Kókshetaýda áriptesi Darhan Elamanovty tapanshamen atyp óltirdi degen kúdikpen polısıa qyzmetkeri tutqynǵa alyndy dep habarlaıdy 31.kz. Mundaı qylmysqa barýy múmkin degen Jánibek Baımýrzın óz kinásin tolyq moıyndap, qazir qamaýǵa alyndy. Al, qaıǵydan qan jutqan marqumnyń jaqyndary kúdikti tıisti jazadan qutylyp kete me dep alańdaıdy.
Jeksenbi. Keshki saǵat toǵyzǵa bes mınýt qalǵan sát. Osy ýaqytta jumystan shyqqan Darhan Elamanov áıelimen telefon arqyly sońǵy ret sóılesken. Ata-anasy men úılengenderine úsh aı ǵana bolǵan súıikti jary úıde asyǵa kútip otyrǵan edi. Alaıda, tártip saqshysy otbasyna oralmady. Habar da úzilgen. İshki ister qyzmeti bir táýlikten soń izdeý jarıalady. Týys-týǵandarymen birge Darhandy tanyǵan 100-ge jýyq jora-joldastary da izdeýge shyǵady. Arada eki kún ótkende Elamanovtardyń shańyraǵyna sýyq habar jetedi. Krımınaldyq polısıada nebári 2 jyl istegen tártip saqshysynyń máıiti tabylypty.
MURAT ELAMANOV, Darhannyń ákesi:
- Myna moıyn men bas jaǵynda jaraqat bar. Srazý nasmert sol jerde atqan. Kıimin bárin sheship alǵan. Shýchınskiniń trassasyna alyp shyǵyp, ózin qarǵa japqan. Neke saqınasyn alǵan, dokýmentterin alǵan, tabelnyı pıstoletin alǵan. Qalǵan kıimi men sotkasyn órtep jibergen.
Darhannyń denesi tabylǵannan keıin kóp ýaqyt ótpeı qylmysqa bardy degen kúdiktiniń esimi de belgili boldy. Ol ózge emes, bir salada ıyq tirese jumys istep júrgen Aqmola oblystyq ishki ister departamentiniń krımınaldyq polısıa qyzmetkeri, 10 jyldyq ótili bar, maıor Jánibek Baımýrzın.
GÚLNÁR PINCHÝK, Aqmola oblysy İİD baspasóz qyzmetiniń jetekshisi:
- Kúdikti ustalyp, qylmystyq prosesýaldyq zańnamaǵa sáıkes ýaqytsha qamaýǵa alyndy. Óziniń kinásin moıyndap otyr. Óltirýge aradaǵy alaýyzdyq sebep bolǵan.
Alaýyzdyqtyń neden týyndaǵany týraly ázirge ishki ister qyzmetkerleri tis jarmaı otyr. Al, marqumnyń týysqandary Jánibek Baımýrzınniń sotta jáne ózge de quzyrly organdarda isteıtin bedeldi jaqyndarynyń arqasynda ol jazadan qutylyp kete me dep alańdaıdy.
Nurbek Elamanov, Darhannyń aǵasy:
- Biz ádil sheshim suraımyz. Óz kinásina laıyqty jazasyn alsyn. Jaýyp tastap, jasyryp ondaı bolmasyn. Qandaı jaqsy bala edi. Jaqynda 16 jeltoqsanda úlgili qyzmeti úshin departament basshysynyń qolynan alǵys hat alǵan. Áriptesteri de, barlyǵy shok bolyp otyr. Eshqandaı jaman minezin baıqamaǵan.
Kúdiktige qylmystyq kodekstiń 99-baby boıynsha adam óltirgeni úshin sot isi taǵaıyndaldy. Denesindegi jaraqattar men dáıek zattardy eskere otyryp, birneshe saraptama júrgizilýde.Al, áriptesi tapanshamen atyp óltirýi múmkin Darhan Elamanovty jaqyndary erteń aqtyq saparǵa shyǵaryp salmaqshy.
