15 qazan, ánshi, sazger, Qazaqstanǵa eńbek sińirgen mádenıet qaıratkeri Tursynǵazy Rahımov aramyzda bolǵanda 65 jasqa tolar edi. "Júrekteri aýyrmaıtyn", "uly dalanyń balasy bolyp alǵan" nemese erkek sıaqty kıine almaı júrgen ánshisymaqtar túshkire qalsa urandatyp jazatyn BAQ, Osynaý mereıli kúnnen apta ótse de Tursynǵazy Rahımov týraly jaq ashpady. M.Maqataev atyndaǵy syılyqtyń ıegeri. Respýblıkalyq deńgeıdegi birtalaı óner baıqaýlarynyń laýreaty Tursynǵazy Rahımov bıyl 26 aqpanda dúnıeden qaıtqan bolatyn. Onyń ómirden ozarynan eki apta ǵana buryn, qurdasy-dosy, ǵalym Tursyn Jurtbaı  "Egemen Qazaqstanda"  "Suńqardyń samǵaýymen án ozdyrǵan" atty arnaýly maqala jazǵan edi. Rahımovty eske alyp, "Qamshy" portaly oqyrman nazaryna T. Jurtbaıdyń maqalasy men kompozıtordyń kózi tirisindegi "Sábı bolǵym keledi" shyǵarmashylyq kesh​in  usynady. 

Árbir jyldyń aqpan aıynda sondaı bir tabıǵı qushtarlyqpen ótetin Muqaǵalıǵa arnalǵan ádebı, án keshterinen soń óz basym keremet bir shamyrqanǵan kúıge túsemin. «Esimde, bári esimde, bári esimde», dep qyran minezdi Muqańnyń ózi aıtqandaı, bıyl da Almatydan aýylǵa deıin shabytty sharpýmen ótip jatqan saltanattarmen ózderi de «aqqýdyń qanatyna óleń jazyp júrgen» Júrsin men Nesipbek ótkizgen keshten soń «aspandaǵy bultpen aralasa tóńkerilgen» kóp dúnıe kóz aldymnan kóship ótti. Aqyndardyń aqıyǵyna arnalǵan sol saýyqtardyń barlyǵynda ánshi Tursynǵazy Rahımovtyń kem degende tórt-bes ániniń oryndalǵany oıǵa oralyp, sol ánderdiń shyǵý tarıhyna kýá bolǵan sátterim eles­tep ótti. Sonyń ishinde, 1976 jyly dúnıeden jańa ozǵan aqynnyń óksigi basylar-basylmasta, armanyn ánge orap jamıǵatyn jubatqan «Sábı bolǵym keledi» degen qýatty, shymyr, shynaıy daýys ózge áserdi yǵystyra jad shymyldyǵyn asha berdi. Ol daýys – qazir qazaqtyń án aspanynda suńqardyń samǵaýymen án ozdyryp júrgen qıaq qanatty Tursynǵazynyń, kádimgi ózimiz «án túgel» dep erkeletip júrgen, áli de sábılikten arylmaǵan Tursynǵazy Rahımovtyń bala daýysy edi.

Muqaǵalıdyń qaıtqanyna da, sol «Sábı bolǵym keledi» ániniń qazaq as­panynda sharyqtaǵanyna da 40 jyl, sol ánniń týýyna sebepker bolǵan qos sábı – qos Suńqar da qazir 40 degen jas­tyń etegin basty. Al Tursynǵazynyń ózi ata qyrandaı dúr silkinip, týǵan tuǵyrynda qomdanyp, saıyn dalanyń san qıyryndaǵy shákirtteriniń alǵaýymen, sodan beri Muqaǵalıdyń sózine jazylǵan 35 ániniń keshin, saǵym men saǵynyshy aralas saýyq keshin ótkizýdiń qamynda qazir. «Aqqýdyń qanatyna óleń jazǵan» aqynmen, «suńqardyń samǵaýymen án ozdyrǵan ánshiniń» dıdary jarysa qushtarlandyrǵan, talantty tarlannyń tuıaq dúbiri eleńdetken sol bir ańsarly keshtiń áserine oısha bólene otyryp, qalamymdy qolǵa aldym.
Týrasyna kósheıin, sóz basyn tańyrqaı tolǵap bastaǵanymmen de ańǵaldyǵy men adaldyǵy shyǵys qaptaldaǵy ǵaı­rı qazaqqa maǵlum Maltúgel ata­myzdy aldyǵa tartyp, «maltúgeldetip, mal­­túgendep» almasaq, saltanaty men sa­qıbtyǵyna, áni men ómirine sábıligi ere júretin týmysy tartqyr Tursynǵazy týraly áńgimeniń de tatymy shyqpaıdy. Ol ózi týmysynan talantty keletin osy tuqymnyń búıirine bitken kókbaýyr sıaqty, jigi ajyramaıtyn músheli sy­baǵa. Eń alǵashqy tanystyǵymyzdan bastap tizgin qaǵystyra, sóz tabystyra, ázil jarystyra ótkizgen 40 jyldyń ishin­degi kezdesýimizdiń bir de birinde Tursynǵazynyń óneri men maltúgeldigine qosa qabat tańdanýdan esh jazǵan emes ekenmin. Qudaı-oý, «quıyp qoıǵan qor­ǵasyn» demekshi, quıyp qoıǵan maltúgel jáne jasandylyǵy joq tabıǵı maltúgel. Senbeseńiz, aıtaıyn.
Dástúrli ánshilerdiń Ámire Qashaý­baev atyndaǵy respýblıkalyq tuńǵysh kon­kýrsy ótip jatqan kez. Sol tusta qazaqqa bitken ánshilerdiń jaısańy men qasqasynyń bári bas qosqan, Almatynyń aspany solardyń shyrqaý daýysymen kóterilip-basylyp, yrǵaǵymen terbelip turǵan shaq. Ashshy aıqaıy qulaqtyń jar­ǵaǵyn jarady, maıdaqońyry júrekti áldıleıdi, názik úndileri kóńildiń qy­lyn shertedi, ekpindileri es tandyra eliktiredi, yrǵaqtylary terbetedi. Jas perilerdiń bári de shıryǵyńqy, sahnany silkindirip, shıraq basyp shyǵyp, boıdy shymyrlatyp-shymyrlatyp alady da, tyńdaýshyny tamsandyryp, tańǵaldyryp ketedi. Qoıshy, úsh kún qıal-ǵajaıyp álemniń ishinde júr­gendeı boldyq. Alǵaý aıaqtalǵan keshte Jánibek Kármenovtiń aınalasyna úıirile qalǵandardyń qataryna qosylyp Mádenıet mınıstrliginiń aty ańyz jataqhanasyna bettedik. Mundaǵy saýyq-saırannyń áserin «Ánniń shańy aspandata qaǵyldy» degen sózimiz ǵana jetkizedi.
Tańǵy alakeýimde Jánibek Kár­menov pen Qunypıa Alpysbaevqa keýdeli, qaı­ratty qurym qara shashty, kelte muryn, dúrdik erin, dabynqara jigit ilese shyqty. A dese, boldy aýzynan «Júsekem» (ustazy Júsipbek Elebekov) degen sóz shyǵady. Daýysy qarlyǵyp, baıqaýda babyna kelmepti. Basyn shaıqap qoıyp soǵan ókine beredi. Ádetimizshe Jánibektiń úıine jata-jas­tana qonyp, ánshiniń anasy – tańerteń súıikti apamyzdyń qoıý qyzyl sháıin iship, mańdaıymyz tershigende: «Seniń tamasha ánshi ekenińdi bilemin. Nesine ýhileı beresiń. Janbolattyń toıynda Lázzattyń betin ashqan sen emessiń be. Daýysyń shatyrdy jelpindirip jibergen sonda», – dep edim: «Ony qaıdan bilesiń. Ózim qatty yńǵaısyzdanyp qaldym sonda. Qyzdyń betin ashqanda bir-aq bildim», – degeni. Syryna qanyq Jánibek sylq-sylq kúldi, sypaıy Qunypıa jymıyp qoıdy. Jónin suraǵanymda: «Oı, shynynda da uıat boldy. Óz qaryndasymnyń betin ózim ashyppyn. Lázzat meniń qaryndasym eken ǵoı», – degeni. Endi Jánibekke men de qosyldym, ol kúlkige ózi de qosyldy: «Áı, Tursynǵazy! Taǵy ne búldirdiń? Mynanyń kózinshe aıtpa, bul ózi aty shyqqan satırık. Osyndaılardy es­tise boldy, «Araǵa» jazyp jiberedi. Sodan keıin ánshi Tursynǵazy emes, maltúgel Tursynǵazy degen ataǵyń shy­ǵyp ketedi», – degeni. Maltúgeldiń tu­qymdarynyń Qojanasyr babamyzǵa bergisiz ańǵaldyqtaryn men de jaqsy biletinmin. Ári qurdas ekenbiz. Qarap turmaı qaqpaqyldata jóneldim. Sodan bas­talyp ketken qaqpaqylym údemese, mine, 40 jyl ótti, áli báseń tartqan joq.
Tursynǵazynyń sábılik minezine sol joly-aq kózim jetti. Jánibektiń ir­gesindegi dúkende «Orlenok» velosıpedi túsipti. Taptyrmaıtyn qat kezi. Jánibek qoıarda qoımaı óz aqshasyna satyp aldy: «Suńqardy qýant. Erteń taba almaısyń», – dedi. Bir jastaǵy balam bul «shaıtanarbaǵa» mingenshe eki-úsh jyl kerek jáne búgin ánshilermen serýendeıtin kúnimiz. Ony kim alyp júredi? Qarap turmaı: «Men kóteremin», – degeni Tursynǵazynyń. Qoıshy, sodan bastap onyń arqasyna «mingen» álgi velosıped eki kúnde Almatynyń teń jartysyn aralap shyqty. Qaıda barsaq ta arqasyna kóterip alady. Úshinshi kúni stýdıaǵa qaldyrdyq. Sonda bir de bir ret qyńq dese-shi. Qoshtasarda: «Suńqardyń velosıpedin umytpa. Menen sálem aıt. Aty jaqsy eken», – dep Semeıine kete bardy. Ol velosıpedti bir aıdan keıin Jáni­bektiń ózi úıge ákelip berip, 25 jastaǵy Tursynǵazynyń sálemin bir jarym jastaǵy Suńqarǵa jetkizdik. Soǵan osy kúnge deıin tańǵalamyn. Mundaı da ańǵal, mundaı da adal, sábı minezdi bolsashy. Ana ashshy da qýatty zor daýysqa myna sábılik jaraspaıtyn-aq sıaqty kórindi.
Daǵdysyz bir ǵadetim, án estisem bol­dy, sol daýystyń sońynan ilesip júre beremin. Keıde ánshiniń betine qaramaı, án aıaqtalǵan soń burylyp kete beretinim de bar. Biraq, ústińgi daýy­sy aspanǵa sharyqtap shyǵyp alyp tómenge túspeıtin, astyńǵy daýysy janyńdy maıda qońyr mápeleıtin Tursynǵazynyń qazaqy daýysy sanamnyń túkpirinde shyńyldap turyp aldy. Ol jyldary fılarmonıanyń ánshileri «saıda sanyn, qumda izin» taptyrmaıdy. Saıyn dalanyń qaı qoltyǵynda, qaı saıynda júrgeni ózderine ǵana málim. Gastrólden oralǵanda balalary tanymaı, jatyrqap jolamaı, sol kúıi jatbaýyr tartyp ketkenderi de bar. Áıteýir, estrada stý­dıa­syn bitirgen soń joldamamen Pavlodarǵa ketken Tursynǵazy Esmuqan Obaevtyń arqasynda Semeıdiń oblystyq teatryna kelipti degendi estip, oraıy kelgende ushyrastym. Qýma rolder berilipti, sonyń ózine rıza. Negizinen barymtashylar men qaratopaı soldattardyń (aq, qyzyly aralas beıneler) sybaǵaǵa tartylypty. Endi «Maıra» mýzykalyq-dramalyq spektaklinde «mýzykalnyı» ról berilmek eken.
«Átteń, sony… Netip ketpesem boldy. Ózim de baıqamaı qalamyn… Qalaı sóıtip ketetinimdi. Áıtpese, Esaǵań menen eshteńe aıamaıdy. Qańǵyp júrgen jerimnen bir bólme úı berip osynda shaqyrtyp aldy. Pavlodar qazaq ánshilerin adam demeıdi. Rızamyn», – degeni áredik esimde. Shydamaı: «Eı, seniń netip júrgeniń ne? Neni netip júrsiń? Túsindirshi óziń», – dedim. – «Óı, sony da bilmeısiń be, men álgi nemin ǵoı. Áıtpese, Esaǵań aıamaıdy róldi». «Eı, nesiń? Qylmyskersiń be, sottaldyń ba?». «Joǵa! Óı, men maltúgel emespin be». «Eı, bolsa nesi bar. Esaǵańnyń sheshesi Kallekıdiń úıine Kegennen sary maı ákep berip turǵanyn men de bilemin. Onda turǵan ne bar?». «Oı, ony saǵan eshkim aıtqan joq pa?». «Sen mundasyń, men Almatydamyn. Seniń ne ekenińdi, netip júrgenińdi men qaıdan bilemin?» – dedim sharshap ketip.
«Endeshe, saǵan aıtaıyn. Júsekeń marqum bizge, ánniń syryn ishińe túsirip, syrtyńa shyǵarmaı aıt, – dep úıretti. Al Esmuqan aǵa: «Sen sahnada óziń rólin oınaǵan adamnyń ómirdegi áreketin ómirdiń ózindegideı etip syrtqa shyǵaryp shynaıy jetkiz. Áıtpese, kórermen senbeıdi. Ony «falsh» deıdi. Falsh bolǵansha – bálish bolǵanyń jaqsy», dedi. Sodan bálish bolmaıyn dep, obrazdyń ishine kirdim. Alǵashqy rólim İlıas Jansúgirovtiń pesasyndaǵy baıǵa kek­tenip júrgen jylqyshy boldy. Yza bolyp ketip baıdy qamshymen tartyp-tartyp jiberetin jeri bar. Sózi jeńil. So­dan adamgershilik jasaǵan Esmuqan aǵanyń kóńilinen shyǵaıyn dep ashýly jylqyshynyń keıpine keldim de, qolyma dyraý qamshy alyp, aqyryp jiberip, attap-attap bardym da, baıdy – Ábilqasym Jańbyrbaev aǵamdy doıyrmen tartyp kep jiberdim. Qolym súısinip ketti. Al Ábekeń yńyrsıdy. E, durys isteppin ǵoı. Eki ret ur dep edi dep, taǵy da qam­shymen umtyla bergenimde Ábilqasym aǵa aldyǵa bir attap kep qolymnan ustaı alyp: «Boldy!» dedi aqyryn. Buryldym da ketip qaldym. Spektákl bitken soń Ábilqasym aǵanyń bólmesine barsam sheshinip jatyr eken. Arqasyndaǵy qamshy tıgen uzyn tilikten qan shyp-shyp shyǵyp tur. Aıap ketip: «Ne boldy, aǵa?» – dep jetip bardym. «Saǵan aıtqan joq pa, sahnada shyn urmaıtynyn?» – dedi. «Joq, bárin de ómirdegideı sendirip iste degen. Sosyn…». «Eshteńe etpeıdi. Sahnaǵa úırenip ketesiń», – dedi. Oı, uıalǵanym-aı, uıat bolǵany-aı! Sóıtsem, ózge qýlar sıpaı salady eken. Kelesi spektáklge shyǵarda Ábilqasym aǵam shaqyryp aldy. Arqasy qaraqotyrlanyp keledi eken. Maǵan boıaǵan kapronnan qamshy órip ákepti. Sony berdi…
Kúlesiń be? Endi, jylamaısyń, kúle­siń, árıne. Áıteýir, Esmuqan aǵa­myz Kallekı men Shákendi kórgen es­ti rejıserdiń qatarynan ǵoı. Tur­synǵazyny qoldap, bıik deńgeıge kóterdi.
Sol joly túndeletip keıipkerimniń bir bólmeli úıine bardym. Býsanyp, sorpalanyp, aıaq-qolyn endi jıyp otyr­ǵan Fatıma haným qarsy aldy. Ázilim ja­­­­ra­sa ketip: «Sonaý Kerekýdiń kóp qara­ǵaıynyń ishinde júrip, seni qalaı umytpaı taýyp aldy, mynaý?» – dedim. «Oı, munyń syryna besinshi synyptan qanyqpyn. Keledi, qaljyńdaıdy, ánin aıtady, «Kút», – deıdi de, ketedi. Áskerge ketti, kúttim. Oqýǵa ketti, kúttim. Kereký ketti, kúttim. Emeýrin joq. Sodan bir joly aýylǵa kelgende: «Meni alasyń ba, joq pa ózi. Áıtpese, bosat basymdy» – dedim. «Óı, men aıta almaı júrsem, sen qalaı op-ońaı aıta saldyń, eı. Kettik, endeshe», – dedi. «Qoı, bul maltúgel endi ketse, múldem umytyp keter – dedim de eki-úsh úıden keıingi tabaldyryqty attaı saldym», – degeni. Fatımanyń bul sózine qatty súıindim, óıtkeni, erýlige qarýly qaıtarmasa, sózdiń atasy óledi. «Biraq sonyń bárin bir ánmen ótedi. Aqyryn aıtyp ber, Tursynǵa», – dedi. Sodan bala emizip otyrǵan Fatımany besigimen ońasha qaldyrdyq ta, asúıdiń esigin qymtaı jaýyp aldyq. Tursynǵazy sylyńqy daýyspen ándete jóneldi.

Sol joly «Sábı bolǵym keledi» ánin tuńǵysh ret tyńdadym: «Bala degen tátti bolady eken. Fatıma bosanǵan soń bir túrli kúıge tústim. Muqaǵalıdyń «Ómir – ózen» jınaǵyndaǵy «Sábı bolǵym keledi» degen osy óleńiniń betin ashyp qoıyp, dombyramdy qaǵyp, yńyldap otyra berdim. Seniń Suńqaryńdy esime alyp men de ulymnyń atyn Suńqar qoıǵym kelip ketti. Sol-aq eken, daýysym qalaı shyǵyp ketkenin ózim de bilmeımin. Sóıtip, osy án týdy.
Án be, áýen be, ózim de bilmeımin. Dereý perzenthanaǵa bardym da, Fatıma jatqan bólmeniń terezesiniń aldyna baryp: «Qus ta bolǵym kelmeıdi, qanatym bar», dep bar daýysymmen aıqaılap qoıa berdim. Ózgeni bilmeımin, báıbishem rıza.
«Bul meniń tuńǵysh ánim, qalaı eken?» – dedi. Qalaı bolsyn, bir aıdan keıin Almatyǵa keldi. Kelgen soń Jánibek Kármenovtiń de, Qaırat Baıbosynovtyń da, Maqpal Júnisovanyń da, sodan keıin búkil qazaqtyń «sábı bolǵysy kelip» shyǵa keldi. Bul Muqaǵalı dúnıeden oz­ǵannan sońǵy onyń armanyn jetkizgen alǵashqy án edi. Qazir de sahnadan ketken joq. Sábı minezdi Muqaǵalıdyń sózinen de, sábı minezdi Tursynǵazynyń áninen de sábılik tazalyq ańqyp turady. Sonysymen de yntyzaryńdy aýdarady.
«Sábı bolǵym keledi» áninen bas­tap júregine shabyt qusy bolyp qonǵan Muqaǵalıdyń poezıasy Tursynǵazynyń rýhyn asqaqtatyp, janyna qýat quıyp, baqytyn tasytty. Almatyǵa ár kelgen saıyn «Aıagóz-arý», «Bala ǵashyq», «Men seni saǵynǵanda», «Iek artqan teńizge múıisteıin» sıaqty dástúrli naqyshtaǵy jańa ánderin ala kelip, Maqpal bastatqan ánshi dostarynyń repertýaryn tolyqtyryp otyrdy. Bir joly vokzaldan birden bizdiń úıge soqty. Baıqaımyn, qaljyńnan boıyn tarta beredi. Burynǵydaı emes, áldebir oı kirgen sıaqty. Sıaqty emes, oıly. So­dan ońashalana berip: «Eı, ekeýmiz de otyz­dan astyq. Ne bitirdik. Túgimiz joq. Al Muqaǵalı bolsa dúnıeniń syryn túbine jete túsinip, qartaıyp baramyn dep kúrsinipti. Bizdiń balalyǵymyz áli arylǵan joq. Es qashan kiredi bizge osy. Seniń túriń mynaý, orynsyz qaljyńdap, adamnyń kóńilin buzasyń. Osy joly bir baısaldy adam sıaqty sóıleseıinshi dep kelip em, oǵan múmkindik bermeısiń. Endeshe tyńda mynany», – dedi. Sóıtti de: «Otyzdan asyp baramyn», – dep án­dete jóneldi. Muqaǵalıdyń ǵana emes, otyzdan asqandardyń barlyǵynyń jan syryn jetkizgen, balalyqtan aryltqan án eken. Aldyndaǵy qaljyńyma ózim de qysylyp qaldym. Birneshe qaıtara aıt­qyzyp, muń ishime túse bergeni sol edi: «Já, qaljyńdaǵanǵa senip qaldyń ba. Sen birdeme bitirip júrsiń, bizdi aıtsańshy. Kelesi kelgende tek Muqaǵalıdyń sóz­de­rine jazylǵan ánderimniń jeke konsertin uıymdastyramyn. Qarasazǵa baryp, hal­qynyń aldyna oryndap bersem, meniń otyz­ǵa kelgendegi bitirgenim sol bolady», – dedi.
Ol armanyna da jetti. Bul konsert «Qazaǵym-aı» ánimen ashyldy. Naryn­qoldyqtar Tursynǵazyǵa aq batasyn berip, arqalandyryp jiberdi. Han-Táńiriniń qyranynyń qanatynyń sýylyn estigen Tursynǵazynyń daýysy da asqaqtap, ısi qazaq dalasyn sharlady. Mádenıet Eshekeev, Bolat Sybanov sıaqty aǵa ánshilermen birge Daýyl Haırýllın, Baıan Saǵymbaeva, Baqyt Úderbaeva, Keldenbaı Ólmesekov sıaqty qatarlastarymen eli­mizdiń túk­pirindegi tuıyq aýyldarǵa deıin aralap, óner sýsynymen sýsyndatty. Juldyzdy jyldardyń qanatyna mingen Tursynǵazy barǵan saıyn sharyqtaı bıiktep, óziniń shyrqaý bıigine sol baıaǵy sábı ańǵaldyǵymen kóterildi. Daýysy qulaq tundyryp qana qoımaıdy, quryshyńdy da qandyrady. «Qazaǵym-aıdy» tyńdap otyryp qulaǵyn basa qoıǵan temir ǵasyrdyń temir aqyny Temirhan Medetbektiń: «Astafır-al­la, mundaı ónerdi semeılikter qalaı ǵana alaqandaryńnyń astyna basyp otyrsyńdar. «Qazaǵym-aı» dep daýysyn joǵary kótergende, meniń qulaǵym emes, júregim jarylyp kete jazady», – degeni bar. Ánniń qaıyrmasy: «Paı-paı, qazaǵym-aı», dep shalqı sharyqtaǵanda júregińniń aýzyńa tyǵylatyny ras.
«Qazaǵym-aı» demekshi, osy ándi estigen saıyn ózimniń bir óreskeldigim eske túsedi. «Qazaǵym-aı» alǵash ret Almatynyń sahnasynda oryndalyp jatyr. Ánniń álgi tusyna kelgende Tursynǵazynyń kózi aldyńǵy qatarda otyrǵan maǵan túse qaldy. Men taǵy da kótere tús degendeı suq saýsaǵymdy shoshaıta qoıdym. Ekinshi tynys alǵandaı jańaǵydan da joǵary kóterip áketti. Tamaǵy isinip barady. Sol kezde ǵana munyń maltúgeldigi esime túsip, saýsaǵymdy basa qoıdym. Sodan keıin baryp ánniń deńgeıin baıaýlata aıaqtady. Sóıtsem, meniń shoshaıǵan suq saýsaǵymdy ol «daýysyńdy kóter» degen belgi dep túsinipti, al men ony umytyp ketippin. Ózge bolsa táp-táýir renjir edi. Al Tursynǵazy sol baıaǵy sábı qalpy: «Sen saýsaǵyńdy túsirgenshe daýysymdy soza bereıin dep qulshyndym. Áı, qıyn eken, tamaǵym jarylyp kete jazdady. Biraq, shydadym, á», – deıdi jaıbaraqat kúlip. Sol qınalystyń ornyn halyqtyń súısingen alǵysy, Muqaǵalıdyń silkingen qyran rýhy toltyryp jibergeni anyq. Sábılik ańǵal minez-aı deseńshi…
Sol sábıliginen arylmaǵan kúıi Tur­synǵazy da paıǵambar jasynan asty. Mine, taǵy da Muqaǵalıdyń óleńderine jazylǵan 30-dan astam ániniń derbes konsertin ótkizýdiń qarsańynda. Aıyrmasy, bul joly ándi onyń ózi emes, respýblıkanyń túkpir-túkpirinen jıylǵan dostary men shákirtteri oryndaıdy. Uıymdastyrǵan da sol ánshi aınalaıyndardyń ózi. Óner adamy úshin qandaı baqyt deseńshi! Mundaı qurmet árkimniń mańdaıyna jazyla bermeıdi. Múmkin, Muqaǵalıdyń qyran rýhy qoldaǵan shyǵar. Múmkin! Uzaǵynan súıindirsin qyzyǵyńdy, sábı minezdi, bala kóńildi dos!

Tursyn JURTBAI,
fılologıa ǵylymdarynyń doktory, profesor.
ASTANA.