Áıel – názik jandy. Asyp bara jatqan fızıkalyq kúshi joq, biraq rýhty, shydamdylyǵymen myqty. Úı jınaıdy, ydys-kir jýady, bala týady, balaǵa qaraıdy, aýyrsa emdeıdi, polıklıkanalardyń tabaldyryǵyn tozdyrady, alystan azyq-túlik tasıdy, tamaq jasaıdy, qonaq kútedi, qoqys tógedi... Bitpeıtin usaq-túıek sharýalar tizimi. Kózge kórinbeıtin dúnıeler. Munyń bári der kezinde istelmese haos bolady, istelse qalypty jaǵdaı. Sol sebepti de dúnıedegi eń aýyr jumys – 24 saǵat úıde otyrý, osy bir bitpeıtin istermen aınalysý. Keıde tań qalamyn osynyń bárine áıelder qalaı úlgeredi, sharshamaıdy ma, jalyqpaıdy ma dep. Sóıtsem, úlgerýge tyrysyp, sharshap, súrinip-qabynyp, ábden zerigedi eken. Biraq amal joq. Kóný kerek, tózý kerek.
Ol – áıel. Ol – jar. Ol – Ana. Endeshe, áıel basyna tóngen aýyrtpalyq bulty azdaı áıelge kún nuryn shashý túgili taıaq astyna alyp, naızaǵaı qaharyn tógip, kózine kók shybyn úımeletetin erkekter bar. Negizi úıdegi zorlyq-zombylyq –búgingi kúni órship turǵan ózekti másele. Joǵarydaǵy jazǵan tirlikterdi kún saıyn atqaryp júrgen áıeldiń shynymen de qyryq jany bar. Biraq ol uryp-soǵýǵa shydaýǵa mindetti emes.
Biz uldarymyzǵa durys tárbıe bermeımiz-aý. Biz erkekterdi tóbege kóteremiz de áıeldi tek 8 naýryzda gúl syılap, qydyrtyp, mahabbatymyzǵa bólep, eleımiz. Árıne, keıbireýler bul erkektiń ózine de, áıeldiń ózine de baılanysty dep qarsy shyǵady. Ol da bar, sózsiz. Degenmen, qoǵamda áıel bolǵasyn bárine kónýi qajet degen uǵym qalyptasqan.
Otbasyn saqtaıtyn áıel (kóbinese), bala ákesiz óspesin dep shyj-byj bolatyn áıel (áıel), búgin ne jeımiz, etti qaıdan satyp alamyn, qandaı aqshaǵa alamyn, aqshany qalaı jetkizemin dep qınalatyn da áıel, balama kıim ápersem ǵoı dep qynjylatyn áıel (kóbinese), qonaq kelse aldaryna qoıar dámdi asym joq dep qysylatyn da áıel. Otbasyna qatysty búkil jaýapkershilikti alyp júrgen áıel (kóbinese), qysqasy. Erkekter eń bolmaǵanda olarǵa qol kótermese eken. Mahabbat kelmeske ketse syılastyqpen ómir súrýge tyryssyn. Syılastyq qalmasa dushpanǵa aınalmaı «bostandyqqa» jibersin. Ashýly, yzaly, sharshaǵan áıelden qaıbir urpaq dúnıege keledi?! Áıeldi baqytsyz etý, óz raýshan gúlin sorǵa shydamdy shóp-shalamǵa aınaldyrý qanshalyqty erkekke jarasymdy?!
Jazıra Baıdaly
