Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva bastaǵan komıtettiń kóshpeli otyrysynda memlekettik shekarany kúzetý máseleleri talqylandy dep habarlaıdy qamshy.kz.
Shara UQK Shekara qyzmetiniń Ońtústik Qazaqstan oblysyndaǵy 2020 áskerı bóliminiń aıasynda ótti.
Talqylaý aldynda senatorlar Ikram Adyrbekov, Mýhtar Altynbaev, Serik Jaqsybekov, Georgıı Kım, Lázzat Kıınov Saryaǵash shekara jasaǵynyń «Jibek joly» ótkizý beketi men «Darhan» shekara zastavasynda boldy. Olar qazaqstandyq shekarashylardyń jaýyngerlik qyzmetimen tanysyp, ınfraqurylym nysandaryn aralady.
Elimizdiń Shekara qyzmetiniń basshysy, general-maıor Darhan Dilmanov shekaradaǵy qazirgi jaǵdaı, atqarylǵan jumystar, sondaı-aq sheshýdi talap etetin ózekti máseleler týraly otyrys barysynda jan-jaqty habardar etti.
«Ulttyq qaýipsizdikke tónetin qaýip-qaterler (terorızm, ekstremızm, esirtki, qarý-jaraq kontrabandasy, zańsyz kóshi-qon) eskere otyryp, Shekara qyzmeti shyǵys jáne soltústik baǵyttardaǵy shekarany kúzetý deńgeıin tómendetken joq, ári basty nazardy ońtústik jáne ońtústik-batys strategıalyq baǵyttarǵa aýdarýda, - dedi UQK Tóraǵasynyń orynbasary-SHekara qyzmetiniń dırektory D.Dilmanov.
Qazirgi tańda Qazaqstan-Qyrǵyzstan jáne Qazaqstan-Túrikmenstan memlekettik shekarasyn shegendeý prosesi aıaqtaldy. Qazaqstan-Qyrǵyzstan shekarasyn shegendeý men tártibi týraly halyqaralyq sharttarǵa qol qoıýǵa daıyndyq jáne kelisý jumystary júrgizilýde.
2017 jylǵy qańtardan bastap búgingi kúnge deıin Memlekettik shekarany kúzetý kezinde shekara aımaǵynda 3 545 quqyq buzýshylyqtyń joly kesildi. 75,5 kılogramm esirtki zatynyń (onyń ishinde 50 kılogrammnan astam geroın), sondaı-aq 16 qarý men 523 oq aınalymnan alyndy.
Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva Ońtústik Qazaqstan oblysyna eki kúndik sapardy qorytyndylaı kelip, shekara qyzmetiniń tehnıkalyq jabdyqtalýynyń joǵary deńgeıin atap ótti. «Bul salanyń basymdyqqa ıe ekeni barshaǵa belgili, áskerı qyzmetshilerdiń, onyń ishinde áleýmettik jaǵynan qorǵalýy úshin barlyq jaǵdaı jasalady. Áskerı qyzmet týraly zańnamaǵa áskerı qyzmetshilerdi turǵyn úımen qamtamasyz etý máselelerin eleýli túrde jeńildetetin túzetýler Májiliste engizildi. Ol óte aýqymdy jumys, ol depýtattardyń eńbegi dep sanaımyn», - dedi senator respýblıkalyq jáne aımaqtyq buqaralyq aqparat quraldaryna bergen suhbatynda.
D.Nazarbaeva búdjet qarjysyn eleýli túrde ońtaılandyratyn biryńǵaı avıasıa qyzmetin qurý kerek dep sanaıdy.
«Jalpy alǵanda, qıyndyqtarǵa qaramastan adal qyzmet etetin bizdiń áskerılerge rızashylyǵymdy bildiremin. Biz osy mamandyqty tańdaǵan adamdarǵa zor qurmetpen qaraýǵa, olardyń amandyǵyna tilekshi bolýymyz kerek. Alda Qazaqstan Qarýly kúshteriniń 25 jyldyǵy kele jatyr, sondyqtan bizdiń áskerılerge jýrnalıserdiń nazar aýdarýyn ótinemin. Olar bizdiń beıbitshiligimizdi qamtamasyz etip keledi. Qoǵamdy osy mamandyqqa qurmet kórsetýge tárbıeleý kerek», - dedi komıtet tóraǵasy.
Senatorlar sondaı-aq respýblıkalyq «Jas ulan» ásker mektebinde boldy. Olar Otanymyzdyń jas qorǵaýshylary – mektep tárbıelenýshilerimen kezdesip, áskerı mektepke kompúterlik synyp jáne dárigerlik jabdyqtar tartý etti.
