Bir qyzyǵy, «Olımp» emdeý-saýyqtyrý kesheniniń qojaıyny maıordyń ersi qylyǵy týraly aýdandyq ishki ister bólimine shaǵym túsirgenimen, ony áriptesteri jyly jaýyp qoıypty. Tek qana «Sarykól» aýdandyq gazetiniń bas redaktory Aıjan Mýsatova men oblystaǵy beldi basylym «Nash Kostanaıdyń» aralasýymen tártip saqshysy laıyqty jazasyn alyp otyr.

Joǵaryda atalǵan saýyqtyrý kesheni qyzmetkerleriniń kóz aldynan sol kúngi bolǵan oqıǵa áli keter emes.

«Aýdandyq ishki ister bóliminiń qyzmetkeri, polısıa maıory Erbolat Ýtebaev óziniń 5 áriptesimen bizdiń keshenge keldi. Bul byltyrǵy jyldyń sońynda keshki saǵat 22.00 shamasy bolatyn. Tártip saqshylary maıordyń týǵan kúnin atap ótpek bolǵan eken. Olar barlyq keshendi jaldap alǵan. Al, bizdiń qyzmetkerler bul jerde ishimdik ishýge qatań tyıym salynǵanyn aıtty. Keshen saýyqtyrý salasyna baǵyttalǵanyn jetkizdi. Ony estigen tártip saqshylary tez ketip qaldy. Al, sońynda qalǵan maıor sýǵa shomylyp salqyndaǵysy kelgen bolýy kerek, jyldam sheshine bastady. Osy sátte baseın qyzmetkerleri burynǵy tártip saqshysyna sýǵa túsetin arnaıy ish kıim kıýdi usynady. Arnaıy kıimi bolmaǵan maıor myrza kóp oılanbastan tyr jalańash sheshinip, sýǵa qoıyp ketti. Bul kezde ol jerde eresektermen qatar balalar da bolatyn», – deıdi «TRIO» JSHS negizin qalaýshylardyń biri Saak Meloıan.

Shekten shyqqan burynǵy tártip saqshysynyń ersi qylyǵyna shydaı almaǵan saýyqtyrý kesheniniń ákimshisi sol arada 102-ge habarlasyp, kómek surapty. Al, oqıǵa bolǵan jerge jetken tártip saqshylary áriptesteriniń qylyǵyn burmalap kórsetip, shaqyrǵandardy kináli qylyp ketipti.

«Sol kúni men trenajer zalynda jattyǵý jasap jatqan edim. Bir kezde adamdar shýlap ketti. Kelsem, álgi er adam kıinip úlgeripti. Biraq, barlyq jurtty boqtap, aýzyna túskenin aıtyp júrdi. Al, shaqyrǵan tártip saqshylary jetkenshe izin sýytyp úlgerdi», – deıdi Sarykól aýdanynyń turǵyny, oqıǵa kýágeri Zına Kıngan.

Biraq, kelesi kúni bala-shaǵa men turǵyndardyń záresin alǵan maıordyń isine qatysty shyndyqqa janaspaıtyn derekter shyǵady. Ol jerde eshqandaı tártip saqshysy bolmaǵan. Tek beıtanys er adam qyzmet aqysyn tólemegen degen aqparat taratqan. Osylaısha óz abyroılaryn oılaǵan polıseıler isti jyly jaýyp qoımaq bolypty.

«Meni tańǵaldyrǵany polısıa qyzmetkerin dárigerlik tekserýden ótkizip, ishimdik ishpegen degen anyqtama daıyndaǵan. Men onyń aıaǵynan áreń turǵanyn kórdim ǵoı. Qoǵamdyq tártipti qadaǵalaıtyn saqshylarymyz osyndaı uıatsyz iske barsa, basqasynan ne úmit kútemiz», – dep qynjylady aýdandyq «Sarykól» gazetiniń bas redaktory Aıjan Mýsatova.

«Jergilikti «Nash Kostanaı» gazetine «Olımp» emdeý-saýyqtyrý kesheninde óz qyzmetin asyra paıdalanyp, baseınge tyr jalańash shomylǵan Sarykól aýdandyq ishki ister bóliminiń qyzmetkerine qatysty maqala shyqqan soń keń kólemde qyzmettik tekserý jumystary júrgizildi. Tekseristiń nátıjesi boıynsha tártiptik keńes joǵaryda esimi atalǵan tártip saqshysyn qyzmetinen bosatý týraly sheshim shyǵardy. Sonymen qatar, osy bassyzdyqqa kóz juma qaraǵan aýdandyq ishki ister bólimi bastyǵynyń 2 orynbasary da tártiptik jaýapkershilikke tartyldy», – deıdi Qostanaı oblystyq İİD baspasóz hatshysy Elena Kasharına.