Bolashaqta Astana qalasynda salynatyn Panteonǵa usynylǵan jobalardyń biri. Sýret Azattyq radıosynan alyndy.
Farıza Ońǵarsynova apaıymyzdyń basyna duǵa qaıyra baryp edik. Mańaıy qarbalas eken. Jer ólshegen, qaǵaz syzǵan bir top adam júr. Apaıymyzdyń basyna eskertkish qoıýǵa kelgender sıaqty, qýanysyp qaldyq. Basyn aınaldyra gúlmen kómkerip qoısa da bıylǵy qańtardan beri eskertkish ornatylmaǵany janǵa batyp júrgen. Eskertkishtiń sulbasyn kórmek nıetpen qaǵazdaryna úńildik. Sóıtsek bular qalalyq ákimshiliktiń jer kartasyn túsirýshisi, topyraqtyń quramyn anyqtaýshylar, arhıtektorlar bolyp shyqty. Qoldaryndaǵy qaǵazda Panteon dep atalatyn jańa qurylystyń syzbasy. Munda qazaqtyń ıgi-jaqsylary qoıylatyn oryn ashylatynyn oqyǵanbyz. Bul da durys tirlik. Biraq sol Panteonnyń túrin kórip shoshyp qaldyq. Barlyǵy bir myń gektar jer bólinipti. Sonyń naq ortasynda shalqasynan túsip, álemde joq alyp kres jatyr. Iá, kádýilgi hrıstıandardy shoqyndyratyn kres. Uzyny bes shaqyrym, eni eki shaqyrym. Mánisin ákimshilikten kelgenderden surap edik, eshqaısysy adam uǵar jaýap qatpady. Árqaısysy óz mindetin ǵana biledi eken.
Qabanbaı batyr saǵanasynyń shyraqshysy, osy kıeli orynǵa bas-kóz Kamal Abdrahman degen aǵaǵa jolyqtyq. Ol kisi kresiń jaǵdaıyn bylaı túsindirdi: «Bul jobalar áli tolyq bitpegen, bar-joǵy jospar ǵana. Mundaǵy kres bolyp kórinip turǵan ár túrli nysandardyń arasyn ajyratý úshin ýaqytsha túsirilgen syzyqtar. Ol syzyqtar jer bederinde bolmaıdy. Kózderińizdi jetkizgilerińiz kelse qalalyq arhıtektýra basqarmasyna baryńyzdar. Kompúterden syzyqtardy óshirip, qaıta bir qarańyzdar. Memlekettik Qorymdaǵy jumys barysy apta saıyn, ár seısenbide qalalyq ákimshilikte arnaıy qaralady. Ótken jetide men de qatystym. Bar sharýa eldiń kóz aldynda atqarylyp jatyr. Panteon jóninde arnaıy komısıa qurylǵan. Onyń músheleri kres salǵyza qoımas.
Aǵataı osylaı degenimen de ishimizdegi kúdik shyqpaı qaldy, bizdi ılandyra almady. Al «Bar sharýa eldiń kóz aldynda» degeni shyndyqtan tym alys jatqandaı. Ǵalamtordy sharlap Panteonnyń maketin nemese joba syzbasyn taba almadym. Endeshe kópshilik qaıdan bilsin. Panteon jurtshylyqqa tanystyrylýy qajet.
Asqar Amangeldi
