28 qańtar kúni batys aımaǵy boıynsha Aqtóbede alǵash ret baýyr transplantasıasy jasalǵan bolatyn. Oblystyq klınıkalyq aýrýhanada Seýl ulttyq ýnıversıtetinen kelgen bilikti mamandarmen birge aqtóbelik hırýrgter 38 jastaǵy Altyngúl Ismaılovanyń baýyryn aýystyrǵan edi, - dep jazady «Aqtóbe» gazeti.

"Bundaı aýyr ota túri óńirde birinshi ret jasalǵandyqtan naýqas pen donordyń densaýlyǵyna alańdaýshylyq bildirgender kóp boldy. Tipti redaksıaǵa qońyraý shalǵandar bar. Osy rette biz Altyngúl men oǵan donor bolǵan inisi Ádilbek Kýrazovtyń hal-jaǵdaıyn surap, oblystyq aýrýhanaǵa bardyq" - deıdi basylym tilshisi.

Ota. Úmit. Senim

Dárigerler Altyngúldi dúısenbi kúni jan saqtaý bólmesinen palataǵa shyǵarypty. Biz barǵanda Altyngúl basyn kóterip otyr eken. Ózin jaqsy sezinetinin aıtty. Altyngúl bala kezinde sary aýrýdyń aýyr túrine shaldyǵyp, uzaq ýaqyt emdeledi. Keıin janǵa batyp aýyrmaǵandyqtan densaýlyǵyna mán bermepti. Búginde baýyr dertine shaldyǵýyna osy syrqat sebep boldy ma dep oılaıdy. Ótken jyldyń tamyz aıynda baýyry syr bere bastaıdy. Dárigerler teksere kele baýyr sırrozy degen dıagnoz qoıady. Jedel járdem jáne oblystyq aýrýhanalarǵa jatyp em alyp kóredi. Biraq nátıje bolmaıdy. Densaýlyǵy kún ótken saıyn nasharlaı beredi. Tamaqqa tábeti joıylyp, kez kelgen ıisten júregi aınyp qusady. Dene terisi qaraıyp, álsireı bastaıdy. Aýyrsynýdy basýǵa dári-dármektiń de kúshi kelmeıdi. Dárigerler baýyr kúrdeli ózgeriske ushyrap, sırrozdyń sońǵy satysyna aýysqan kezde ony aýystyrmasa bolmaıtynyn eskertedi. Altyngúl osydan keıin donor izdeıdi. Úlken apasy baýyryn bermek bolǵanymen, sáıkes kelmeıdi.

— Aldaǵy ómirimdi, toǵyz jastaǵy ulymdy oılaǵanda júregim aýyrdy. Týǵan baýyrlarymdy qıyn jaǵdaıǵa qaldyrǵym kelmedi. Barlyǵynyń otbasy, bala-shaǵasy bar. Olarǵa «donor bol» dep aıtýǵa júregim daýalamady. Biraq osy sharasyz sátte inim Ádilbek erlik tanytty. Meniń suraýymsyz ózi donor bolýǵa kelisti. Ýaqyt ótkizbeı medısınalyq tekserýden ótip, dárigerlerdiń talabyn buljytpaı oryndady. Osydan keıin úmit oty oıanyp, otaǵa daıyndala bastadym. Dárigerler «erteń ota jasaıdy» degen kúni túnimen kóz ilmeı shyqtym. Alladan barlyǵynyń sátti ótýin suradym. Ásirese inimniń jaǵdaıyna qatty alańdadym. Otbasyn qurmaǵan, deni saý azamattyń aldaǵy ómiri qalaı bolady, ota qalaı jasalar eken dep qatty qınaldym. Ota ústelinde jatqanda da Alladan birinshi inimniń tileýin tiledim, — deıdi Altyngúl.

Eki brıgadanyń qatysýymen jasalǵan ota jeti saǵatqa sozylady, ıaǵnı Ádilbekke úsh, Altyngúlge tórt saǵat boıy ota jasalady.

— Biraq qansha qoryqsam da kóńilimde bir úmit boldy. Sebebi buǵan deıin oblystyq densaýlyq saqtaý basqarmasynyń basshysy Áset Qalıev bastaǵan hırýrgter qaıta-qaıta kelip, meniń jaǵdaıymdy bilip otyrdy. Ota álemge belgili koreıalyq hırýrgtyń qatysýymen jasalatynyn aıtyp, júregime senim uıalatty. Dárigerlerdiń jyly sózi kóńilime demeý boldy.

Allaǵa shúkir, qazir ózimdi jaqsy sezinemin. Denem aǵaryp, birtindep tamaqqa da tábetim ashyla bastady. Árıne, bundaı ota jasatý ońaı emes, oń jaq qabyrǵa tusym áli aýyrady. Dárigerler jıi kelip, jaǵdaıymdy bilip otyrady, — degen Altyngúl áýeli Alla, sodan keıin bilikti hırýrgterdiń arqasynda aman qalǵanyn, densaýlyǵyn kúni-túni qadaǵalap júrgen oblystyq densaýlyq saqtaý basqarmasynyń basshysy Áset Qalıevke, hırýrgter Erlan Sultangereev pen Janádil Álmyrzaulyna alǵysy sheksiz ekenin, olardyń otbastaryna amandyq, denderine saýlyq tileıtinin aıtyp, aǵynan jaryldy.
Naýqasty baqylaýyna alǵan hırýrg Janádil Álmyrzauly Altyngúldiń densaýlyǵy qazir jaqsy, qan quramyndaǵy bılırýbın men holesterın mólsheri qalypty ekenin aıtty.

— Aǵzanyń ózge múshelerine qaraǵanda baýyrdyń qalpyna kelýi tez. Ota sátti ótip, naýqas óz densaýlyǵyn kútken jaǵdaıda baýyr tez ońalady. Baýyryn almastyrǵan adam eń birinshi kezekte qatań dıeta ustaýy tıis. Maıly, ashshy, tuzdy jáne holesterıni az taǵamdardy tutynýy qajet. Biz Altyngúldi teksere kelgen kezde onyń S gepatıtine shaldyǵyp, sońy baýyr sırrozyna ushyraǵanyn bildik. Sırroz degenimiz — baýyrdyń irip, jaramsyz bolyp qalýy. Al S gepatıti kóp jaǵdaıda qan arqyly juǵady jáne juǵý joly ártúrli. Tis emdetkennen, denege sýret saldyrǵannan nemese ózge de jaǵdaılarda juǵýy múmkin. Sondyqtan árbir adam óz densaýlyǵyna nemquraıly qaramaýy kerek, — deıdi hırýrg.
Dárigerdiń aıtýynsha, Altyngúl kún ótken saıyn jaqsaryp keledi. Kelesi aptada aýrýhanadan shyǵady. Osydan keıin ol turaqty túrde gepatologtyń baqylaýynda bolady.

«Apamnyń densaýlyǵyn oıladym…»

Apasyna donor bolǵan Ádilbek Kýrazov ótken aptada aýrýhanadan shyǵarylypty. Qazir densaýlyǵy jaqsy. Tipti kólik te júrgizip júr.
Ádilbek — úıiniń kenjesi. Ózinen úlken tórt apasy bar. Altyngúl ekeýiniń shesheleri bir. Apasy aýyryp, sońǵy kúnderi jaǵdaıy nasharlaı bastaǵanda Ádilbek qatty qınalypty.

— Eshkimniń keńesinsiz, tipti apamnyń da ruqsatynsyz kómektesýdi oıladym. Sebebi menen basqalarynyń barlyǵy otbasyly, kishkentaı bópeleri bar. Bir apamnyń aıy-kúni jetip otyr. Sondyqtan osyndaı qıyn kezeńde eshteńege alańdaǵanym joq, tek qana apamnyń densaýlyǵyn oıladym. Meniń bul qadamyma úreımen qaraǵandar da boldy, — deıdi Ádilbek.

Ota ústelinde jatqanda Ádilbektiń boıynda aıtarlyqtaı qorqynysh bolmapty, tek qana Alladan apasynyń aıaqqa turyp ketýin tileıdi.
Ádilbek qıyn kúnderdiń umytylyp, bári jaqsy bolatynyna senedi.

— Otadan keıingi kúnder óte aýyr boldy. Biraq shydaýǵa tyrystym. Eki aptadan artyq ýaqyt aýrýhanada jattym. Qazir, shúkir, azdap oń jaq qabyrǵamnyń asty aýyratyny bolmasa, jaǵdaıym jaqsy, — deıdi ol.

Ádilbek bıyl 26 jasqa tolady. Sátin salsa jazda otbasyn qurmaq. Qazir bolashaq jary Gúlden anasyna qolǵabys etip, Ádilbektiń densaýlyǵyn kútip júr. Qıyn kezderde Ádilbektiń áriptesteri de qoldaý bildiripti. Qaladaǵy №6655 áskerı bóliminiń qyzmetkerleri qarjylaı kómek berse, feldsher Nurlan Quttybaev Ádilbektiń densaýlyǵyn qadaǵalap otyrady.
— Maǵan qoldaý bildirgen barlyq azamattarǵa alǵysym sheksiz. Ásirese, oblystyq densaýlyq saqtaý salasynyń qyzmetkerlerine rızamyn. Aýrýhananyń ishi muntazdaı taza, dárigerlerdiń kózqarasy erekshe. Barlyǵy báıek bolyp júr, — deıdi ol.

Dárigerler Ádilbekke densaýlyǵyn kútip júrse, jarty jyldan keıin baýyry qalypqa keletinin aıtypty. Qazir ol ýaqytynda dárisin iship, ózine salmaq salmaýǵa tyrysady.

«Aqtóbe» gazeti