Qamshy.kz redaksıasyna Kereký óńirindegi bir oqyrman hat joldap, sońǵy ýaqytta qoǵamda qyzý talqylanyp júrgen «Ninety One» tobyna qatysty pikirin bildiripti. Hat ıesi ánshi jigitter men onyń jetekshisi Erbolat Bedelhanǵa qatysty aıtylyp jatqan toqsan túrli synnyń tobyqtaı túıini ishtarlyq pen kórealmaýshylyq degen qorytyndy shyǵarǵan. Portaldyń ózge oqyrmandaryn da sol hatpen tanystyrýdy jón kórdik.

Qurmetti «Qamshy.kz» ujymy! Sizderdiń portaldaryńyzda birneshe ret ánshi, prodúser Erbolat Bedelhan men onyń «Ninety One» toby týraly synı maqalalar jarıalandy. Soǵan baılanysty óz oılarymdy jarıalaýlaryńyzdy suraımyn.

Qazaq estradasyna «Ninety One» toby shyqqaly ondaǵy jigitter men top jetekshisi Erbolat Bedelhanǵa qatysty synı pikirler qarsha borady. Óner bolǵan soń, shyǵarmashylyq bolǵan soń synsyz bolmaıdy. Qaıta syn ónerdi órge súıreıtin kúsh. Alaıda, «91» tobyna qarata aıtylyp júrgen aıyptardy ádil syn deı alamyz ba? Árıne, joq. Olaı deıtinimiz, ánshilerdi synaýshylar olardyń ánderine, án mátinderine, bılerine qatysty birde bir tushshymdy syn aıtpady. Tek, kıgen kıimderin, shash úlgisin, keıbir qımyldaryn ǵana jerden alyp jerge salýda. Sondyqtan, ol aıtylǵandardy syn dep qabyldaǵan durys emes dep oılaımyn.

Ánshi jigitterge qatysty qazaq óneriniń aqsaqaly Nurǵalı Núsipjanov, ánshi apalarymyz Roza Rymbaeva, Maqpal Júnisova syn aıtyp jatsa jarasar edi. Alaıda, «ult», «din», «dástúr» uǵymdaryn jeleý etip tas atýshylardyń barlyǵy derlik ónerden alys adamdar bolyp otyr. Ánshiler qaýymy din máselesine aralaspaıdy ǵoı osy. Sol sıaqty árkim ózi biletin ispen aınalysyp, biletin sózin aıtpaı ma? Joq, kóp shýyldaq arzan abyroı jınaǵyshtardyń aıtaǵyna erip kete bardy. Áıtpese, «Ninety One» tobynyń myna áni mánsiz, myna áni urlanǵan, anabir ániniń sózi mynadaı talaptarǵa saı emes» degen pikir estimedik. Kıgen kıimin synaımyz. Aınalaıyndar-aý, sahnaǵa qara kostúm-shalbarmen shyǵatyn ánshilerden jalyqpadyńdar ma? Óner degen erkindik emes pe? Bul jerde dinı, fılosofıalyq oı-tolǵamdardy toǵyta berý orynsyz. Óner adamdary sahnada kıgen kıimin bylaıǵy ýaqytta da kıedi, sán úlgisin qalyptastyrady. Tek sahna sańlaqtary ǵana emes, aqyn, jazýshy, sýretshilerge qarańyzdar.

Al, sol synshylar toptyń qysqa merzim ishinde óner sahnasynan óz oryndaryn myqtap ıelengeni, tyńdaýshynyń, ásirese, jastardyń zor mahabbatyna bólengenin nege kórmeımiz?

Endi Erbolatqa kelsek. Erbolatty men óte jaqsy tanıtyn, jastaıynan aralasqan adammyn. Áńgimeni áriden bastasaq, Erbolat meni Qazaqstanǵa ózi arnaıy shaqyrǵan, munda kelgende tanys eshkimim joq boldy. Elge sińisip, úırenisip ketýime kóp kómektesti. Baspanamdy rettep berdi, jumys máselesin sheshýge de kóp septigin tıgizdi. Erbolattyń kómegi tıgen adam bir men emestigime de senimdimin. «Aıtyp bergen sadaqanyń saýaby ketedi» deıdi ǵoı qazaq. Amal joq, Erbolattyń erge tán sol isin aıtýǵa týra keldi. Erbolat el aıtyp júrgendeı ulttyq qundylyqtardan qol úzgen, «máńgúrt», «shirigen jumyrtqa» bolsa, arǵy bettegi aǵaıynǵa mundaı qamqor kóńil tanytar ma edi? «Orda» toby Qazaqstannyń óner sahnasynda áldeqashan óz bıigin baǵyndyrǵan. Men sıaqty qazaqtarǵa Erbolat mensinbeı qarasa da eshkim renjimes edi. Alaıda, ol azamattyǵyn bıik qoıdy bárinen. Áli de solaı dep senemin.

Qazaq qoǵamy ne úshin jańa úlgidegi ónerpazdarǵa qarsylyq tanytyp jatyr? Áriden oılasaq, qoǵam ol topqa, ondaı ánshilerge qarsy emes. Jekelegen adamdar, múddeli toptar, keritartpalar sondaı pikir qalyptastyrýda. Bar bolǵany sol. El úshin bir kókjal týsa, oǵan shabatyn tórt ıt qosa týady. Myna jerde de sol. Ónerimen oza almaǵan, talanty asyp túspegender básekelestikti baqtalastyqqa aınaldyrady. Ne ózi eshteńe bitirmeıdi, ne qolynan is keletinderdi kóre almaıdy. Ony osy «Ninety One» týraly daý-damaı dáleldedi.

Redaksıaǵa hat jazýdaǵy bar aıtpaǵym osy. Qazir oqshaý oı aıtyp, shyndyqty sóz etseń el jeksuryn jasaıdy. Kóptiń aty kóp. Aq-qarasyn ajyratyp jatpaıdy. Biraq, solaı eken dep úndemeı otyrýǵa taǵy bolmaıdy ǵoı. Al, endi «Erbolat qyzteke eken. Anandaı eken, mynandaı eken» degen sózder óner túgili adamdyqqa jat aıyptaýlar. Qalasa Erbolat sondaı áńgime taratqandardy zań organdary arqyly anyqtap, jaýapqa tartýyna da bolady. Zań Erbolattyń jaǵynda. Adamnyń abyroıyn aıaqqa taptaýǵa esh jerde jol berilmeıdi. Qazaqstanda da solaı. Men zamandastarymnan (álgi «dástúr janashyrlarynyń» aıtaǵyna erip júrgen jastar az emes( daýryqpa áńgimeni odan ári qozdyrmaýdy, negizsiz aıyptaýlardy ońdy-soldy taratpaýdy, salmaqty bolýdy ótinemin.

Murat Eljan

Pavlodar oblysy Ekibastuz qalasy