بۇگىن استانادا Digital Bridge 2025 حالىقارالىق تەحنولوگيالىق فورۋمى باستالدى. فورۋمدا مەملەكەت باسشىسى قاسىم-جومارت توقايەۆ ءسوز سويلەدى. سونداي-اق، ءىس-شاراعا ماجارستان پرەزيدەنتى تاماش شۋيوك تا قاتىسىپ وتىر.
مەملەكەت باسشىسى جاساندى ينتەللەكت ماسەلەسىنە باس نازار اۋدارىپ وتىرعانىن، بيىلعى قازاقستان حالقىنا جولداۋىن وسى تاقىرىپقا ارناعانىن جانە حالىقارالىق ىنتىماقتاستىقتى رەتتەيتىن بۇۇ جانىنداعى ۇيىم قۇرۋ تۋرالى پىكىرلەرىن ايتتى.
«وتىز جىلدان استام ۋاقىت بۇرىن قازاقستان بەيبىتشىلىك پەن قاۋىپسىزدىك جولىن تاڭداپ، يادرولىق قارۋدان ءوز ەركىمەن باس تارتتى. بۇگىندە ەلىمىز جاساندى ينتەللەكت بەيبىت ماقساتتا عانا قولدانىلۋعا ءتيىس دەپ باتىل تۇردە مالىمدەيدى. ونىڭ اسكەري سالادا، كيبەرشابۋىلدارعا جانە حالىقارالىق تۇراقتىلىققا قاتەر توندىرەتىن جوبالاردا پايدالانىلۋىنا جول بەرۋگە بولمايدى.
بۇۇ باس اسسامبلەياسىنىڭ تاياۋدا وتكەن سەسسياسىندا مەن قازاقستاننىڭ ۇيىم اياسىندا جاساندى ينتەللەكتىنى باسقارۋ جونىندەگى جاھاندىق ديالوگ جۇمىسىنا اتسالىسۋعا دايىن ەكەنىن راستادىم. ءبىز سەرىكتەستەرىمىزدىڭ باستامالارىن، سونىڭ ىشىندە قىتايدىڭ جي سالاسىنداعى جاھاندىق ىنتىماقتاستىق ۇيىمىن قۇرۋ تۋرالى ۇسىنىسىن قولدايمىز»، - دەدى پرەزيدەنت.
