Qazaqstandy barsha álemge tanytqan etno-rok stılindegi «Ulytaý» ujymynyń jetekshisi, belgili ánshi, prodúser Qydyráli Bolmanovty búginde tanymaıtyn qazaq joq. Birde jary Qaraqatpen dýet bolyp án shyrqasa, endi birde óziniń jeke oryndaýyndaǵy ánderimen sahanalarda boı kórsetip keledi. Aıtatyn ánderin jurt qosyla aıtady. Qydyráliniń oryndaýyndaǵy halyq súıip tyńdaıtyn sondaı ánderdiń biri – «Súgirdiń termesi».

Al endi sol terme jaıynda tosynnan jańa aqparattar paıda boldy. Qydyráli 20 jylǵa jýyq oryndap kelgen «Súgirdiń termesi» jaıynda QR Mádenıet qaıratkeri, profesor Amandyq Kómekuly Feısbýk paraqshasynda óz shyndyǵymen bólisti, dep habarlaıdy «Qamshy» portalynyń tilshisi.

Birneshe jyl boıy Súgirdiń termesi dep oryndap kelgen Qydyráli Bolmanovtyń bul termesi Súgirdiki emes, Baýbek Elbaıdyń termesi eken.

«Onyń ishinde bir aýyz Súgirdiń sózi joq. Bul nusqany Qydyráli Gollıvýdqa barar aldynda Aqtaýǵa barǵan saparynda Seken Turysbekov ekeýi bizdiń úıde eki kún qonaq bolyp, sonda Qydyrálige Súgirdiń sóziniń ornyna Elbaıdyń sózin salyp jazyp bergenmin.
1985-jyldary, jastardy termege tartý úshin Súgirdiń Ata qonysy Mańǵystaýǵa kósherinde baýyr basyp qalǵan Bes qala xalqymen qoshtasarda aıtqan uzaq tolǵaýynyń «Aýylǵa Súgir keldi dep» degen bólshegin, Kóshki Jemeneı Omar jyraýdyń sazyn paıdalanyp estradaǵa beıimdep ózim salǵanmyn. Alǵash ret bul shyǵarmany úlken saxnada, «Ánshi balapanda» oryndaǵan shákirtim Aqylbek Jemeneı Aıazbaıuly Ońdasynov edi. Onda sózi Súgirdiki bolǵanymen, sazy-áýeni Súgirdiki emes, Omar jyraýdyń «Noǵaılyq» jyr sazy edi. Al Qydyráliniń oryndap júrgen «Súgirdiń termesiniń» Súgirge sóziniń de sazynyń da qatysy joq. Ol Báýbek Elbaıdyń sózi, sol Kóshki Omar jyraýdyń sazy, óńdegen A. Kómekuly».

Al, Aıgúl Elshibaevanyń oryndap júrgen «Aýylǵa da Súgir-aı keldi dep» degen nusqanyń sózi Súgirdiki, sazy sol Omar jyraýdiki eken. Sózin óńdep, Aıgúl Elshibaevaǵa úıretken Amandyq Kómekulynyń ózi eken. Ári qaraı pikirin bylaı jalǵady:
«Bul turǵyda Qydyráli «ıttiń aǵy ne, kógi ne!» nemese «soqyr taýyqqa bári bıdaı» - degen kóz qarasta ma, álde bilmeı me, áıteýir Súgirdiń termesi dep aıtyp júr...»

Bul aıtqanyna jazylǵan pikirler sanynda esep joq. Biri Amandyq Kómekulynyń sózin qoldap, tyń aqparatqa alǵystaryn bildirip jatsa, keıbir oqyrmany qarsy pikirlerin jaýdyrdy. Osy termeni Qydyráliniń aýzyna ózi salyp bergenin aıtyp, 20 jyldan soń aqıqatty aıtyp qalǵanyna ashýlandy. Tipti, ekeýiniń arasynda bir daýdyń bolǵanyn alǵa tartqandar da bar.

Bul syndy pikirlerge Amandyq Kómekulynyń jaýaby daıyn boldy:

 «Bul jerde eshqandaı qupıa da, bireýdi kemsiteıin degen pıǵyl da joq. Kezinde qate Qydyráli tarapynan ketti. Ne bolsa da qazaqtyń óner aıdynynda abyroıly is boldy. Degenmen erteli kesh kim-kimniń sózin aıtyp júrgeni aıtylýy kerek qoı. Bir sazben aıtylǵan ekeýi eki basqa terme. Elbaıdiki 90 jyl buryn, Súgirdik 50 jyl buryn aıtylǵan sózder. Sonshama aspanǵa shapshıtyn ne búlindi, halqym-aý?!» dedi.

Keı oqyrmandarynyń pikirinshe, bul terme Súgirdiń tiri kezinde Elbaıdyń termesi bolyp aıtylyp júrgen eken.

Endi keıbiri osy ýaqytqa deıin Súgirdiń termesi dep kelgen termeni endi basqaniki deý orynsyz dep ashýlaryn bildirdi.

«Súgirdiń termesin» oryndap júrgen ánshi Aıgúl Elshibaeva da oıymen bólisti:

«Amandyq aǵamyzdyń kinási ne? Jazyǵy úıretkeni ma? Qydyráli Elbaıdyń termesin Súgirdiń termesi dep aıtsa, Mahambettiń termesin Maılyqojanyń termesi dep aıtqanmen teń».

Onyń ústine bul aqparat tyń emes, bul jaıynda kezinde Elarnadan Tamara Asar júrgizgen «Áli esimde» baǵdarlamasynda aıtylǵan eken.

Qydyráli Bolmanov ázirge jaýap bere qoımaǵan.