«Asyl arna» rýhanı-aǵartýshylyq telearnasynyń dırektory, aıtys aqyny retinde tanylǵan Muhamedjan Tazabek NUR.KZ portalyna suhbat bergen.

«Asyl arna» telearnasynyń ıslamı-aǵartýshylyq arna bolyp ashylyp, damı kele, kórermendermen qarym-qatynas jasaı kele, olardan kóptegen suranys, usynystar nátıjesinde otbasylyq arnaǵa aınalǵanyn aıtqan Muhamedjan Tazabek telearna jumysy týraly keńirek áńgimelegen.

«Birinshi – aıtary az emes, sózi men isi sáıkesken qoǵamdyq tulǵalarǵa qashanda esigimiz ashyq. Máselen, biz aptasyna eki ret tikeleı efırge shyǵamyz. Memleket jáne qoǵam qaıratkerlerinen bastap, tańdaýly teologtar, bilikti ımamdar, salt-dástúr bilgirleri, medısına maıtalmandary, kásip bastaýdy úıretetin trenerler, maman baýlýdyń maıtalmandary, ýnıversıtet profesorlary sekildi san-salanyń qurmetti azamattary sol baǵdarlamamyzda qonaq bop, qazaqstandyq kórermenderdiń saýaldaryna tikeleı efırde jaýap berip jatyr», - degen arna basshysy Qazaqqa dál qazir kerek sózdi aıtýǵa laıyq qabiletti tulǵalarǵa arna minberiniń – efıriniń daıyn ekenin jetkizdi.

Sondaı-aq arna basshysy ózine jáne arnaǵa baǵyttalyp jatatyn túrli syndar týraly da oıyn aıtqan:

«Ókinishke qaraı, aınanyń aldynda turyp ádemiligimizge qarap, ózimizdi tekti dep, betti dep, batyr dep oılaıtyn jaǵdaıǵa keldik. Sondyqtan, qazir qoǵamda aqparattyń ras-ótirigi aralasyp tarqap, qıanattardyń júrip jatqany, ynsapsyz pikirlerdiń aıtylyp jatqany - tulǵanyń azdyǵynan. Jalpy «Asyl arnaǵa» túgili, elbasymyzǵa da, jurtqa úlgi bop júrgen Bekbolat Tileýhan jáne basqa da qaıratkerlerimizge baılanysty sózder ońaı aıtyla salady ǵoı. Keıde, ras, bala sıaqtymyz. Paıda men zıandy, dos pen dushpandy ajyra almaı qalyp jatamyz. Sonyń bári bizdiń shyn zıalylarynan aırylǵan memleket quraýshy ulttyń myqty tulǵalar týǵyza almaı, tolyq pisip jetilmegendiginiń kórinisi. Qazir kez kelgen BAQ-ty ashyp qarasańyz, kelesi sózderdi oqısyz.

«Qazaq tilin damytý úshin memleketke mynandaı zań shyǵý kerek, quzyrly mınıstrlikter ony bylaı júzege asyrý kerek, osylaı májbúrleý kerek, sol kezde bolady» dep jatady. Negizi durys aıtyp otyr. Odan da aldyn bir mańyzdy nárse bar.

Ol aqyldy kim oryndaıdy? Janyńdy jaı tapqyzyp kim júzege asyrady? Mysaly, qoǵamdyq tulǵa jemis beretin aǵashqa uqsaıdy dep elesteteıikshi. Ony ákep kóshetin ornalastyrǵannan keıin ol jemis bere me? Joq. Ol áýeli tamyryn jibere bastaıdy, jýandaıdy, odan jińishke tamyrlar paıda bolady. Sóıtip topyraq qyrtysyna ornalasa bastaıdy. Sodan keıin onyń dińi jýandap, oǵan usaq butaqtar shyǵa bastaıdy. Japyraǵyn jaıady. Tek tórt-bes jyl ótken soń gúldeıdi. Onda da úsikke ushyramasa, birtindep jemis bere bastaıdy. Baǵanaǵy tamyr jaıý, dińiniń jýandaý, butaǵynyń taraýy sıaqty prosesterden ótpegen adamdar bar. Olar ómiri jemis bermeıdi. Olar úıge ásemdik úshin ornatyp qoıǵan gúl sıaqty», - deıdi arna týraly túrli kózqarastarǵa Muhamedjan Tazabek.

«Bireý meni kústánalap, jamandap jazyp jatsa, men ony ýaıymdamaımyn. Ony túsinýge tyrysamyn. Óıtkeni, onymen alysyp, oǵan hat jazyp, daýlasyp júrer bolsam, ýaqytym shyǵyn, ári másele de sheshilmeıdi. Kerisinshe, mán bergenim oǵan bir dańq bolýy múmkin.

Beker ýaqyt ketetin sharýalarǵa nazar aýdarǵym kelmeıdi. Sebebi, meniń naqty istep jatqan sharýam bar. Kóretin adam kórip otyr. Kórmes túıeni de kórmes. Sharýasy rettelmegen adamdar ǵana sharshap júredi. Jáne solar ǵaıbat pen ósekke daıyn turady.

Qumnan keıin sý quısańyz, oǵan da oryn tabylady. Sol sıaqty, júregimizdegi ıman - bizge ómirdegi asa qajetti nárse men mańyzdy nárseniń nemese qajetsiz nárse men asa qajetsiz nárselerdiń ornyn aıqyndap beredi. Kóp adamdardyń ómirde shatasyp júrýi, qajetsiz istermen shuǵyldanýy, tyǵyryqqa tirelýi, aqyldy degen adamdardyń ómiriniń aqyry sýısıdpen aıaqtalýy, nemese ultqa aqyl aıtyp júrgen adamdardyń bala-shaǵasyna sózi ótpeýi, áıeliniń aldynda abyroıy bolmaýy onyń ómiriniń rettelmegenin kórsetedi. Mańyzdy men mańyzsyzdy ajyrata almaı júrgenin ańǵartady.», - deıdi ózine qatysty syn-pikirlerge.