Mınıstrlik halyqaralyq baǵyttardaǵy áýe tasymalyn arttyrý maqsatyndaǵy josparly jumysyn jalǵastyrady. Ótken jyly 7 halyqaralyq baǵytta áýe reısteri ashyldy. Olar – Astanadan Amsterdamǵa, Almatydan Sıan, Sharm-El-SHeıh jáne Tegeran qalalaryna, Aqtaýdan Batýmı jáne Sochı qalalaryna, sondaı-aq, Shymkent-Ystambul arasynda ashylǵan áýe reısteri. Bul týraly áleýmettik jelide Investısıalar jáne damý mınıstri Jeńis Qasymbek jazdy.
"Halyqaralyq baǵyttaǵy suranystar jyl saıyn artyp keledi. Máselen, bıyl Astanada ótetin EKSPO-2017 kórmesin ótkizýimizge baılanysty, «Astana» halyqaralyq qarjy ortalyǵyn damytýǵa baılanysty Qazaqstan men Eýropa elderi arasynda sheteldik áýe kompanıalarymen birlesip jańa baǵyttar ashý josparlanyp otyr. 
2017 jyldyń 8 mamyrynda polshalyq LOT Polish Airlines áýe kompanıasy Astana-Varshava baǵytynda aptasyna 4 ret qatynaıtyn jańa áýe reısin ashady. Sondaı-aq, Astana-Býdapesht arasyndaǵy alǵashqy áýe qatynasy osy jyldyń 1 maýsymynda ashylady. Keshe Ortalyq jáne Shyǵys Eýropadaǵy eń iri loý-kost áýe tasymaldaýshysy Wizz Air áýe kompanıasy Astana men Býdapesht arasyndaǵy jańa áýe qatynasynyń iske qosylatynyn jarıalady. Jańa áýe qatynasy aptasyna eki ret, beısenbi jáne jeksenbi kúnderi jumys isteıtin bolady. Bul Qazaqstan jáne Vengrıa arasyndaǵy dıplomatıalyq qarym-qatynastardyń 25 jyldyǵyna oraı jasalǵan keremet tartý.
19 maýsymnan bastap FinnAir áýe kompanıasy Astana-Helsınkı baǵytynda aptasyna 2 ret qatynaıtyn jańa baǵytty iske qosady. Maýsym aıynan bastap Astana-Beıjiń baǵytynda aptasyna 3 ret Air China ushaqtary qatynaıtyn bolady. Qazaqstandyq áýe kompanıalar da halyqaralyq baǵyttar boıynsha órisin keńeıtpek. 2017 jyldyń maýsym aıynan bastap «Eır Astana» Astana-Ýlan-Bator arasynda, «SCAT» áýe kompanıasy Astana-Erevan arasynda jańa áýe reısterin ashady. 
«Eır Astana» áýe kompanıasy halyqaralyq baǵytta jańa áýe reısterin ashý úshin úlken jumys atqaryp jatyr. 2019 jyly Astanadan Sıngapýr men Tokıoǵa, 2020 jyly Shanhaı men Nú-Iork baǵytyndaǵy jańa reıster ashý josparynda bar."