Jaqynda aıaǵy aýyr bir ápkemiz bosandy. Turmysy táýirleý edi. Sol úsh aılyq nárestesiniń ıtkóılekteri men syıǵa kelgen kástómshikterin syıǵa tartpaq bolyp saıtqa bas suqty.Sodan telefonǵa tynym bolmady. Senesiz be, habarlasqandardyń arasynda aıaq-qoly balǵadaı, shyrttaı kıingen, taqymynda temir tulpary bar, syr-symbaty kelisken kelinshekter de kezdesip jatty. Apaıymnyń bar oıy turmysy nashar, áleýmettik turǵydan az qamtylǵan bir otbasyna tartý etý. Bir tańqalarlyǵy suraýshylardyń deni «Rasymen de, aıyrbasqa eshteńe almaısyz ba?» deıdi. Bastapqyda ań-tań bolǵan edik «Aıyrbasy nesi?» -dep. Mánisin keıin túsindik.
Sóıtsek, sońǵy ýaqyttarda syıǵa tartam dep alyp aqy suraý keıbir tanymal jelilerdiń habarlandyrý berýshileri úshin sánge aınalǵan eken. «Kúrteshemdi 2 keli apelsınge, keýdeshemdi bir keli bananǵa aıyrbastaımyn, gıtaramdy 4 keli almaǵa alyńyz» syndy habarlandyrýlar joǵarydaǵydaı jelilerde órip júr. Shaqalaǵynyń syımaı qalǵan kıimin shemishkeniń maıyna, qumshekerge, kámpıtke, tosapqa, kartopqa aýystyram deýshilerdi de dál osy jerden kezdestiresiz. Tipti, asyl tuqymdy ıt-mysyǵyńyz bolsa, «býdandastyrý» arqyly da «táp-táýir» tıyn-tebentabýǵa bolady.Mundaıda tyshqannyń tezeginen teńge jasaǵan qaıran Qojekeńniń qylyǵy eske túsedi. Aıtpaqshy, joǵarydaǵy tórt aıaqtylardyń teksizderi tegin. Teksizden tekti týatynyna nanbaıtyndar ony qaıtsin. Jan baǵa almaı otyrǵan januıalar úshin tamaqqa ortaq jan qanshalyqty kerek?
Jalpy, buqara halyqtyń bulaısha qý qulqynnyń qulyna aınalýyna ne sebep? Álde, kók qaǵaz qunynyń kúrt ósýi, daǵdarystyń dymqyl lebin sezinip úlgergen halyqtyń tegin ketkenshe, tym qurysa tamaǵyma ketsin degen ishki nıet-peıilinen týǵan ba, bul? Arannyń ashylýy ashyqqandyǵynyń belgisi shyǵar bálkim?...
Baıaǵyda...Baıaǵyda deımiz-aý, kúni keshege deıin jurt kónetoz, tozyǵy jetken, tar bolyp qalǵan kıim-keshegin týma-týysqa, turmysy tómen otbasylarǵa taratyp beretin. Osylaısha eski kıim egesin tabatyn. Ári qoqysqa ketkenshe, kól-kósir saýapqa kenelgenge ne jetsin. Búgingi jaǵdaı basqasha. Jalpy bul rasynda jurttyń peıiliniń buzylǵanynan da habar beretindeı. Bulaı deýimizge negiz joq emes. Bir saǵattaı atalmysh jelide otyrǵanda baıqaǵanymyz, satýshy-aıyrbasshylardyń arasynda turmysy táýir jandar jeterlik. Tek toz-tozy shyqsa da bergisi joq.
Ekinshiden, bul-búgingi qoǵamnyń janaıqaıy.Qara halyqtyń áleýmettik hal-ahýalynan da habar beredi. Shetteı bala shaǵasy bar, asyraýshysynan aıyrylǵan qaltasy juqa, qoly qysqa jandarǵa kóldeı kómek bolmasa da jyrtyqqa jamaý, materıaldyq demeý.Turaqty jumysy joq, jaǵdaıy tomen aıaǵy aýyr analar úshin joǵarydaǵydaı jelilerdi jaǵalap aıyrbasqa alǵan anaǵurlym tıimdi. Tozyp qalmasa az da bolsa azyq-túlik, jemis-jıdektiń rólin taǵy atqarady. Tegin bere qalsa da kane. Ókinishtisi, mundaılarǵa joǵaryda aıtyp ótkenimizdeı áleýeti joǵarylardyń jaǵalasatyny.
Saltanat Álimqulova
Pikir qaldyrý