Nurshat Ázinbek

Apa

Qarǵashyńnyń qarǵa oramaı kóktemin, 

Qalaýymdy qabaǵyńmen shektediń. 

Uzaq túnde neǵyp aıtty ekensiz

Baǵy ashylmaı júrgen qyzdyń ótkenin?!

Tóbege únsiz telmiremin tózgendeı,

Tógiledi óz kózimen kórgendeı. 

Sol qyz jaıly áńgimeni jalǵaıdy, 

San myń juldyz bir-birine sóz bermeı. 

Buldyr- buldyr bulty qalyń kún kelse, 

Kúldir- kúldir ǵumyr ǵoı bul tym kelte. 

Quraq ushyp kózin súıip júrme eken,

Sonadaıdan men sekildi qyz kórse?!

Ózgertsemde bekimimdi baq surap, 

Kóldetsemde kózderimnen jas qulap. 

Baýyryńa basyńyzshy apashym ,

Aldymenen ursyp alyp qattyraq. 

Qarǵashyńnyń qarǵa oramaı kóktemin, 

Qalaýymdy qabaǵyńmen shektediń. 

Baýyryńda tyńdap jatyp qalǵysam, 

Álgi qyzdyń baqytty bop ketkenin. . . . 

Áke

Siz aıtasyz :

" juldyz-janar qarańǵyǵa jaǵypty ot,

Qudyretteı sezingenge búkil álem jaryq  "dep. 

Men aıta almaı otyramyn  eki kózim  jaýtańdap ,

Muńǵa bergen kúnderimdi aldyńyzǵa alyp kep. 

Ókpeleýin osaldyqqa jasyrmaıtyn bolǵanda, 

Kóktemegir qataldyqqa ashynbaıtyn bolǵanda. 

Boıjettim be,  qysqa kúnim bara jatty qysqa aýnap, 

Erkelep kep moıynyńa asylmaıtyn bolǵanda. 

Attandyrǵan ozyń ediń bul saparǵa sál júdeı, 

Maqtandyrǵan kóziń edim marapaty máńgideı. 

Bir bıikti kútetinin turǵanymen kózi aıtyp, 

Altyn qyzyn qımaıtynyn jasyra almaı qaldy ǵoı. 

Batar jeri kúnniń birdeı-barar jeri bir keshiń, 

Shahar meni kózge ilmeıdi ,  túk etpeıdi ilmesin !

Saǵynyshty sanasynan úzip alǵan ólkede, 

Aq bulttarǵa qonyp qalǵan nurdy qýyp júr desin. 

Baǵy sodan jandy ma dep tilek bolyp bastasyn,

Alys emes joldaryna tirek bolyp jatqasyn . 

Túngi uıqysyn bólmeıinshi túsinede kirmeıin, 

Jany jaýrap qaldy ma dep júregine batpasyn! ! ! 

Sińilim

Burymyńdy býǵanyńda sánimen,

Sábı kúniń buldyraıdy saǵym óń. 

Gúlge jaıyp bolǵan shyǵar kóbelek,

Boıjetti dep júrgen jurtqa nalyp em . 

Eldiń sózin qaıtarmadym qatege,

Baǵynbaısyń basqa ýaıym jat emen. 

Baıaǵydaı jylatatyn tentektiń, 

Atyn aıtyp shaǵynbaısyń ákeme. 

Jymıasyń alańymdy jel emdep,

Júregińe bata berem tereńdep. 

Men syrymdy tógip aldym baıqamaı,

Ómir jaıly áńgime aıtyp berem dep. . . 

Nalasy asqan tirligimdi sezgende,

Sorasy aqqan sorǵa jaqyn sózdende

Alystatyp kórsetpegim keledi,

Qatalyraq qaraıtuǵyn kózdende. 

Endi neden jabyrqatam kim bilgen,

Móldiregen armanyńdy súıdim men . 

Tarqata almaı taǵy otyrmyn qaıtem dep, 

Burymyńdy órip alyp kil múńmen. . . 

Qanatty ertekter

Sýretińdeı jyryń jyly, peıil júz,

Mende sondaı saǵynshqa beıim qyz . 

Bastap aldyq túgemeıtin bir Ertek,

Eń alǵashqy tanystyqtan keıin biz . 

Buǵan deıin ómir súrmeı, kún keshpeı . 

Júrgendeı-aq, syrlasqanbyz tym keshteı. 

Búgingi aıǵa ókpemdi aıtam únsiz ol,

Buryn qaıda ómir keshtik júzdespeı. 

Siz dalany súıetinsiz, úndemeı,

Óleńińnen oqyp uqqam, bilmegeı. 

Shegáráni qıalmenen Qıratyp, 

Jaqyndyqty armandaıtyn túnder-eı. 

Kóktiń sulý perileri jasqana

Jerge qonyp, jasap jatyr aq qala . 

Búgingi qar biz jazatyn jyrlardyń,

Sóılemindeı appaq ári tap-taza . 

"saǵyndym  "dep sóz aıttyńyz nege min?! 

Jymıdym men, kerek bolmaı ne derim. 

Baǵy janbaı júrgen qansha taǵdyrlar, 

Bálkim,  tunyq saǵynyshy joq onyń! 

Biraq sol sóz qaıtalansa sezemin: 

"aǵa, meni saǵynbańyz  " der edim. . . . 

Sheksiz kóshe

Jaǵań altyn jan ediń ǵoı, kóziń Nur,

Jaǵalaýǵa uıa salsam órtenbe. 

Bári seniń álegiń ǵoı, óziń bil

Baıqamaǵan bolyp júre berseńde. . . 

Móldiregen qarashyǵyń qalǵıdy,

Endi menen eles jyraq keteme?!

Qaltamdaǵy qalǵan-qutqan qaıǵymdy,

Shashyp kettim sen júretin kóshege

Jaýtańdatyp júregimdi juttyń da,

Qalaı aǵyp bara jatsyń beý İle. . . 

Qanatyma jara jazyp ushtym ba,

Týǵan jerdiń kókjıegin kómile?! 

Eki jólmem keteıikshi boldy biz,

Qoshtasarda ne deýshi edi, umyttym?! 

Saǵynyshtan shekpen kıgen sherli kúz,

"armanyńnan adastyń  " dep kúlip tur . 

Adastyryp tabylarmyz jol bizdi,

Jolyqtyrmaı júrgenine ókinsin. 

Erkeligi batyp ketken sol qyzdy,

Kóshelerde kóshken muńdar keshirsin! 

daıyndaǵan: Bulǵyn Sýsar