2016 jyly Qazaqstanda memlekettik tildi meńgergen halyq úlesi 82 paıyzdy qurady. Bul týraly QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysy barysynda mádenıet jáne sport mınıstri Arystanbek Muhamedıuly baıandady, dep habarlaıdy primeminister.kz​

Mınıstr 2014 jyly memlekettik tildi meńgergen halyq úlesi 72,1%-dy qurasa, 2015 jyly 76,3%-ǵa jetkenin aıtyp ótti. Qazirgi tańda «Qaztest» júıesi negizinde qazaq tilin bilý deńgeıin anyqtaý jyl saıyn artýda. 2016 jyly testileýden ótkenderdiń jalpy sany – 73 732 adamdy, onyń ishinde memlekettik qyzmetshiler sany shamamen 40 000 adamdy (53,5%) quraǵan. 

«Memlekettik baǵdarlama aıasynda 2014-2016 jyldar aralyǵynda oqý-ádistemelik quraldar, álem ádebıeti klasıkteriniń shyǵarmalary, tanymdyq, ǵylymı-pýblısıstıkalyq, balalarǵa arnalǵan kitaptar jáne t.b. qosa alǵanda, barlyǵy shamamen 88 baspa jobasy jaryq kórdi. Onyń ishinde ózge tilderde shyǵarylǵan jobalar sany – 24. Sonymen qatar memlekettik tildi úıretýdiń jańa ádistemeleri «Qazaq sózi» oqý quraldary ázirlendi», - dedi A. Muhamedıuly.

Ótken jyldyń qorytyndysy boıynsha ortalyq jáne jergilikti atqarýshy organdardaǵy memlekettik tildegi qujat aınalymynyń úlesi 91%-dy qurady. Sonymen qatar, elimizde 87 aımaqtyq qazaq tilin oqytý ortalyqtary jumys jasaıdy.

«Degenmen, statısıkalyq-esep jáne qarjylyq qujattamalardyń memlekettik tilge aýyspaý faktileri bar», - dedi mınıstr.

Eske sala keteıik, Qazaqstanda til saıasaty «Qazaqstan Respýblıkasyndaǵy til týraly» Zańyna, Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyna sáıkes júzege asyrylady.

Búgingi tańda baǵdarlamanyń ekinshi kezeńin júzege asyrý jumystary aıaqtaldy.