Jalǵasy. Basy myna siltemede.      

      İH

Máńgilik oryn tepti Shymqaladan,

Shyryldap qazaq úshin týǵan adam.

Kókjaldaı ún shyǵarmaı kóz jumypty,

Qasaryp tistilerge julmalaǵan.

Tússe de ımperıa tepkisine,

Jasyryp jan azabyn ketti ishine.

Tapsyryp atajurtyn artyndaǵy,

Alashtyń adal týǵan tektisine.

Birtýar ondaı qazaq bul ómirge,

Qaımyqpaı qarsy shapqan «Kremlge»!

Beıneti ózimenen birge ketti,

Beınesi  qaldy eliniń júreginde!

Bahadúr babalardyń jolyn jalǵap,

Ol ketti ulan baıtaq jerin qorǵap.

Ultyna tirek bolǵan ulandardyń

Tilegi árqashanda oryndalmaq.

Yqtyryp alasurǵan kóksoqqandy,

Jeriniń tutastyǵyn saqtap qaldy.

Aıbatty arystandaı azamatyn,

Keń dala kúrsinedi joqtap máńgi!

Razy atameken batyr ulǵa,

Dıýdy jeńip shyqqan aqyrynda.

Ketkende alty oblys qaıter edik,

Alpaýyt Reseıdiń taqymynda?

Túskende tar kezeńde eregeske,

Qorǵaıtyn týǵan elin er emes pe?!

Saryarqa saǵym oınap shalqyp jatqan,

Kún saıyn Táshenevti salady eske!

Tarıhı kýá bolyp erligine,

Aǵyttyq jyr tıegin endi, mine.

Úlesi qosyp ketken ushan-teńiz,

Halqynyń myzǵymaıtyn Eldigine!

Qıanat qarańǵyǵa jasyryndy,

El úshin ólgen erdiń basy qundy.

Janary jumylǵansha qaıran sabaz,

İshinen tyndy kóksep osy kúndi!

Qıýyn keltirýge Táńir epti,

Muratqa ol jetpegen eli jetti.

Rýhy razy bop jatqan shyǵar,

Túgendep tórt qubyla – tóńirekti!

Ótkizgen eleginen san súzginiń,

Kórgenbiz saıasattyń arsyzdyǵyn.

Oınatqan áńgirtaıaq tóbemizde,

Ózine bermeı eldiń óz tizginin.

Turǵanda arman gúldep, úmit kóktep,

Tektiniń qısyny joq quryp ketpek.

Qısaımaı aýzy-murny kim aıtady,

«Qazaqta kósh bastaıtyn jigit joq» dep?

Jarasqan tal besigi keń dalaǵa,

Baqyttyń qusy qansha qondy anaǵa.

Amanda asyl kindik, altyn qursaq,

Kósheli ul týmaıtyn el bola ma?

Dúnıe tóńkeriler tolqyndasa,

Kim týdy Abylaıdy el týmasa?

Býaz bult býyrqanyp býsanady,

Naızaǵaı jasyn atyp jarqyldasa.

Ezderdi eshkim joqtap suramaıdy,

Erlerdiń tikken týy qulamaıdy.

Dalanyń dara bitken danyshpany,

Kim týdy qazaq týmaı uly Abaıdy?!

Tereńnen sóz shyqpaıdy tolǵanbasa,

Bir asyl bir asylǵa jalǵanbasa.

Alashtyń armanda ótken ardageri,

Álıhan qaıdan týdy el bolmasa?!

Ótkerdik údeı soqqan daýyldardy,

Arqalar erdiń júgi aýyr máńgi...

Aıtaıyn qaısy birin arystardyń,

Kim týdy qazaq týmaı Baýyrjandy?!

Alqynbaı órge súırer kóshin anyq,

Bul qazaq ul týmasa nesi halyq?

Kartasyn Qazaqstan kórgen saıyn,

Tolǵanam Táshenevti esime alyp...

Kúnderge kóz jibersem alys qalǵan,

Aqmola árkimderge qonys bolǵan.

Táýelsiz Astanaǵa tańyrqaıdy,

Keshegi qaıran dala janyshtalǵan.

Kezinde selt etpegen myna kópke,

Keýdeńe zapyran bop tunady ókpe.

Dalasyn  keskiletpeı qorǵap qalǵan,

Qaryzdar búkil qazaq Jumabekke!

Jer úshin uıqysyz tań atyrdy elim,

Urpaqqa úlgi eteıik batyr jolyn.

Ózi aman alyp qalǵan alty birdeı

Oblysta bir aýdan joq atynda onyń...

Ótkenniń búginge de qatysy bar,

Erlerdiń elin súıgen aty shyǵar.

Qasqaıyp Astananyń qaq tórinde,

Turýǵa eskertkishi qaqysy bar!

Qulasa qyzmetinen kúni batyp,

Aty ósher talaılardyń tiri jatyp.

Mánsaptyń quly bolý – zor qasiret,

Ultynyń uly bolý – uly baqyt!

Nesipbek Aıtuly

Memlekettik syılyqtyń laýreaty