Kásipqoı bokstan orta salmaqtaǵy WBA (Super), WBC, IBF jáne IBO chempıondyq belbeýleriniń ıesi qazaqstandyq Gennadıı Golovkınniń menedjeri Oleg Garman Astana ákimdiginiń ótirigin áshkereledi, dep habarlaıdy Vesti.kz
Eske salaıyq, búgin Astana qalalyq Dene shynyqtyrý jáne sport basqarmasynyń basshysy Berik Marjyqpaev 17 shilde kúni "Astana-Arenada" Gennadıı Golovkınniń brıtan boksshysymen jekpe-jegi ótedi dep málimdegen bolatyn. Alaıda, GGG komandasy bul aqparattyń ótirik ekenin aıtyp otyr.
"Búgingi tańda Gennadıı Golovkınniń Qazaqstandaǵy jekpe-jegi týraly eshqandaı málimet joq. Sáıkesinshe, kezdesýdiń ótetin kúni, orny, tipti qarsylastyń kim ekeni de belgisiz. Sondyqtan bıletter jaqynda satylady degen aqparat shyndyqqa janaspaıdy", - deıdi Oleg German.
Ol Astana ákimdigi qyzmetkerleriniń 17 shilde degen datany qaıdan taýyp alǵanyna tań qalyp otyr.
"Gennadıı Golovkınniń qatysýymen ótetin boks keshteri únemi aptanyń senbisine josparlanady. Al, 17 shilde dúısenbige túsip tur. Astana ákimdiginiń bul datany qaıdan taýyp alǵanyna túsine almaı otyrmyn. Eger bul jekpe-jek týraly rastalǵan aqparat bolsa eń birinshi ony bizdiń komanda taratady", - dep atap ótti GGG menedjeri.
Esterińizge salaıyq, buǵan deıin Mádenıet jáne sport mınıstri Arystanbek Muhamedıuly da Astanada Golovkın-Sonders jekpe-jeginiń ótetinin málimdegen bolatyn. Onyń sózin de GGG komandasy artynsha joqqa shyǵardy.
