Qazaqstanda bılikti azamattardy ýaqytsha mekenjaıy boıynsha tirkelýge mindetteıtin zań talabyn joıýǵa shaqyrǵan petısıa jarıalanǵan Avaaz.org saıtyna kirý shekteldi. Saıtta jarıalanǵan petısıa avtorlary azamattardy bir aıdan astam ýaqytqa sapar shegip barǵan jerinde 10 kún merzim ishinde ýaqytsha tirkeýge turýdy mindetteıtin zań talabyn joıýǵa shaqyrady, dep habarlaıdy "Azattyq" radıosy.

"Biz zańnyń atalǵan normasy azamattardyń júrip-turý erkindigin kádimgideı shekteıdi dep sanaımyz" delingen petısıada. Petısıa avtorlarynyń pikirinshe, tirkeýge mindetteý Qazaqstan maquldaǵan BUU-nyń Azamattyq jáne saıası quqyqtar jónindegi halyqaralyq paktini buzady.

Avaaz.org saıtynyń qazaqstandyq qoldanýshylarǵa arnalǵan petısıa bar paraqshasynyń ashylmaı qalǵany týraly 8 qańtar kúni keshke habarlana bastaǵan. Al búgin Qazaqstanda secure.avaaz.org saıtyna qazaqstandyq barlyq tutynýshy kire almaı otyr. Petısıaǵa qol qoıǵandar sany jeti jarym myńnan asady.

Qańtardyń basynda Qazaqstanda azamattardy ýaqytsha mekenjaıy boıynsha tirkeý týraly kóshi-qon zańdaryna engizilgen túzetýler kúshine engen. Endi turǵylyqty jerinen tysqary jaqqa bir aıdan asatyn merzimge barǵan ár qazaqstandyq memlekettik baj salyǵy retinde 227 teńge tólep ári halyqqa qyzmet kórsetý ortalyǵyna baryp ýaqytsha mekenjaıy boıynsha tirkeýge turýy tıis. Bul talap qonaqúıde turyp, ózge qalada jumys isteıtin adamdarǵa da, ózge qaladaǵy aýrýhanada jatyp uzaq emdeletin adamdarǵa da qatysty. Alǵashqylaryn qonaqúı ornalasqan mekenjaı, al ekinshilerin emdeletin orny boıynsha tirkeıdi. Bul talapty oryndamaǵandarǵa jeti AEK (aılyq eseptik kórsetkish) kóleminde, ıaǵnı 16 myń teńge aıyppul salynady.

Qazaqstanda bılikke jaqpaıtyn saıttardyń buǵaýlaný nemese jabylý oqıǵasy buǵan deıin de bolǵan. Avaaz.org Qazaqstanda tamyzda sol kezdegi premer-mınıstr Kárim Másimovtiń otstavkaǵa ketýin talap etken petısıa jarıalanǵan soń ashylmaı qalǵan edi. 2014 jyly teńge devalvasıalanǵan 11 sáýirde avaaz.org saıtynda prezıdent Nursultan Nazarbaevqa ımpıchent jarıalaým týraly petısıa basylǵan soń da qazaqstandyq qoldanýshylar saıtqa kire almaǵan. Biraq keıin saıt qaıta ashylǵan.