Ál-Farabı atyndaǵy QazUÝ-da ýnıversıtet basshylyǵy men  IýNESKO-nyń Almaty qalasyndaǵy klasterlik búrosy dırektorynyń qyzmetin atqarýshy Andreı Shevelevtiń  kezdesýi ótti, - dep habarlaıdy «Qamshy» portaly ýnıversıtettiń baspasóz qyzmetine silteme jasap.

A.Shevelev myrza aldymen QazUÝ murajaıyn aralap, ýnıversıtettiń tarıhymen jáne jetistikterimen tanysty.  

Kezdesýdi ashqan ál-Farabı atyndaǵy QazUÝ rektory Ǵalym Mutanov búgingi tańda ýnıversıtet pen IýNESKO arasynda tyǵyz qarym-qatynas ornap, jemisti jumystar atqarylyp jatqandyǵyn atap ótti.  «Ýnıversıtetimizdiń alǵa qoıǵan maqsaty, bastamalary men damý strategıasy IýNESKO tarapynan únemi qoldaýǵa ıe bolyp keledi. Bul biz úshin úlken mártebe ári zor jaýapkershilik», – dedi ol. Sonymen qatar ol ýnıversıtette IýNESKO, halyqaralyq jýrnalısıka jáne qoǵammen baılanys kafedrasynyń 20 jylǵa jýyq jumys istep kele jatqandyǵyn aıtty.

Kezdesý barysynda basty úsh másele – bıoetıka, jýrnalısıka jáne turaqty damý boıynsha bilim berý baǵytyna basa nazar aýdaryldy.

«Bilim qoljetimdi bolmaǵan jaǵdaıda oqymaǵan adamdardyń ekstremıster men lańkesterdiń qataryn molaıta túsý qaýpi artady. Sondyqtan da biz bilimniń, onyń ishinde joǵary sapaly bilimniń mańyzdylyǵyn jete túsinemiz», – dedi Andreı Shevelev.

IýNESKO klasterlik búrosynyń bilim salasy boıynsha mamany Aıgúl Halafova: «Sońǵy 15 jyldyń ishinde, dálirek aıtqanda, 2000 jyldan 2015 jylǵa deıingi bilim berý júıesindegi damý men kemshilikter beınelengen IýNESKO-nyń statısıkalyq málimetteri boıynsha, Qazaqstannyń jetken jetistikteri kóz qýantady. Oǵan sizderdiń ýnıversıtetterińizdiń sińirgen eńbegi zor. QazUÝ – zamanǵa saı túrli salada kásibı mamandar daıyndaıtyn irgeli oqý orny», – dep pikir bildirdi.

Sondaı-aq kezdesýde BUU-nyń turaqty damý boıynsha jahandyq haby bolyp tabylatyn QazUÝ men BUU,  IýNESKO syndy beldi halyqaralyq uıymdar birlesip júzege asyratyn mańyzdy sharalar da qozǵaldy. Atap ótsek, lańkestik pen dinı ekstremızmge qarsy kúres boıynsha halyqaralyq konferensıa uıymdastyrý, Almaty qalasynan bastaý alatyn halyqaralyq «Beıbitshilik jáne kelisim marshyn» ótkizý jáne   «Nevada Semeı» halyqaralyq antıadrolyq qozǵalys prezıdenti Oljas Súleımenovtiń 80 jyldyq mereıtoıyna atsalysý syndy máseleler qaraldy.