Forbes jýrnaly ádettegideı álemdegi mıllıarderlerdiń tizimin jarıalady, - dep habarlaıdy «Qamshy» portaly.

Basylym ótken jylǵy ǵalamdyq daǵdarys, munaı baǵasynyń tómendeýi men dollar baǵamynyń nyǵaıýy mıllıarderler qatarynyń azaıǵanyn aıtady. 2016 jylǵy mıllıarderler tizimine barlyǵy 1810 adam ilingen. Baılar tizimin ádettegideı Maıkrasoft kompanıasynyń jetekshisi Bıll Geıts ($75 mlrd) bastap tur. Osy rette byltyrǵy tizimge 1826 adam kirgenin aıta ketken jón. Al, tizimniń munsha adamǵa qysqarýy 2009 jyldan keıin birinshi ret bolyp otyr eken.

Álem mıllıarderleri qataryna qazaqstandyq bes azamat engen. Tizimdegi 771-orynǵa turaqtaǵan qazaq mıllıarderi Bolat Ótemuratovtyń jaǵdaıyn basylym $2,3 mlrd dep baǵalaǵan eken. Ol byltyrǵy jyly $2,6 mlrd-pen álemdik reıtıńte 714-oryndy baǵyndyrǵan edi.

Prezıdent N. Nazarbaevtyń ortanshy qyzy Dınara Qulybaeva men kúıeý balasy Tımýr Qulybaev 906-orynǵa turaqtaǵan. Olardyń árqaısysynda $2 mlrd-tan bar kórinedi. Byltyr bul jup $2,1 mlrd-pen álemdik reıtıńte 894-oryndy ıelengen edi.

ERG Eýrazıalyq tobynyń basshylarynyń biri Álıjan Ibragımov bir jyl ishinde $700 mln. joǵaltyp, alǵashqy myńdyqtan shyǵyp qalǵan. Ol $1,5 mlrd baılyqpen bıyl 1198-orynǵa jaıǵasypty. Álıjannyń byltyrǵy kórsetkishi $2,2 mlrd (847-oryn) bolatyn.

«Qazaqmys» kompanıasynyń qojaıyny Vladımır Kım de $1,5 mlrd-pen 1198-oryndy qanaǵat tutqan. Ótken jyly onyń baılyǵy $1,8 mlrd dep baǵalanyp, tizimniń 1054-oryny buıyrǵan edi.

Basylym qazaqstandyq mıllıarderlerdiń bir jyl ishinde joǵaltqan qarajatynyń jalpy jıyntyǵy $1,5 mlrd ekenin aıtady.