الماتى اكىمى دارحان ساتىبالدى توراعالىعىمەن قالانىڭ سىرتقى جانە ساۋلەتتىك جارىقتاندىرۋ جۇيەسىن جاڭعىرتۋ جونىندە كەڭەس ءوتتى. 2025 جىلدىڭ قورىتىندىسى قارالىپ، مىندەتتەر ايقىندالدى.

2025 جىلى جارىقتاندىرۋدى جاڭعىرتۋ جۇمىستارى 18 ۋچاسكەدە جۇرگىزىلدى، ونىڭ 12ء-سى اياقتالدى. بارلىعى 10،5 مىڭنان استام جاڭا شام ورناتىلدى، 4،2 مىڭنان استام قولدانىستاعى شام اۋىستىرىلدى جانە 4،1 مىڭ تورشەر شامدارى ورناتىلدى. بۇل ماگيسترالداردىڭ، تۇرعىن اۋداندارداعى كوشەلەردىڭ جانە جۇرگىنشىلەر ايماقتارىنىڭ جارىق دەڭگەيىن ەداۋىر ارتتىرۋعا مۇمكىندىك بەردى.

بۇرىن جارىقتاندىرىلماعان اۋماقتارعا ەرەكشە نازار اۋدارىلادى. باعدارلاما اياسىندا قوسىمشا 301 ۋچاسكە جارىقپەن قامتاماسىز ەتىلىپ، 2086 جارىق نۇكتەسى ورناتىلدى. ءبىرقاتار اۋداندا جۇمىس تولىعىمەن اياقتالدى، قالعاندارى بىتۋگە جاقىن.

جيىندا باعدارلامانى ىسكە اسىرۋدا "الماتى قالا جارىق" مكك جانە اۋدان اكىمدىكتەرى ەرەكشە ءرول اتقاراتىنى اتاپ ءوتىلدى. عيماراتتاردى ساۋلەتتىك جارىقتاندىرۋ ماڭىزدى باعىت بولىپ تابىلادى: بيىل قالانىڭ 100 الەۋمەتتىك ينفراقۇرىلىم نىسانى مەن ءىرى ساۋلەت قۇرىلىسىن جارىقتاندىرۋ تولىعىمەن ءبىتتى.

2026 جىلدىڭ سوڭىنا دەيىن جالپى ۇزىندىعى 339 كم 80-نەن استام كوشەدە سىرتقى جارىقتاندىرۋ جەلىلەرىن جاڭعىرتۋ جانە قوسىمشا 11 300 شام ورناتۋ جوسپارلانعان. سونداي-اق، جۇرگىنشىلەر ايماقتارىن جارىقتاندىرۋ جۇمىستارى جالعاسادى - 88،5 شاقىرىم تروتۋارعا 1500-دەن استام تورشەر شامى مەن 1000 كرونشتەين جوسپارلانعان.

دارحان ساتىبالدى جۇمىستاردى مەرزىمىندە ورىنداۋ، مونتاجداۋ ساپاسىن ارتتىرۋ جانە جۇيەلى باقىلاۋ قاجەتتىگىن اتاپ ءوتتى.

"تۇرعىنداردىڭ قاۋىپسىزدىگى مەن جايلىلىعىنا باسىمدىق بەرىلەدى. جارىقتاندىرۋدى جاڭارتۋ قالالىق ورتانىڭ ساپاسىنا تىكەلەي اسەر ەتەدى. بەلگىلەنگەن كەستەنى قاتاڭ ساقتاۋ، مەردىگەرلەرگە باقىلاۋدى كۇشەيتۋ جانە قازىرگى ماسەلەلەردى جەدەل شەشۋ قاجەت"، - دەدى اكىم.

سونداي-اق، ساۋلەتتىك جارىقتاندىرۋ باعدارلاماسىن كەڭەيتۋ، ءبىلىم بەرۋ مەكەمەلەرىنە، ەمحاناعا، اۋلاعا، مادەني وشاقتارعا نازار اۋدارۋ تاپسىرىلدى.