Ýa, baýyrym! Qobdalyq,  táshkendik hám ólgeılik! Qazaqtyń bir balasy Tildeı osy qaǵazǵa  Datyn jazdy kóldeı qyp.

Altaıdaı zor eńselim! Jaryq kúnde jaý tıip, jattan quqaı kórse elim, Quıysqanym kóterilse,  Sýyrylar dep qynynan Es tutatyn semserim!

Qara ormanym! Telegeı kók teńizim! Abadandaı atamnyń, Altyn qursaqty anamnyń  Mahabbatynan jaratylǵan egizim!  Tilin tyǵyp aýyzyna,  Dilin tyǵyp baýyryna,   Sary maıdaı saqtap otyrǵan negizim!

Qonysy eki jarylǵan, Óris-oty tarylǵan Baıtaǵym! Shaldarynyń et júregi eljirep, Balalarynyń tulymshaǵy jelbirep, Atajurtqa qashan, qalaı qaıtaryn Kim biledi?  Soqyr, mylqaý, kereń bolsaulyǵym, Aryzymdy kimge baryp aıtamyn?..

Qamaýdaǵy qasqyr bop, Saǵynyshyń tasqyn bop, Sen de júrsiń, Qansha ret Qara túnde Qajytaıdaı qashqyń kep. Men de júrmin, Qansha ret  Qara túnde esigimdi ashtym kep –  Jalǵyz qara kórinse emirene qushaǵyma basqym kep.

Sen ol jaqta kóziń jasqa tunyp bir, Men bul jaqta kókiregim ulyp bir, Qarǵa adymda qaýysha almaı otyrmyz –  Shekarada qulyp tur.

Ýa, baýyrym! Kilt tóresi - júrektegi kilt bul. Ashylmaıtyn esikti topsasymen julyp kir! Qara basyń qandy saıda qalsa da –  Emshektegi balany el shetine iliktir!

Moıynymyzǵa zaman salǵan synaq bul,  Bir jaýabyn biz ǵana taba alatyn suraq bul: Qýat qylsań – óz elińdi qýat qyl,  Sýat qylsań – óz jerińdi sýat qyl. Jylasań da, kúlseń de Otanyńda jylap, kúl!  Qara basyń qandy saıda qalsa da –  Uldy jetkiz –  «Alla jar» dep artynan júgenińdi laqtyr!

Seniń basyń – noqtaly, Meniń basym – oq-dári: Uly dala oıanyp, aq tańymnyń atqany,  Ul-qyzymnyń shurqyrasyp jatqany, Astananyń jymyń qaqqan ottary, Masaıraǵan, maýjyraǵan shaqtary –   Bári-bári qýantady,  Qorqytady naq taǵy. Shańyraǵymda qyryq rýly ulys bar, Qazaqstan kógerse eken dep tilep,  Zar qyp júrgen joq bári.

Jurtty kórip mańaıdaǵy búlingen, Ultty kórip óz janynan túńilgen,  Sen qorqasyń aıyrylam dep tilimnen,  Aıyrylam dep dilimnen. Ol qorqynysh qorqynysh pa, Men qorqam:  Aıyrylam ba dep elden myna túrimmen!

Bárin qazaq kótergen, Bárine de eti ólgen: Qaıyr kútpeı bireýden ıa búginnen, Qysylǵanda Qudaıyna ǵana júgingen.  Tek memleketimniń bolashaǵynan qorqamyn –  Árnege bir jaltaqtap, Árkimge bir júgirgen.

Ýa, baýyrym! Meniń janym, seniń janyń teginnen Babalarymnyń qan men teri tógilgen, Analarymnyń jas pen súti tógilgen Jer uıyqty saqtaý úshin  Qaryzǵa ǵana berilgen: Qarys súıem jerimizden aıyrylsaq, Bizge ujmaq bola almaıdy ómir de, Bizge jaza bola almaıdy ólim de!

Ýa, baýyrym! Qobdalyq,  táshkendik hám ólgeılik! Qazaqtyń bir balasy Tildeı osy qaǵazǵa  Datyn jazdy kóldeı qyp.

Áýelden-aq taǵdyrymyz alaǵaı da bulaǵaı, Sen eshkimge qaramaı, Eshteńege qaramaı, Kóshiń túze! Buqarańdy basta, kel. Azappen kel, tozaqpen kel,  Qash ta kel,  Urym-Qyrym asta kel. Kóshiń túze! Kútpese de ulyǵy, Kózi tórt bop tosqan el.  Kórsek – birge,  Týǵan eldiń toıynda Bostandyqtyń shárbat dámin tataıyq. Ólsek – birge, Týǵan jerdiń saıynda  qushaǵymyz ajyramaı jataıyq!

Astana 25.08.2014.