Aqtóbedegi adasqan aǵymdarǵa erip ketkendermen jumys isteýge barǵan Qyzylorda qalasy meshitiniń ımamy Daırabaı Serikbaıuly saqal men senim máselesine qatysty batyl pikir bildirdi, - dep habarlaıdy Qamshy.kz NUR.KZ – ke silteme jasap.

«Bul saqaldyń óskenine 25 jyl boldy. 1991 jyldan bastap ımammyn. Ol kezde salafı degen uǵym joq bolatyn. 25 jyl bolǵan saqaldy qazir ózgerte almaımyn. Atalarymyz qoıǵan saqal. Abaı da, Shákárim de, Ahmet te saqal qoıǵan. Qazir terorızm shyqty dep oǵan ózgeris jasaı almaımyn. Meniń saqalyma eshkim eshteńe aıta almaıdy. Men ımammyn, memlekettik qyzmetker emespin. Meniń óz quqym bar. Sol úshin de memlekettik qyzmetke kirgen joqpyn. Qazir qoǵamda túsinik bar. Saqaldy kórse terrorıst dep shyǵady. Ásirese, Aqtóbede kóshede júrgende ala kózben qarap jatqandy sezemiz. Buryn ondaı emes, qurmetpen qaraıtyn edi. Túsindirme jumystary júrse, bolashaqta munyń bári sheshiledi», - deıdi Aqtóbege 230 adammen ilesip kelgen túsindirý tobynyń múshesi, Qyzylorda qalasy meshitiniń ımamy Daırabaı Serikbaıuly.

Burynǵy bas múftıdiń kómekshisi qolynda quzyreti bar tanymal adamdardyń salafızmdi qoldap otyrǵanyn ashyp aıtyp, Qazaqstandaǵy «Asyl arna» telearnasynyń kemshiligin tizbektepti.

«Óz adamdaryn tyǵyp otyrǵan tanymal adamdar bar. Óner, mádenıet salasynda da bar. Olardyń atyn atap, túsin tústemeı-aq qoıaıyn. Ózderińiz bilesizder, «Asyl arnanyń» bir kemshiligi bar. Olar eshqashan áýlıeni moıyndamaıdy. Áýlıeler týraly eshqashan baǵdarlama túsirgen emes. Ol - úlken kemshilik. Sebebi bizdiń qazaq arýaq syılaǵan», - deıdi ol.

Saqaldy ımam jat aǵymnyń jıyndaryn bile turyp, tosqaýyl qoıa almaǵan memleketti kinálady.

«Men ózim musylmandar dinı basqarmasynda bas múftıdiń kómekshisi bolyp jumys jasadym. Sol kezde «Ýahabızmniń búligi» degen kitap jazǵan edim. Tájikstanda soǵys bolyp tyıym salyndy, Ózbekstanda tyıym salyndy. Bári qashyp Shymkentke keldi. Shymkentten keıin Qazaqstannyń barlyq qalalaryna ketti. Memleket olardyń túbinde bizdiń elge keletinine sol kezde mán bergen joq. Salafızmge tyıym salmasa da olardyń ustazdarynyń áleýmettik jelide ýaǵyz júrgizýine tyıym salý kerek. Jastar sonda tartynady. Salafızmge tyıym salýdy halyq talap etip otyr.  Salafızmniń mehanızmin taýyp, toqtatý kerek. Sebebi qanshama adamdy qurtyp otyr», - deıdi ımam.