ناقتى ايتقاندا، ۇيىندە ءبىر ايدان كوپ جاتىپ قالعان قوناعىن ۋاقىتشا تىركەۋگە قويماعان وتباسىلار جازالانادى.

ەلىمىزدە ءار ازامات تۇرعىلىقتى جەرىندە تىركەۋدە تۇرۋى ءتيىس. بۇل تىركەۋدىڭ نەگىزگى ماقساتى – ءبىر جەردەن ەكىنشى جەرگە ءتۇرلى سەبەپتەرمەن كەلگەن ادامداردىڭ سانىن ءبىلۋ. تۇرعىلىقتى جەر بويىنشا تىركەلۋ ءۇشىن ينتەرنەت جۇيەسى مەن 15 مينۋت بوس ۋاقىتىڭىز بولسا جەتكىلىكتى. ال مەكەنجاي بويىنشا تىركەلمەگەن ازاماتتارعا ايىپپۇل سالىنادى.

قازاقستاننىڭ وزگە قالاسىنا ءبىر ايدان استام ۋاقىتقا ساپارلاپ بارعان ادام مىندەتتى تۇردە سول جەردە تىركەلۋى كەرەك. مۇنداي تىركەۋ – الەمدە قالىپتاسقان ءۇردىس. ءبىزدىڭ ەلىمىزدە دە تۇرعىلىقتى جەرى بويىنشا نەمەسە ۋاقىتشا تۇرعىن جەرى بويىنشا تىركەۋ زاڭمەن قاراستىرىلعان. وعان ەل ۇكىمەتىنىڭ 1993 جىلعى «قازاقستان رەسپۋبليكاسىنداعى پاسپورت جۇيەسى تۋرالى ەرەجەنى»، 2000 جىلعى «حالىقتى قۇجاتتاندىرۋ ەرەجەسىن» جانە 2011 جىلعى «ىشكى كوشى-قوندى تىركەۋ ەرەجەسىن» مىسالعا كەلتىرۋگە بولادى. دەمەك، ءبىزدىڭ زاڭ ازاماتتاردى تۇرعىلىقتى جەرى بويىنشا تىركەۋدى كوزدەيدى. سونىمەن قاتار، مۇنداي مىندەت «كوشى-قون تۋرالى» زاڭدا دا قاراستىرىلعان.

سونداي-اق، قازاقستان زاڭناماسى بويىنشا ۋاقىتشا تىركەۋ تۇرعىلىقتى جەرىن ءبىر ايدان استام ۋاقىتقا اۋىستىرعان كەزدە بەرىلۋى ءتيىس. ياعني، ءبىر اي نەمەسە ودان دا كوپ ۋاقىتقا باسقا مەكەنگە كوشكەندە (مىسالى، وقۋعا، ءىسساپارعا، تۋىستارىنىڭ ۇيىنە كەتكەندە جانە ءۇي جالداعان كەزدە)، سونىمەن قاتار قالا نەمەسە اۋدان ىشىندە تۇرعىلىقتى جەردى اۋىستىرعان كەزدە دە ۋاقىتشا تىركەۋگە تۇرۋ قاجەت.