Qytaı qazaqstandyq astyqqa bólinetin kvotany jylyna 1 mln. tonnadan asyrýdy josparlaýda, - dep habarlaıdy «Qamshy» portaly QazAqparatqa silteme jasap.

Bul týraly búgin QR Aýyl sharýashylyǵy mınıstri Asyljan Mamytbekov málim etken.

«Fıto-sanıtarlyq qaýipsizdikke keletin bolsaq, bizdiń dándi daqyldardy Qytaıǵa eksporttaýdyń kedergilerin alyp tastadyq, buryn bıdaı men arpany qaptarǵa salyp qana elden shyǵarýǵa ruqsat berilgen bolsa, 2016 jyldan bastap, bul talaptar alynyp tastaldy. Endi dándi daqyldardy úıip aparýǵa bolady, bul óz kezeginde bizdiń astyqtyń eksportyn birshama ulǵaıtatyny sózsiz», - dep atap ótti ol mınıstrliktiń alqa májilisinde.

Onyń aıtýynsha, Qytaı men Qazaqstan úkimetteri qazaqstandyq astyqtyń eksportyn kóbeıtý maqsatynda birqatar kelisimderge qol jetkizgen.

«Qazaqstandyq astyqqa kvotany kóbeıtý boıynsha Qytaı úkimetimen kelisim jasaldy. Bastapqyda jylyna 500 myń tonnaǵa deıin ruqsat etilse, keıin 1 mln jáne odan da kóp tonnaǵa kvota berile bastaıdy. Demek, bizge jańa eksporttyq baǵyt ashylyp otyr, sondyqtan fıtosanıtarlyq qyzmet ónimdi jiti baqylap, onyń karantınǵa túsip qalmaýyn, óz mindettemelerimizdi oryndaý úshin úlken jumystar atqarýy tıis», - dep atap ótti A. Mamytbekov.

Onyń sózine qaraǵanda, mundaı kelisimder Qytaımen ǵana emes, ózge eldermen de jasalýy shart.

«Bizde satylymǵa shyǵara alatyndaı qaraqumyq, ózge de dándi daqyldardyń fıtosanıtarlyq sertıfıkattary joq. Sondyqtan fıtosanıtarıalyq komıtettiń basty mindeti - qýatymyzdy jónge keltirý», - dedi vedomstov basshysy.