الماتىدا سيفرلىق مەديسينا بولاشاقتىڭ ەمەس، بۇگىنگى كۇننىڭ كورىنىسى. Almaty Digital Medical Center (ADMC) نەگىزىندە قۇرىلعان ورتالىق ارقىلى قالا تۇرعىندارى ۇيدەن شىقپاي-اق دارىگەردەن كەڭەس الىپ، انىقتامالىق اقپاراتقا قول جەتكىزىپ، دەنساۋلىعىن ونلاين باقىلاۋدان وتكىزە الادى.

Almaty Digital Medical Center الماتى قالاسى قوعامدىق دەنساۋلىق ساقتاۋ باسقارماسى مەن سيفرلاندىرۋ باسقارماسىنىڭ قولداۋىمەن قۇرىلدى. جوبانىڭ ماقساتى — ءاربىر تۇرعىنعا مەديسينالىق كومەكتى بارىنشا جىلدام، ىڭعايلى جانە قولجەتىمدى ەتەتىن ءبىرىڭعاي سيفرلىق دەنساۋلىق ساقتاۋ ەكوجۇيەسىن قالىپتاستىرۋ.

ADMC جۇمىسىنىڭ نەگىزگى باعىتتارىنىڭ ءبىرى — تاۋلىك بويى جۇمىس ىستەيتىن 1312 قىسقا ءنومىر ارقىلى ءبىرىڭعاي بايلانىس ورتالىعى. مۇندا وپەراتورلار مەن دارىگەرلەر شۇعىل ەمەس مەديسينالىق ماسەلە بويىنشا كەڭەس بەرەدى، دارىگەرگە جازىلۋعا، ءدارىحانانى نەمەسە زەرتحانانى تابۋعا جاردەمدەسەدى، قاجەت بولسا سالالىق ماماندارعا باعىتتايدى. كۇن سايىن ADMC قىزمەتكەرلەرى جەدەل جاردەمنەن كەيىن ۇيىنە جىبەرىلگەن پاسيەنتتەرگە 1 500-دەن استام قوڭىراۋ شالادى.

«ءبىزدىڭ جۇمىسىمىزدىڭ باستى ناتيجەسى — مىڭداعان الماتىلىق دەر كەزىندە كەڭەس الىپ، اسقىنۋ قاۋپىنەن ساقتانادى»، — دەيدى بايلانىس ورتالىعىنىڭ جەتەكشىسى شىرىن تولەكوۆا.

دەنساۋلىقتى قاشىقتان باقىلاۋ جۇيەسى سوزىلمالى اۋرۋى بار پاسيەنتتەردى، جۇكتى ايەلدەردى، ءبىر جاسقا دەيىنگى بالالاردى جانە اۋرۋحانادان شىققاننان كەيىنگى باقىلاۋداعى ازاماتتاردى قامتيدى. بۇگىندە 110 مىڭنان استام تۇرعىننىڭ جاعدايىن تاۋلىك بويى 30-دان استام دارىگەر باقىلاپ وتىر.

2025 جىلى ماۋسىم ايىنان بەرى 15 مىڭ پاسيەنت كەزەكتەن تىس قابىلداۋعا جىبەرىلسە، مىڭعا جۋىق ادام اۋرۋحاناعا جاتقىزىلعان. جوبا جۇكتى ايەلدەردى جۇكتىلىك بويى جانە بوسانعاننان كەيىنگى 42 كۇن ىشىندە باقىلاپ، اي سايىن 3 200-دەن استام ايەلدى قامتيدى.

«تەك ءتورت ايدا شۇعىل مەديسينالىق كومەك قاجەت بولعان، ءبىراق ەمحاناعا جۇگىنبەگەن 362 جۇكتى انىقتادىق. ءبىز قاۋىپتەردى دەر كەزىندە انىقتاي الدىق»، — دەدى شىرىن تولەكوۆا.

سيفرلىق باقىلاۋدىڭ ارقاسىندا سوزىلمالى اۋرۋى بار ناۋقاستاردى قاداعالاۋ 27%-دان 48%-عا، ال بوسانۋدان كەيىنگى پاتروناج 28%-دان 81%-عا ارتتى.

1312 ءنومىرى ارقىلى ءبىرىڭعاي بايلانىس ورتالىعىنا دەگەن سۇرانىس تا ارتىپ كەلەدى: ماۋسىم ايىندا 8 مىڭ قوڭىراۋ قابىلدانسا، قازان ايىندا بۇل كورسەتكىش 50 مىڭنان اسقان. تۇرعىندار كەڭەس الىپ، قابىلداۋعا جازىلىپ، ەمحاناعا تىركەلىپ، شاعىم مەن العىس بىلدىرەدى.

بۇگىنگى تاڭدا ADMC پلاتفورماسىنا سەگىز قالالىق ەمحانا قوسىلعان. بۇل جۇيە العاش رەت تىركەۋ ءبولىمىنىڭ جۇكتەمەسىن جانە پاسيەنتتەرمەن بايلانىس ساپاسىن ناقتى ۋاقىت رەجيمىندە باقىلاۋعا مۇمكىندىك بەردى. الداعى ۋاقىتتا قالاداعى بارلىق مەديسينالىق ۇيىمدى وسى جۇيەگە قوسۋ جوسپارلانىپ وتىر.

«بۇرىن ءبىز پاسيەنتتەردىڭ ەمحانالارعا قوڭىراۋ شالعان-نەمەس شالا الماعانىن ناقتى بىلمەيتىن ەدىك. ەندى جاعدايدى ايقىن كورىپ وتىرمىز: قوڭىراۋلاردىڭ 37 پايىزى جاۋاپسىز قالعان. بۇگىندە وسى ماسەلەنى جۇيەلى تۇردە شەشىپ، كۇتۋ ۋاقىتىن ەكى ەسەگە قىسقارتتىق»، — دەيدى ورتالىق وكىلدەرى.

سونىڭ ناتيجەسىندە ەمحانالارعا قاجەتسىز جۇكتەمە ءۇش ەسەگە ازايىپ، پاسيەنتتەرگە كورسەتىلەتىن قىزمەت ساپاسى جاقساردى. ورتالىقتا گينەكولوگتار، پەدياترلار، تەراپيەۆتتەر، حيرۋرگتار، پسيحياترلار، ۋرولوگتار سىندى ءتۇرلى سالا ماماندارى جۇمىس ىستەيدى.

الماتىداعى سيفرلىق دەنساۋلىق ساقتاۋدىڭ دامۋى زاماناۋي تەحنولوگيانىڭ شىنايى ۇلگىسىنە اينالىپ، قالا تۇرعىندارىنىڭ دەنساۋلىعىن جاقسارتىپ، مەديسينالىق كومەكتى ءار ادامعا بۇرىنعىدان دا جاقىن ەتە ءتۇستى.