Ońtústik Qazaqstan oblysynyń ákimi Beıbit Atamqulov Shymkent qalasyndaǵy «Túrkistan» saraıynda halyq aldynda esep berdi. Onda ákim ótken 2015 jyly óńirimizdiń ekonomıkalyq jáne áleýmettik salalarynda atqarylǵan jumystarǵa toqtalyp, aldaǵy bes jylda iske asyrylatyn jumys josparlary týraly baıandady. Esepti kezdesýge jergilikti turǵyndarmen qatar, QR Aýyl sharýashylyǵy mınıstri A.Mamytbekov pen QR Prezıdenti Ákimshiliginiń Memlekettik ınspektory J.Estenov qatysty,- dep habarlaıdy «Qamshy» portaly oblys ákimdiginiń baspasóz qyzmetine silteme jasap.

Jyldyq eseptiń ereksheligi sol, óńirimizdegi barlyq aýdan, qalalardaǵy turǵyndar ákim esebin onlaın rejıminde tyńdap, suraq qoıý múmkindigine ıe boldy.

Ótken 2015 jyly atqarylǵan jumystarǵa toqtalǵan óńir basshysy  ónerkásip salasynda 668,5 mlrd. teńgeniń ónimi óndirilip, 2014-shi jylmen salystyrǵanda 64,5 mlrd. teńgege artqanyn aıtty. Bul kórsetkish boıynsha bizdiń oblys respýblıkada 5-shi oryndy ıelenip otyr.  Al 2015 jyly jańa tehnologıalardy engizý nátıjesinde, óńdeý ónerkásibindegi eńbek ónimdiligi 1 adamǵa shaqqanda 48 myń AQSH doll. qurady. Bul  2014 jylmen  salystyrǵanda 18% artqan.

Sondaı-aq, aýyl sharýashylyǵynyń jalpy ónim kólemi 344,6 mlrd. teńgeni qurap, ótken jylmen salystyrǵanda 3,5% ósken.  Respýblıkada maqtanyń ónimi boıynsha 100% kórsetkishti Ońtústik Qazaqstan oblysy berip otyr. Al, baqshanyń ónimi boıynsha 65%, jemis-jıdek 36%, júzim 65% bizdiń oblysqa tıesili. Jalpy atqarylǵan júıeli jumystardyń nátıjesinde oblys joǵary kórsetkishterge qol jetkizip, respýblıkada aldyńǵy oryndardy ıelenip keletindigine toqtaldy.

Atqarylyp jatqan jumystardyń barlyǵy - Elbasynyń halyqqa jasaǵan Joldaýy aıasynda jáne memleket basshysy usynǵan Ult jospary - 5 ınstıtýsıonaldy reformany iske asyrýdyń 100 naqty qadamyn júzege asyrý sheńberinde iske asatynyn jetkizdi. 

Máselen, oblysymyzǵa tek ótken jyly 143 mlrd. teńge kóleminde ınvestısıa tartylyp, 58 jańa joba iske asyryla bastady. Olardyń  úshten biri (36%) sheteldik ınvestorlardyń qatysýymen.  Al, jalpy óńirge búgingi tańda shetel kapıtalynan 48,3 mlrd. teńge ınvestısıa tartylsa, bolashaqta shetel ınvestısıasynan bólek, otandyq kásipkerlerdi de tartý kózdelip otyr.

Investısıa tartýdyń taǵy bir tetigi – bul ındýstrıaldyq aımaqtar.

Ótken jyly qosymsha 3 ındýstrıaldyq aımaqtyń qurylysy aıaqtalyp, osy jyly taǵy 5-in iske qosý josparlanýda. Sonymen  óńirde jalpy 11 ındýstrıaldy aımaqty  qurap otyr.

Osy aımaqtarǵa ınvestısıa kólemi 145 mlrd. teńgeni quraıtyn 142 joba maquldanyp, olardyń 50-i tolyq iske qosylǵan.

Alǵashqy ashylǵan «Ońtústik» ındýstrıaldyq aımaǵynda ornalasqan kásiporyndar esebinen búgingi kúnde búdjetke salyq retinde 4,4 mlrd. teńge túsip, memlekettiń ınfraqurylymǵa jumsaǵan 6,8 mlrd. teńgeniń 65% búdjetke qaıtqan.          

Al kásipkerlikti qoldaý boıynsha ákimshilik barerlerdi azaıtýǵa kúsh salynyp jatyr. Osy maqsatta oblysta «bir tereze» prınsıpi boıynsha Kásipkerlerge qyzmet kórsetý ortalyǵy jumys isteıdi. Barlyq aýdan, qalalarda kásipkerlik mektepter ashylǵan. Sonymen qatar, Qazaqstan boıynsha bizdiń oblysta ǵana nesıe beretin «Maksımým» aımaqtyq-ınvestısıalyq ortalyq jumys isteıdi. Ol ortalyq – ekinshi deńgeıdegi banktterden paıyzdyq mólsheri tómen nesıe beredi.