Dımash Qudaıbergenovtyń mıllıardtar mekendegen aspan asty elinde bárinen bási basym túsip, bas júldeni qanjyǵaǵa baılaǵanyn bilemiz. Birinshi kezeń bolsa da, onyń ózi biz úshin úlken jetistik, uly jetistik deýge de bolatyndaı. Aýzyn aıǵa bilegen eldiń "men" degen ánshilerin shań qaptyrdy sabazyń. Júregi qazaq dep soqqan ár adamnyń kózine jas úıirildi. Qazaq bolyp týǵany úshin maqtandy dep jazady massaget.kz.
Keıbireýler "oıbaı, sheteldi baǵyndyramyz", "Azıany tańǵaldyrýǵa baraıyn dep jatyrmyz" dep ysqyryqtary jer jaryp júrgende, Dımash sózben emes, ispen dáleldep, únsiz baryp qaptaǵan Qytaı telearnasynyń tórinen bir-aq shyqty. Márt eken. Jigit eken.
Ústinde aýyr júk. Qazaqstan atynan shyǵyp, qazaq ultynyń namysy úshin baryn saldy. Kómeıine qumyr qus uıalaǵan boztorǵaı ánshini Táńir bergen talanty alyp shyqty. 1 paıyz talant, 99 paıyz eńbek bolsa, qarapaıym kórermen túsine bermeıtin mýzyka áleminiń qyr-syryn meńgergeni anyq baıqaldy. Maqtanamyz. Tek til-kózden aman bolsa eken dep tileımiz. Tilekshimiz.
Kúlli qazaqtyń ǵana emes, búkil Azıanyń jaryq juldyzyna aınalyp shyǵa keldi bir sátte. Ol týraly biz túsinbeıtin tilde jazyp jatyr, aıtyp jatyr. Álemdik juldyzǵa aınalýdyń aldynda tur.
Kezinde Dımash Qazaqstan telearnalarynyń birinde ánshiler baıqaýyna qatysqanda bizdiń synshysymaqtar ne dep edi? Dımash ol kezde áli tanylmaı turǵan edi. Tek qazylar alqasynyń ishinen Maıra Muhammedqyzy ǵana Dımashtyń talantyn tanyp otyrdy. Qalǵandary Dımashty tóbelerine kótermek túgili, bir aýyz jyly sóz de aıtpap edi ǵoı. Sol esime tússe, qatty qynjylam. Qazaq deseń, ózińe tıedi emes pe? Qazaq synshylarynyń kásibı biliksizdigine qynjylam.
Já, ótken nárse ótti. Dımash "Slaván bazarynan" bas júlde alyp kelip baryp moıyndaldy. Al qazir tipti sol kezde Dımashqa syn aıtqandardyń ózderi Dımashty bir kórýge, bir tildesýge zar bolyp qaldy. Óıtkeni buryn-sońdy bundaı dárejege jetken qazaq ánshisi bar ma, joq pa?! Ataqty Ámire Qashaýbaevtyń Fransıany tamsandyrǵanyn tarıhtan bilemiz. Saýsaqpen sanarlyq.
Dımashtyń deńgeıi Azıany ǵana emes, búkil álemdi baǵyndyrýǵa jetedi. Oǵan kúmán joq. Tárbıesi, saýattylyǵy, bolmysy, kásibı deńgeıi, syrtqy túri – bári-bári tórt aıaǵyn teń basyp tur. Biz qazaqtyń qara balasyn tóbemizge kóterip, alaqanymyzda aıalaýymyz kerek. Júz jylda bir týatyn týma talantty qolda barda baǵalaýǵa tıispiz. Mıllıardtaǵan adam kóz tigip otyrǵan ekrannan qazaq tilinde sóılep, táýelsiz elimizdi pash etken áreketi – zor qurmetke laıyq.
Qarap otyrsaq, ımıji ózgergeni sol edi, biz tamsanatyn K-pop juldyzynan aınymaı qaldy. Aıdoldardan artyq túspese, kem túspeıtin syrtqy beınesi biraz qyzdyń júregin jaralap úlgergen sıaqty )
Qytaı ne sebepti qazaqtyń qara balasynyń jolyn ashyp otyr?! Óıtkeni olarǵa jańa esim, jańa juldyz kerek. Azıa juldyzy kerek.
Dımash Qudaıbergenov – qazirgi Qazaqstan shoý-bıznesiniń revolúsıoneri. Ánshimin dep júrgen adamnyń ózi uıalyp, án aıtýdan tartynyp qalǵan shyǵar. Ándi aıtqanda janyn jep aıtatyndardyń ózi jolda qalyp, mıkrofonnan alty metr alysta qashyp júrgenge uqsaıdy. Óıtkeni shala jansar ánniń ózin bıleýge kelse boldy, juta beretin qazaqtyń kózi birtindep ashylatyn boldy. Mynadaı kásibı joǵary ándi qulaǵyna quıǵan soń, endi ándi talǵap tyńdaıdy degen úlken úmitim bar. Ásirese, ósip kele jatqan jastar úshin qýanam...
Qýan, qazaq! Osyndaı myqtynyń qazaqtan shyqqanyna qýan...
