Búgin Dúnıejúzi qazaqtary qaýymdastyǵynyń 20 jyldyǵyna arnalǵan torqaly toıdyń shymyldyǵy jabyldy. Mereıtoı qurmetine oraılastyrylǵan termeshiler baıqaýy, jyr músháırasy, qolónershiler kórmesi óz máresine jetip, júldegerler marapattaldy. «Qamshy» portalyn qarap otyrǵan Alty Alashtyń balasynan suraıtyn súıinshimiz – osy saıttyń qaz-qalpynda  tóte jazýda kórinýine muryndyq bolǵan Yqylas Orazbaıuly  Dúnıejúzi qazaq jastary arasynda ótkizilgen jyr músháırasynda bas júldeni enshiledi. Júldeni Qazaqstan Respýblıkasy Memlekettik syılyǵynyń laýreaty, kórnekti prozashy Álibek Asqarov tabystady.  Shekardan shet júrgeni bolmasa, bar qazaqtyń baǵyn asyryp, Qazaq eliniń at-ataǵyn aspandatyp júrgen Yqylasqa shyǵarmashylyq tabys, zor densaýlyq tileımiz. 

Bóri jyry

Ketem men, ketem!

Baǵzy bir

babamnan qalǵan kósh qoı bul,

Arqanyń jeli azynap, túsimnen sirá ketpeı júr.

Eki qoldyń jumysyn egemen elimnen taba alam.

Qamsyz bolsa da turmysym – bolashaǵyma sadaǵam.

Attaı jelgen ómirde qaqpaı kórgenshe bótennen,

Balaqtan alǵan kúdikten attaımyn daǵy ketem men.

Qaltańdaǵan qart bolsam qalamsha qadaýǵa jararmyn,

Qyrpýly qyran er bolsam, shańyraqqa ýyq qadarmyn.

Óndirdeı óren jas bolsam keýdemdi kerip ósermin,

Kóktemgi nur men nóserge, kóktegi kúnge tósermin.

Qabyryna baryp atamnyń qabyrǵalarymdy bekittim,

Anamnan baryp bata aldym , ana tilime jetikpin.

Asyǵym qalǵan belder-aý, jasyǵyń emes men seniń,

Ǵashyǵym qalǵan týǵan jer – saǵynyshymsyń eńselim.

Altyn tunǵan arnadan laılanǵan ózender,

Asyǵasyń batysqa, ashynasyń sezem men.

O, týǵan jer!

Tunyǵyńa pisirdiń, tuǵyryńnan ushyrdyń,

Qamys qulaq tulpardyń qaıys noqtasyn sypyrdym.

Jıǵanym men ımanym, kisiligim de kıeńnen,

Súıekten ótse yzǵaryń súıegimmenen súıem men.

Bir túıir topyraǵyńa bir týar erler jazym bop.

Atanyn atam qomdaǵan ataqty taýda jazyq joq.

Atyn bir ataǵanyma qomdanatuǵyn ıyǵym.

Qaıyrly bolsyn ózgege qadiri bıik uıyǵym.

Elimniń eski dástúri joıylmaı turyp attanam,

Qazan qulaǵy tórteýin moıyndaı turyp attanam.

Janarym janyp jortamyn, bórimin, biraq ash emes,

Jatyrqaǵandar jaý emes, músirkegender dos emes!

Qaqpandy basyp ketkende tirsegin shaınap qaldyrǵan,

Bórideı ulyń barǵanda qurmetpen qara aldymnan.

Ózge eldiń ozyq úrdisin aparý úshin ketem men,

Oqtan qalǵan oralman ataný úshin ketem men.

Otanǵa jetsem ordaly ottaı júregim bulqynar,

Betimnen qaqqan bul ómir betimnen súıer kún týar.

O, baıtaq, Qazaqstan dep alshańdaı basyp jetkende,

Jaýda qalǵan jerim dep jaýtańdaı jasyp ketkende.

Abbar kóship jetkende appaq bir jaǵa, appaq ar..

Osyǵan da Alla shúkir dep otyratuǵyn shaq bolar.

Kóktem

Shek barma eken qudirettiń isinde,

Men dalama aınalyppyn túsimde.

Mańdaılarym márt, asqaq

Aınalypty jalama quz jartasqa.

Janarymda jaıyn týlap, aı túnep,

Qabaǵymda qaıyń, taldar boı túzep.

Keńsirigimdi juparly jumbaq án keýlep,

Mıyǵymda mıllıon gúlder sánge órlep.

Erinimde aqsha bulttar damyldap,

Iegimde aqqý-qazdar mamyrlap.

Taýǵa aınalǵan tanaýymdy kún óbip,

Murttarymnyń arasynan buǵy órip.

Sol qulaǵym bórilerge apan bop,

Oń qulaǵyma duǵa oqypty apam kep.

Oń qolymda qoıshy jigit ysqyryp,

Sol qolymda sulý qyzdar is tigip.

Kóbelerimniń kók kireýke muzy erip,

Alaqanymda arý atandar kúzelip.

Aıaǵymda kósh kerýeni baqytty,

Jyl qustaryn ertip kele jatypty.

Ekpinimen teńseltip jer besikti,

Dál keýdemnen mıllıon jylqy ótipti.

Jaly – jalyn, ot ornyndaı tuıaqty,

Tulparlardan daýyl turǵan sıaqty.

Daýyl ǵajap bir aýnatyp ólkeni,

Shyryn tústiń jyrtylypty jelkeni.

Tús túńligi jyrtylǵanda orasan,

Oıana sap jan-jaǵyma qarasam,

Tósqaltamnan telefonym tepkilep,

Jatyr eken bir sıgnal kepti dep.

Telefonymdy dir-dir etken, dir etken,

Qolyma aldym tulpar bop Shapqan júrekpen.

Álim jetpesten daýysymdy da túzeýge,

Dirildep ketti saýsaǵym, dirildep ketti tizem de.

Batyldanar da ezbelep,

«Maquldan» aryǵa sóz de joq.

Tutyǵa berdim ásheıin,

Tuqyra berdim ásheıin,

Aıaǵymmenen jer «qasyp»,

Shyqshytty shylqa terbasyp.

O, Darıǵa-aı...

Túsimde taý bop ketsemde,

Ómirde dáý bop ótsemde.

Bekereken ǵoı, beker ǵoı,

Ýyzdaı jap-jas bir qyzdyń

Ýysynda ǵana ekem ǵoı.

"Qamshy" portaly