Investısıalar jáne Damý mınıstri Jeńis Qasymbek Batys Qazaqstan oblysyna sapary týraly áleýmettik jelide jazdy:

«Nurly jer» baǵdarlamasy boıynsha Batys Qazaqstan oblysynda atqarylyp jatqan jumystarmen tanystyq. Osy jyly oblysta 90 myń sharshy metr turǵyn úı salynyp, kezekte turǵan 1200-den astam otbasyna qoljetimdi baǵamen baspana beriledi dep josparlanyp otyr. 
Bıyl baǵdarlama sheńberinde respýblıka boıynsha 10 mln. sharshy metrden astam turǵyn úıdi (100 myń páterdi), sonyń ishinde memlekettik ınvestısıa esebinen 1,6 mln. sharshy metr turǵyn úıdi (28 myń páterdi) iske qosý kútilip otyr. 
2017 jyldyń qańtar-aqpan aılarynda qarjylandyrýdyń barlyq kózderi esebinen jalpy alańy 2,3 mln. sharshy metr bolatyn turǵyn úı paıdalanýǵa berildi. Bul ótken jyldyń dál osy kezeńimen salystyrǵanda anaǵurlym joǵary kórsetkish. Qazir iske qosylǵan turǵyn úı úlesi boıynsha Almaty men Astana qalalary kósh bastap tur. Oblystardyń ishinde Mańǵystaý men Ońtústik Qazaqstan oblysy jaqsy nátıje kórsetip otyr. Qalǵan oblystardan da dál osyndaı nátıjeli jumys kútemiz. Aımaqtyq ákimdikter baǵdarlama boıynsha jyldyq kórsetkishke qol jetkizý úshin mınıstrlik tarapynan qajetti qoldaý kórsetiledi.