Aqtóbede taǵy da dúrbeleń. Polıseılerdiń tól merekesi qarsańynda tártip saqshylary men qylmyskerler arasyndaǵy atystan eki qylmysker oqqa ushyp, óz qyzmetin oryndaý barysynda taǵy eki polısıa qyzmetkeri jaraqat alyp, aýrýhanaǵa jetkizildi. Qala irgesindegi Kirpishti aýdanyndaǵy úılerdiń birine tyǵylǵan kúdiktiler óz erikterimen berilýge qarsylyq kórsetip, oq jaýdyrǵan. Qarýly toptyń dinı uıymǵa qatysy baryn quzyrly organ rastap otyr. 

Osydan tórt kún buryn polısıaǵa taksısti belgisiz bireýler pyshaqtap ketkeni týraly habar túsedi. Alaıda, qylmysker oqıǵa ornyna kelip jetken tártip saqshysynyń ózin, birneshe jerden atyp ketedi. Osy oqıǵadan keıin shuǵyl asa qaýipti qarýly topty ustaý operasıasy bastalady. Qaskóıler Aktóbe irgesindegi myna úılerde jasyrynypty. Arnaıy jasaq pen qarýly toptyń arasynda alty saǵatqa jýyq atys boldy. Kúdiktiler ólispeı berispeýge bekingen. Sondyqtan, arnaıy jasaq sarbazdary men ishki áskerı bólim soldattary, BTR tehnıkasymen mergender tartylyp, soǵys alańyna aınaldy áp-sátte. Alǵashynda eshteńe túsinbeı qalǵan turǵyndar, atylǵan oqtyń jańǵyryǵy jıilegen kezde baryp, kóshege shyqqan. -Júgirip shyqtym. Myltyqtardyń daýysy estildi. Áskerı kıingen adamdar júr eken. Kýágerler súnnet kıim kıgen din ókilderi qylmystyq toppen kelissóz júrgizgendigin aıtady. Al, mańaıdaǵy turǵyndardyń aıtýynsha, saqaldy adamdar bul jerge jıi jınalady eken. -Saqaly bar, basynda taqıasy bar jigitterdiń júgirip bara jatqanyn kórgenmin. Osy arada vahabıster deı me, birdeńeler júr deıdi. Olardy túsinbesek te vahabıst dese qatty qorqamyz endi. Polısıaǵa óz erkimen berilmeı, oq jaýdyrǵan 3 qylmyskerdiń esimi de belgili boldy kelesi kúni. 1991-jyly týǵan Jolaman Bekbaýov, 1994-jyly týǵan Ǵabıt Qurmanqul, eń eresegi 1989-jyly týǵan Ernazar Myrzaǵalı. Atys kezinde olardyń ekeýi qaza taýyp, bireýi aýrýhanaǵa jetkizildi.Taǵy eki polısıa qyzmetkeri operasıa kezinde jaralandy. Al, qyzmetin oryndaý barysynda oqqa ushqan Temirbek Jaqsylyqov kúni keshe jer qoınyna tapsyryldy. Onyń artynda tórt jasar uly men jary qaldy. -Jas sarbaz edi. Tiri bolsa tamyz aıynda 33-ke tolatyn. Onyń atasy da 40 jyl boıy polısıa qatarynda qyzmet etken. Jumystyń babymen bolǵan jaǵdaı ǵoı endi. Amal joq. Kónemiz. Beıbit turǵyndar arasynda qaza bolǵandar men jábirlenýshiler joq. Jaraly polıseılerdiń jaǵdaıy da birqalypty qazir.

Maqsat Tolyqbaı.

31 telearna