Bir kúni bala-shaǵamdy jınap alyp, jınalys ótkizdim. 

–Birneshe kúnnen keıin otbasy kúni keledi. Osy aıtýly kúnge oraı árqaısymyz qazirden bastap bir–birden jaqsylyq jasap qaıtaıyq. Keshke maǵan esep beresińder, –dedim jymıyp. Tórt balam men úsh qyzym jymıyp saldy. Kelinshegim ǵana kerilip, sóıleýge erinip: –Qaıdaǵyny shyǵarmasań, shyqshytyńa shıqan shyǵady ma? –dep qaldy. Sodan kórshi kempir oıbaılap jetip kelmesi bar ma? Sóıtsem, jetinshi synypta oqıtyn júgermegim jetip baryp: «apa, siz qulap qalyńyz, men sizdi turǵyzyp jiberip, bir jaqsylyq jasaıyn!» –deıdi eken de, aıaǵynan shalyp qulata jazdap, qoltyǵynan demep, turǵyzyp jiberedi eken. Ulyma urysqan joqpyn. «Adamdar jaqsylyqty surap almaıdy. Jaqsylyq jasaýdy mindet etpeıdi...» dep túsindirdim. Bir kezde kerilip, kelinshegim keldi.  –Ne ǵoı... –deıdi kózderi kúlimdep. –Nemene, ne ǵoı? –dep suradym men. –Kórshi Kerimbek aǵaı bar emes pe? «Sol kisi maǵan mahabbat kózben qaraı beredi, jyndy ma ózi?» deýshi edim ǵoı? Sol kisi esigi aldynda tur eken, jaqsylyq jasaıyn dep júgirip baryp, betinen bir súıdim de, qashyp kettim... Eki kózim jerge domalap túsip, ony áıelim basyp ketkendeı áserde boldym. «Mundaı jaqsylyq bolmaıdy. Áıel– úıdiń berekesi. Sen adal, sen meıirimdi anasyń, mynaýyń jaqsylyqqa jatpaıdy!» –dep túsindirdim. Sodan ózim kóshege shyqtym. «Osy jurt, táýelsiz Qazaqstanymnyń azamattary qalaı jaqsylyq jasaıdy eken?» degen oımen kóshede kele jatyp, ádeıi shalqamnan tústim. Júregimdi ustap. Kóshe júrginshileri janyma jýymady. «Qınalyp» jatyrmyn. Bir semiz áıel janyma kelip, úńilip qarady da: –Meniń kúıeýime uqsaıdy eken... Ol emes... –dep ketip qaldy. Sosyn bir kisi quıryǵyma bir teýip: –Myń teńgege maıdańyz bar ma? –dep surady. Adamnyń ózi «qınalyp» jatsa... Ornymnan turyp, kelesi kóshege tústim de, pyshaqtyń júzin qarnyma taqap, ushy jaǵynan qos qoldap ustap, qınalyp, táltirektep baryp, gúrs ete quladym. –Kómektesińder! Pyshaqtap ketti! –dep aıqaıladym. Qala turǵyndarynan aınalaıyn! Biri sonadaıdan sóılep tur: –Pyshaqty sýyryp almańyz! Aýa ketse ólesiz!  –Jedel járdemge hapbarlasyńyzshy! –dedim men. –Keshirińiz, «edınısa» salyp jiberseńiz, habarlaıyn... Biraz jurt alystan konsert kórgendeı tamashalap tur. Biri kelip, alǵashqy járdem kórsetpedi. Ornymnan turyp, pyshaqty laqtyryp jibergenimde, bári tym–tyraqaı qashty. Endi ózim jaqsylyq jasaýǵa bekindim. Bir kempir kósheden óte almaı tur eken, kelesi betke arqalap ótkizdim. Áreń demalyp tursam, bireý ıyǵymnan túrtedi. Qarasam, jańaǵy ájeı.  –Shyraǵym, qatelesip ketippin ǵoı, kelesi betke arqalap arpara qoıshy, –dep tur. Arqalap, arǵy betke ótkizdim. Bir baldaqty kisi arqama jabysyp jatyr. –Kóke munyńyz ne? –Arqalaýshy jumysyna tursań, meni de apar arqalap. Mashına qaǵyp keter... –degen ol arqama yrǵyp minip aldy. Baldaǵyn qolyma alyp, beıtanys kisini de «zebra» jolmen kelesi betke ótkizdim. Ter degen ketti. Bir qyz: «Aǵaı, meni de arqalaısyz ba? Aqshasy qansha?» – dep tur. –Jaqsylyq satylmaıdy! –dep ashýlanyp, ol jerden ketip qaldym. Úıge kelgenimshe kesh boldy. Otbasymyz birtindep jınalyp jatyr. Kishi qyzym¬nan: –Qandaı jaqsylyq jasadyń? –dep suradym. –Qýylshaǵymdy shomyldıdym, dýanaǵa pishte beıdim... –Sen she? –dep suradym ulymnan. –Jaqsylyq jasaǵan joqpyn... –dep mińgirledi ol. –Nege? –«Jaqsylyqtyń erete keshi» joq dep ózińiz aıtatynsyz. Ne asyǵys bar dep... Úlken qyzym keshikti. Tún ortasy boldy. Alańdaı bastadyq. «Qudaıym–aı, jaqsylyq jasaımyn dep júrip, jamandyqqa tap bolmasa edi!» dep sheshesi jylap júr. Bir kezde qyzym uıaly telefonymen habarlasty. –Ia, ne boldy qyzym? –deımin degbirim qalmaı. –Áke, burynnan tanıtyn jigitime jaqsylyq jasadym... –Ol qandaı jaqsylyq? –Sol jigitke turmysqa shyǵyp, úlken jaqsylyq jasap otyrmyn... Shoqıyp, otyra kettim. Sheshesi jylap júr: «ne dedi?» dep surap júr. Adamdar, bir-birimizge tek jaqsylyq jasaıyqshy, a?

Facebook-tegi paraqshasynan alyndy.