Búgin, 7 jeltoqsan kúni M.Áýezov atyndaǵy Qazaq memlekettik akademıalyq drama teatrynda aqyn, ánshi-kompozıtor Ermurat Zeıiphandy eske alý keshi ótti.

QR Mádenıet qaıratkeri, Jazýshylar odaǵynyń múshesi, kompozıtor, ánshi, akter, qalamger Ermurat Zeıiphan bıyl tiri bolsa erdiń jasy 50-ge keler edi. 45-inde aramyzdan ozǵan daryn ıesin eske alýǵa jınalǵan halyqtyń qarasy kóp boldy. Eske alý konsertine Ermurat Zeıiphannan týǵan-týystary, qalamdastary, qarýlastary, dostary jınaldy. Olardyń ishinde klasık jazýshy Qabdesh Jumadilov, aqyn Járken Bódesh sıaqty qazaq ádebıetiniń aqsaqaldary da bar. Sondaı-aq ol týyp-ósken Shyǵys Túrkistannan kózin kórgen aýyldastary, dostary konsertke arnaıy keldi.

«Eki dúnıede jalǵyzym – Qazaqstan» konserti Mádenıet jáne Sport mınıstri Arystanbek Muhamedıulynyń arnaıy jibergen júrekjardy hatymen bastalyp, Ermurat Zeıiphannyń bar arman-muratyn boıyna sińirgen «Kók týdyń jelbiregeni» ánimen shymyldyǵyn túrdi. Konsertke Qazaqstannyń eńbek sińirgen ártisteri, mádenıet qaıratkerleri, qoǵam qaıratkerleri jáne Qytaı elinen tanymal óner ıeleri kelip Ermurat Zeıiphannyń el arasyna taralǵan ánderin oryndady. 2 saǵatqa sozylǵan konsertten áýelegen án tyńdaýshysynyń júregine jetip, Ermurat Zeıiphannyń el esindegi beınesi jańǵyra tústi.

Eske alý keshinen sońǵy qonaqasynda Almaty Oblysy Talǵar aýdany máslıhatynyń depýtaty Ábdiǵanı Pázilqanuly jınalǵan qaýymǵa Ermurattyń atyna Talǵar qalasynan kóshe beriletinin aıtyp súıinshiledi. Budan bylaı, Talǵar qalasyndaǵy Shoseınaıa kóshesi Ermurat Zeıiphan kóshesi dep atalady.

Ermurat Zeıiphan, Qytaı Halyq Respýblıkasy Shyńjań ólkesi, İle aımaǵy Kúnes aýdanynda dúnıege kelgen. Táýelsizdiktiń alǵashqy jyldary shetelde turatyn mıllıondaǵan qandasymyzdyń arasynan Atamekenge alǵashqy bolyp at basyn burǵan talantty jastardyń biri bolatyn. Jasyndaı jarq etip óte shyqqan 45 jyl ǵumyrynda «Sybyzǵy saryny», «Ózińe arnadym» «Úsh býryl», «Bu dúnıe» sıaqty prozalyq shyǵarmalar men óleńder jınaǵyn jaryqqa shyǵardy. Qorǵanys mınıstrliginiń orkestrinde qyzmet etip, «Kók týdyń jelbiregeni», «Kúnes-aı», «Eki dúnıede jalǵyzym – Qazaqstan», «Jaılaýym – ánim», «Kenesary», «Qyzaı ana» sıaqty rýhty ánder syılady.