەرى مەن تۋعان جەردىڭ تازالىعىن ساقتاۋعا، اباتتاندىرۋعا ۇلەس قوسقىسى كەلەتىن مەكەمە قىزمەتكەرلەرى قاتىستى. اكسيا اباي قۇنانبايەۆ اتىنداعى ساياباقتا باستالىپ، قۇتتىباي بي ساياباعىندا اياقتالدى.

جاڭاسەمەي اۋدانىندا سۋ ايدىندارىن اباتتاندىرۋ جۇمىستارى جۇرگىزىلدى. وسىلايشا مۇقىر كولىنىڭ ماڭىنداعى اۋماق تازارتىلىپ، وعان جەرگىلىكتى تۇرعىندار مەن جاستار قوسىلدى.

«تازا قازاقستان» باعدارلاماسى ناعىز وتانسۇيگىش جانداردىڭ جۇمىلا اتسالىسقان باستاماسىنا اينالدى. جالپى، اباي وبلىسى بويىنشا باعدارلاما باستاۋ العان ساتتەن باستاپ 93 120 ادام، ونىڭ ىشىندە 3616 ۇيىم مەن مەكەمە وكىلدەرى قاتىستى. تازالىق جۇمىستارىنا 2063 بىرلىك تەحنيكا جۇمىلدىرىلدى. ناتيجەسىندە 87 446 اۋلا تازالانىپ، 55 109 توننا قوقىس قاتتى تۇرمىستىق قالدىقتار (قتق) پوليگوندارىنا تاسىمالداندى.

وبلىس كولەمىندە 239 ساياباق پەن سكۆەر تازارتىلىپ، 296 ەسكەرتكىشتىڭ اينالاسى اباتتاندىرىلىپ، 724 شارشى مەتر تاقتاتاس جول جوندەلدى. 135 540 اعاش جانە 8 622 كوشەت وتىرعىزىلدى. تازالىق شارالارى 1062 الەۋمەتتىك جانە 2248 وندىرىستىك نىساندى، سونداي-اق 870 سۋ قويماسىن، ونىڭ ىشىندە جاساندى سۋ قويماسىن دا قامتىدى.