Petropavlda syrqat sábıler týraly aqparatty paıdalanyp, ǵalamtor arqyly elden qarjy jınaǵan adam ustaldy dep habarlaıdy ktk.kz. 20 jastaǵy ákki jigit osyndaı jolmen jarty mıllıonnan artyq aqsha tapqan. Alaıda tergeýshiler aram pıǵylmen tabylǵan aqsha áldeqaıda kóp bolýy múmkin dep otyr.

Bir jarym jasar Alekseı Savelev pen onyń anasynyń kúndegi tirligi osy. Jattyǵý jumystaryn bir sátke de doǵarýǵa bolmaıdy. Týǵannan sal aýrýyna shaldyqqan sábı jylyna eki ret Astanada tegin emdeledi. Biraq bul tym az depti dárigerler. Sondyqtan, eki aı saıyn Reseıdiń Ekaterınbýrg qalasyna attanady. Al oǵan 800 myń teńge kerek. Bul aqshany jınaý úshin Vladıslava áleýmettik jelilerde úndeý tastaǵan. Qaıyrymdy jandar jeterlik. Biraq jýyrda ǵana jylý jınaý isine bireýlerdiń qol suǵa bastaǵanyn baıqapty.

Vladıslava Saveleva, Petropavl qalasynyń turǵyny:

- Jýyrda áleýmettik jelidegi paraqshama jazylǵan jandardyń biri habarlasyp, meniń atymnan ózge bireýdiń aqsha jınap jatqanyn aıtty. Dereý sol silteme boıynsha jalǵan paraqshany taýyp, jaǵamdy ustadym. Onda balamnyń sýreti qoıylyp, dıagnozy jazylypty. Biraq esep shot bizdiki emes. Dereý tártip saqshylaryna habarlastyq.

Alaıaq alysqa barmady. Qaıyrymdy jamaǵatqa ózin aýrý balanyń aǵasymyn dep tanystyrǵan onyń ońaı oljaǵa qunyqqany sonsha, istep júrgen temirjoldaǵy turaqty jumysyn da tastap ketipti. Esesine, bir jylda  jarty mıllıon teńge tabys tapqan.

- Vkontakte jelisinde aýrý bala týraly paraqshany taptym. Sonan soń ózim de dál sondaı feık paraqsha jasadym. Sol jerge barlyq aqparatty salyp, óz esep shotymdy kórsettim. Osylaısha 500-600 myńdaı aqsha jınadym.

Biraq kúdiktiniń sózine polıseıler kúdikpen qaraıdy.

Nurbek Baekın, SQO İİD baspasóz qyzmetiniń mamany

-Kúdiktiniń aıtýynsha, ol úsh naýqas balaǵa feık paraqshalar istegen. Búgingi tańda ol úsheý ma, álde taǵy da odan kóp pe, osyǵan qatysty tergeý amaldary júrgizilýde. Tekserý jumystary júrgizilip jatyr. Kúdiktiniń kinási dáleldense ol 4 jylǵa bas bostandyǵynan aırylýy múmkin.

Sońǵy kezderi Qyzyljarda qaıyrymdy jandardyń qarjysyna qol suǵatyndar kóbeıip barady. Esterińizde bolsa, bir aı buryn jaǵy kemis bolyp týylǵan Aleksandr Batorınge arnalǵan aqsha salatyn jáshikti de tapa tal túste dúkennen urlaǵan. 18 jastaǵy aramtamaq qazir tergeýge alynǵan. Polısıa bolsa, ata-analardy kómek surarda saq bolýǵa shaqyrady.