1992 jylǵy maýsymnyń 4-de táýelsiz Qazaqstannyń jańa memlekettik rámizderi alǵash ret bekitildi - bul kún el tarıhynda jańa memlekettik rámizder kúni retinde máńgi este saqtalady. Bıyl Elbasy N.Nazarbaevtyń Jarlyǵymen «Qazaqstan Respýblıkasy Memlekettik jalaýy týraly», «Qazaqstan Respýblıkasy Memlekettik eltańbasy týraly», «Qazaqstan Respýblıkasy Memlekettik ánuranynyń mýzykalyq redaksıasy týraly» Zańdar kúshine engenine 20 jyl tolyp otyr..

Memlekettik rámizder - memlekettiń myzǵymas negizderiniń biri. Elbasy Nursultan Nazarbaevtyń 2007 jylǵy 4 maýsymdaǵy «QR Prezıdentiniń 1968 jylǵy 20 qańtardaǵy «Qazaqstan Respýblıkasyndaǵy kásibı jáne basqa da merekeler týraly» №382 Jarlyǵyna tolyqtyrýlar engizý týraly» № 337 Jarlyǵyna sáıkes bul kún Merekelik rámizder kúni retinde atap ótiledi.

Memlekettik Tý, Memlekettik Eltańba jáne Memlekettik Ánuran memlekettiń negizgi rámizderi sanalady.

Kógildir tústi týymyz ben ortasynda shańyraq beınesindegi altyn sáýleli kún ornyqqan eltańbamyz búkil álemge Qazaqstan Respýblıkasy atalatyn jańa táýelsiz Memleket beınesin pash etti. 1992 jyly sýretshi Sháken Nıazbekov salǵan Memlekettik tý bekitildi. Egemen Qazaqstannyń búgingi Eltańbasy eki tanymal sáýletshi Jandarbek Málibekov pen Shota Ýálıhanovtyń qyrýar eńbeginiń jemisi bolyp tabylady. 1992 jyly respýblıkamyz ánurannyń áni men mátinine konkýrs jarıalandy. Tuńǵysh Qazaqstan ánuran ániniń avtorlary - Muqan Tólebaev, Evgenıı Brýsılovskıı men Latıf Hamıdı.

2006 jylǵy qańtardyń 6-da Jumeken Nájimedenov pen Nursultan Nazarbaevtyń sózine jazylǵan Shámshi Qaldaıaqovtyń «Meniń Qazaqstanym» áni Qazaqstan Respýblıkasynyń jańa ánurany bolyp bekitildi.

Memlekettik rámizder týraly konstıtýsıalyq zańda «QR azamattary, sondaı-aq respýblıka aýmaǵyndaǵy tulǵalar Qazaqstan Respýblıkasynyń memlekettik rámizderin qurmetteýge tıis» dep belgilengen.

Memlekettik rámizder kúni - Qazaqstandaǵy múlde jańa meıram, áıtse de ony qazaqstandyqtar asqan patrıottyq sezimmen merekeleıdi.

«Qazaqparat»