Dúnıejúzi qazaqtarynyń V quryltaıy Astanada maýsym aıynyń 22-25-i kúnderi ótedi. Bul týraly Dúnıejúzi qazaqtary qaýymdastyǵynyń bólim meńgerýshisi Botakóz Ýatqan habarlady.
"Dúnıejúzi qazaqtarynyń V quryltaıyna usynys qabyldaý búginnen toqtatyldy.
40 elden 350 qazaq dıasporasynyń jáne de Qaýymdastyqpen tikeleı baılanysta júrgen halyqaralyq uıymdardyń (Túrk keńesinen, Qypshaqtar qoǵamynan, Ázerbaıjan eli Dıasporologıa isi jónindegi memlekettik komıtetten, Álem mońǵoldary kongresinen, Ózbekstannyń Ultaralyq mádenıet ortalyǵynan) ókilderi shaqyrylady. Sondaı-aq, Almaty, Astana qalalarynan, barlyq oblystardan, Úkimet, Parlament, Mınıstrlikter, túrli partıalar men qoǵamdyq uıymdardyń, BAQ-nyń ókilderi qatysady.
Komısıanyń alǵashqy otyrysynda burynǵy ótken Quryltaılarǵa qatysqan (qoǵam basshylarynan basqa) adamdar shaqyrylmaıdy dep sheshildi, negizinen jastar kóbirek qamtylmaq.
Quryltaı Astanada maýsym aıynyń 22-25-i kúnderi ótedi.
Quryltaıdyń daıyndyq jumysyna sáttilik tileımin jáne de usynystar berip, belsene qatysqan barlyq aǵaıyndarǵa alǵysymyzdy bildiremiz", - dep jazdy qaýymdastyq ókili.
Táýelsizdiktiń alǵashqy kezeńinde Nursultan Nazarbaev Túrkıanyń Ystambul qalasynda qazaq dıasporasy ókilderimen kezdeskende alǵash ret Dúnıe júzi qazaqtarynyń quryltaıyn ótkizý týraly áńgime bolǵan eken. Kóp uzamaı, 1992 jyldyń qyrkúıek aıynda Almaty qalasynda tuńǵysh ret Dúnıe júzi qazaqtarynyń quryltaıy ótip, Elbasy mazmundy baıandama jasady. Sonda ol: «Tórtkúl dúnıeniń túkpir-túkpirinen qarlyǵashtaı ushyp kelgen kóńilderińiz úshin, qaıda júrseńizder de atameken men atajurtqa degen saǵynysh pen súıispenshilikke toly perzenttik peıilderińizdi saqtaǵandaryńyz úshin rızashylyq bildiremiz. Sizder arqyly búkil álemdegi qazaq baýyrlarymyzǵa ystyq sálemimizdi joldaımyz!», – dep tebirene sóılegen bolatyn.
Birinshi quryltaıda sheteldegi qazaq dıasporalarymen jumys isteıtin qaýymdastyq quryldy. Otyzdan astam memleketten kelgen delegasıa músheleri N.Á.Nazarbaevty Dúnıe júzi qazaqtary qaýymdastyǵynyń Tóralqa tóraǵasy etip saılady. Birinshi quryltaıdan búginge deıin Prezıdenttiń qatysýymen 2002 jyly Túrkistan qalasynda, 2005 jáne 2011 jyldary Astana qalasynda taǵy úsh quryltaı ótti.
2002 jyldyń 23-24-shi qazan kúnderi Túrkistan qalasynda ótken Dúnıejúzi Qazaqtarynyń İİ-shi Quryltaıynda ELBASY:
"Taǵdyrymyz solaı bolyp, annan qashqandardy, munnan qashqandardy Eýropadan da, Azıadan da tyń jerdi kóteremiz dep, qazaqtyń sanyn azaıtamyz dep, kóp ultty boldyq. Ony kemshilik dep sanamaý kerek. Artyqshylyǵymyz dep sanaý kerek! Sondyqtan biz ár ulttyń halqyn baýyrymyzǵa basyp úırengen halyqpyz, al endi shetelden kóship kelemiz degen óz qazaqtarymyzdy baýyrymyzǵa basa almaımyz ba sonda?! Men oılaımyn, segiz jarym mıllıon qazaq Qazaqstanda. Menińshe, qazir toǵyz mıllıonǵa jaqyndady. Sebebi, osy jyldardyń ishinde jarty mıllıon qazaq kóship keldi. Segiz mıllıondy ortasha úsh jarymǵa, tórtke bólgende, qansha januıa bolady?! Eki mıllıonǵa jaqyn bizdiń januıamyz bar. Tórt mıllıonǵa jaqyn januıa eki qazaqtan shaqyryp ákep, aıaǵynan turǵyzyp jiberse, sonsha qıynshylyq bolmas dep oılaımyn solarǵa. Bul bizdiń eldigimiz bolyp sanalar edi. Dúnıe júzine biz osyndaı maǵlumat, málimet, tájirıbe berer edik!», - dep shaqyrdy álemdegi barsha qandastardy.
