Qyzylordada áleýmettik jelide arandatýshylyq sıpatqa ıe sýret taratqan adam qamaýǵa alyndy, - dep habarlaıdy Qamshy.kz. Qyzylorda oblystyq İİD baspasóz qyzmetine silteme jasap.
1 mamyrda áleýmettik jelilerde «Qyzylorda qalasyndaǵy narazylyq aksıasynda qaıtys boldy» delingen qan josa bolǵan er adamnyń máıitiniń fotosýreti tarap ketken bolatyn.
Atalmysh derek boıynsha QR Qylmystyq kodeksiniń 274-babynyń 2-bóliginiń 3-tarmaǵy boıynsha sotqa deıingi tergep-tekserý jumystary bastalǵan.
«Oblystyq İshki ister departamenti atalǵan aqparat shyndyqqa saı kelmeıtinin, jalǵan ári arandatýshylyq sıpatqa ıe ekendigin anyqtady. Sonymen qatar, bul fotosýret ózge memlekette bolǵan oqıǵany beıneleıdi ári Qazaqstan Respýblıkasyna eshqandaı da qatysy joq», - delingen habarlamada.
Jedel-izdestirý jumystary barysynda atalǵan aqparatty Almaty qalasynyń M.Jakaýov esimdi turǵyny taratqany anyqtalyp, azamat İshki ister departamentine jetkizilip, odan kúdikti retinde jaýap alyndy. Jaýap alý barysynda kúdikti azamat óz kinásin moıyndap otyr.
Sol kúni-aq kúdikti azamat Qylmystyq is júrgizý kodeksiniń 128-babyna sáıkes Qyzylorda qalalyq İİB Ýaqytsha ustaý abaqtysyna qamaldy. Qazir sotqa deıingi tergep-tekserý jumystary jalǵasýda.
